Read Malay, Manado 1 Timotius 1 Bible Online

1 Timotius 1 - Malay, Manado bible

1 Timotius 1

¹Ni surat dari kita, Paulus. Kita ini Kristus Yesus pe rasul tu Dia pe utusan iko prenta dari Tuhan Allah yang jadi torang pe Juruslamat, deng lei iko Kristus Yesus tu torang pe harapan.

²Ni surat for Timotius. Ngana kita so anggap kita pe anak sandiri lantaran ngana pe percaya. Kita minta supaya Allah Bapa deng Kristus Yesus tu torang pe Tuhan se tunjung tu bae pa ngana, se tunjung tu rasa kasiang deng lei beking ngana hidop deng hati tenang.

³Waktu kita so mo pigi ka Makedonia, kita minta deng sangat pa ngana supaya tinggal di Efesus. Di Efesus itu ada tu orang-orang yang ja se ajar tu ajaran yang baku laeng deng torang pe ajaran, ngana suru jo dorang brenti se ajar tu ajaran itu.

⁴Ngana bilang lei pa dorang supaya jang bacirita tentang dongeng-dongeng deng daftar nene moyang yang talalu panjang. Tu hal-hal itu cuma beking orang baku ambe pendapat kong nyanda bantu orang iko tu rencana Tuhan Allah for se slamat pa manusia, yang torang so tau lantaran torang percaya pa Tuhan.

⁵Kita suru samua ini pa ngana, deng maksut supaya orang-orang baku-baku sayang. Tu sayang itu musti muncul dari hati yang bersi, dari pikiran yang tau tu butul, deng lei dari hati orang yang butul-butul percaya pa Tuhan.

⁶Mar ada orang yang so nyanda ja beking samua itu, malatare dorang so tasala jalang, dorang suka babacirita yang nyanda ada guna.

⁷Dorang itu yang suka mo jadi guru for se ajar tu atoran-atoran di kitab Taurat, mar dorang sandiri nyanda mangarti apa tu dorang da se ajar deng dorang nintau arti.

⁸Torang tau kalu tu atoran-atoran yang ada di kitab Taurat itu bae, asal orang pake itu iko tu maksut yang butul.

⁹Tu atoran-atoran yang ada di kitab Taurat itu bukang for orang yang ja beking tu butul, mar for tu orang-orang yang bagini: yang nyanda ja iko tu atoran, yang pangmalawang Tuhan pe prenta, yang hidop jao dari pa Tuhan Allah, yang ja beking dosa, yang cuma ja iko tu dorang pe mau sandiri, yang nyanda percaya pa Tuhan, yang babunung papa ato mama sandiri ato orang laeng,

¹⁰yang ja beking hal-hal caparuni, laki-laki yang main seks deng laki-laki, yang culik orang kong jual for beking budak, pangbadusta, yang ja basaksi dusta, deng lei orang-orang yang ja beking tu hal-hal yang baku laeng deng tu ajaran yang butul.

¹¹Tu ajaran yang butul itu ada di Kabar Bae dari Tuhan Allah. Dia itu luar biasa kong pantas orang puji. Tu Kabar Bae ini Dia so se percaya pa kita.

¹²Kita bilang makase pa Kristus Yesus tu torang pe Tuhan, lantaran Dia yang se kuat pa kita, Dia anggap kita De pe orang yang setia sampe Dia kase percaya tu playanan ini pa kita.

¹³Dulu kita yang ja bicara jaha tentang Kristus Yesus. Kita lei ja beking siksa deng bahina pa tu orang-orang yang percaya pa Dia. Mar biar lei bagitu, Dia kase tunjung Dia pe rasa kasiang pa kita lantaran kita blum percaya pa Dia deng nyanda mangarti tu kita da beking.

¹⁴Malatare, tu torang pe Tuhan se tunjung tu Dia pe sayang pa kita deng talebe-lebe sampe kita jadi percaya pa Dia, kong kita lei bole basayang pa orang laeng lantaran kita so percaya pa Kristus Yesus.

¹⁵Tu kata-kata yang kita mo bilang ini, ngana bole trima deng percaya. Tu de pe bunyi bagini, “Kristus Yesus datang ka dunia for mo se slamat tu orang-orang yang beking dosa.” Kong dari samua orang yang perna beking dosa, kita yang paling banya beking dosa.

¹⁶Mar biar bagitu, Yesus Kristus se tunjung tu De pe rasa kasiang pa kita supaya orang-orang bole lia tu Dia pe sabar skali pa kita, tu orang yang banya kali beking dosa. Deng bagitu kita jadi conto for orang laeng yang berdosa, supaya dorang lei bole percaya pa Kristus Yesus kong mo hidop kekal deng Dia.

¹⁷Hormat jo pa Tuhan Allah! Dia itu torang pe Raja sgala jaman, Dia ada slama-lamanya, Dia nyanda dapa lia, Dia cuma satu. Puji deng hormat jo pa Dia sampe slama-lamanya. Amin.

¹⁸Timotius, tu kita so anggap kita pe anak, kita suru pa ngana supaya beking ngana pe tugas itu iko apa tu Tuhan so kase tau pa ngana lewat jemaat. Tu Tuhan da kase tau itu se smangat pa ngana for berjuang beking tu ngana pe tugas.

¹⁹Soalnya, ada orang-orang yang so nyanda iko tu dorang pe hati yang tau tu butul kong lantaran itu dorang so nyanda percaya lei.

²⁰Dari pa dorang itu ada Himeneus deng Aleksander. Kita so srahkan dorang dua pa setang pe bos. Kita beking bagitu supaya dorang sadar kong brenti beking besae Tuhan Allah pe nama.