Read Malay, Manado 1 Timotius 3 Bible Online

1 Timotius 3 - Malay, Manado bible

1 Timotius 3

¹Memang butul tu da bilang ini, “Orang yang suka mo jadi pemimpin jemaat, itu de pe arti dia so pili tu karja yang bagus.”

²So itu tu pemimpin jemaat, de pe orang musti bagini: dia hidop bae-bae sampe nyanda ada yang bole mo se sala pa dia, dia pe bini cuma satu, bole mo tahang diri, bijaksana, sopan, suka trima orang pa de pe ruma, pande mangajar,

³nyanda pangmabo, nyanda pangbakalae mar bae-bae, suka baku-baku bae deng nyanda gila doi.

⁴Dia lei musti tau ator bae-bae de pe kluarga, deng de pe anak-anak lei hormat deng dengar-dengaran pa dia.

⁵Soalnya kalu dia nyanda mampu mo ator tu de pe kluarga sandiri, nyanda mungkin lei dia mampu mo ator tu Tuhan Allah pe jemaat.

⁶Tu pemimpin itu nimbole yang baru percaya pa Tuhan, supaya dia nyanda jadi sombong. Soalnya kalu dia so jadi sombong, Tuhan mo hukum pa dia sama deng Tuhan da hukum tu setang pe bos.

⁷Tu pemimpin itu musti ada nama bae di antara orang-orang yang blum percaya pa Tuhan, supaya orang laeng nyanda mo bicara besae tentang dia. Deng bagitu setang pe bos nyanda mo dapa goda pa dia for beking dosa.

⁸Bagitu lei deng diaken-diaken yang ja babantu di jemaat, dorang itu musti orang yang sama deng ini: kalakuan bae yang beking orang hormat pa dia, nyanda munafik, nyanda pangmabo deng nyanda ja batipu for cari untung.

⁹Dorang musti pegang trus tu dorang pe percaya pa Kristus yang Tuhan Allah so kase tunjung skarang ini, kong dorang iko akang deng hati yang bersi.

¹⁰Kong jemaat musti lebe dulu priksa bae-bae pa dorang itu. Kalu jemaat so tau dorang hidop lurus, baru jemaat angka pa dorang jadi diaken.

¹¹Bagitu lei deng dorang pe bini, dorang pe bini pe kalakuan musti bae sampe dorang dapa hormat, dorang nyanda ja beking besae orang laeng pe nama, bole batahang diri, deng bole mo percaya di samua hal.

¹²Tu diaken lei cuma bole ada satu bini, kong ja urus bae-bae tu de pe anak-anak deng de pe kluarga.

¹³Kalu tu diaken-diaken layani bae-bae tu jemaat, pasti jemaat mo hormat pa dorang. Deng bagitu dorang mo lebe brani babicara tentang tu dong pe percaya pa Kristus Yesus.

¹⁴Timotius, kita baharap supaya kita capat mo pi baku dapa deng ngana di sana. Mar biar lei blum baku dapa, kita so tulis ini surat for ngana,

¹⁵supaya kalu kita talat datang, kita pe surat so lebe dulu sampe pa ngana. Lewat ini surat, ngana bole tau bagimana tu orang percaya musti hidop jadi Tuhan Allah pe kluarga. Tu kluarga ini tu jemaat dari Tuhan Allah yang hidop. Kong Dia pe jemaat itu yang topang tu ajaran yang butul, sama deng tiang raja deng fondasi yang topang tu ruma.

¹⁶Dulu orang nintau tu ajaran yang butul itu, mar skarang Tuhan Allah so se tunjung tu rahasia yang luar biasa tentang tu ajaran itu. Bagini tu rahasia itu: Yesus so datang sbagai manusia. Roh Kudus kase tunjung kalu Dia itu yang butul, deng malaekat-malaekat lei da lia pa Dia. Dia pe cirita itu so tasiar ka bangsa-bangsa laeng, kong orang-orang di dunia ini percaya pa Dia, deng Tuhan Allah so angka pa Dia ka tampa yang paling tinggi deng cara yang luar biasa.