Read Malay, Manado 1 Timotius 5 Bible Online

1 Timotius 5 - Malay, Manado bible

1 Timotius 5

¹Timotius, ngana jang togor deng kras pa laki-laki yang lebe tua dari ngana. Lebe bae ngana se nasehat deng bae-bae pa dia sama deng ngana da babilang pa ngana pe papa sandiri. Kong pa tu nyong-nyong, ngana lei musti se nasehat deng bae-bae pa dorang sama deng ngana babilang pa ngana pe ade sandiri.

²Bagitu lei deng pa tu parampuang-parampuang yang lebe tua dari ngana. Ngana musti se nasehat deng bae-bae pa dorang sama deng ngana da babilang pa ngana pe mama sandiri. Kong pa tu nona-nona, ngana lei se nasehat pa dorang deng bae-bae sama deng ngana da babilang pa ngana pe ade sandiri. Kong lei kalu ngana bicara deng tu nona-nona, ngana pe pikiran musti bersi di muka pa Tuhan.

³Ngana musti tarukira akang tu keperluan dari janda-janda yang nyanda ada sapa-sapa tu mo bantu pa dorang.

⁴Mar kalu tu janda masi ada anak ato cucu, tu anak deng cucu itu yang musti lebe dulu urus pa tu janda itu pe perlu. Dorang musti blajar tu cara mo balas dorang pe mama deng oma pe bae pa dorang. Deng bagitu, dorang so beking snang Tuhan Allah pe hati.

⁵Tu janda yang nyanda ada anak ato cucu for mo urus pa dia, dia itu cuma baharap deng yakin pa Tuhan Allah. Siang deng malam dia slalu basombayang for minta tolong pa Tuhan Allah.

⁶Mar tu janda yang cuma suka hidop basnang-snang, biar lei dia masi hidop dia sama deng so mati.

⁷Kase inga akang samua itu pa dorang, supaya nyanda ada orang yang mo bicara busu tentang dorang.

⁸Soalnya kalu ada orang yang nimau mo urus tu orang-orang yang masi kluarga deng dia, lebe-lebe tu de pe kluarga sandiri, tu orang itu sama deng so manyangkal de pe percaya pa Tuhan. Dia itu so lebe soe dari tu orang yang nyanda percaya pa Tuhan.

⁹Tu janda yang jemaat bole mo se daftar for mo bantu, de pe syarat bagini: Dia pe umur musti anam pulu taong ka atas, cuma satu kali kaweng,

¹⁰deng lei orang-orang tau kalu dia ja beking tu bae pa orang laeng. Dia beking tu bae yang sama deng ini: dia da urus deng bae tu de pe anak-anak, dia suka trima orang laeng pa de pe ruma, dia ja layani tu Tuhan pe orang-orang deng renda hati, dia lei ja bantu tu orang-orang susa, kong dia slalu ja beking tu bae pa samua orang.

¹¹Mar kalu tu janda-janda yang masi blum anam pulu taong, jang dulu se daftar pa dorang for mo dapa bantuan. Soalnya kalu tu nafsu birahi so kuasai pa dorang, dorang mo kaweng ulang. Dorang so se tinggal pa Kristus,

¹²sampe dorang so nyanda ada waktu lei mo beking tu dong pe janji dulu for mo layani tu jemaat. So itu Tuhan Allah mo hukum pa dorang.

¹³Kong lei kalu jemaat kase maso di daftar tu janda-janda yang blum sampe anam pulu taong, dorang itu cuma mo maso kaluar orang pe ruma kong mo jadi pangmalas. Kong bukang cuma itu lei, dorang bacirita tu orang pe busu, dorang maso campur tu orang laeng pe urusan deng lei bacirita tu hal-hal yang nyanda pantas.

¹⁴So itu kita suka tu janda-janda yang masi muda supaya dorang kaweng ulang. Kalu dorang kaweng ulang, dong bole dapa anak kong urus tu dong pe ruma tangga sandiri. Deng bagitu tu setang pe bos nyanda ada kesempatan mo pake orang for mo se besae torang yang percaya pe nama.

¹⁵Soalnya ada bebrapa janda muda yang so nyanda iko pa Kristus lei, dorang cuma da iko tu setang pe bos pe mau.

¹⁶Kalu ada satu parampuang yang percaya pa Tuhan tu de pe anggota kluarga ada yang so janda, dia yang musti bantu pa tu janda itu supaya nyanda jadi jemaat pe tanggongan. Deng bagitu jemaat komang bole mo bantu tu janda-janda laeng yang memang so nyanda ada sapa-sapa tu mo bantu pa dorang.

¹⁷Tu pemimpin-pemimpin jemaat yang da beking dong pe tugas deng bae, dorang itu musti dapa gaji dua kali lipa, itu tu tanda hormat pa dorang. Lebe-lebe lei for pemimpin yang rajin ja kase tau tu Tuhan pe firman deng mangajar pa jemaat.

¹⁸Kita bilang bagitu lantaran di Kitab Suci da tulis bagini, “Kalu sapi da bakarja kras for torang[3], torang nimbole ika de pe mulu, biar jo tu sapi itu pe mulu nyanda taika supaya dia bole makang.” Kong ada lei tu da tulis bagini, “Sapa yang da bakarja, dia itu pantas dapa gaji.”

¹⁹Kalu ada orang yang batudu pa pemimpin jemaat, ngana jang trima tu tuduhan itu. Mar kalu ada dua ato tiga saksi yang beking kuat tu tuduhan, itu baru ngana bole trima tu tuduhan kong urus pa dia.

²⁰Kalu dia memang da beking dosa, ngana musti togor pa dia di muka pa samua anggota jemaat supaya tu anggota jemaat yang laeng jadi tako mo beking dosa.

²¹Timotius, kita kase tu tugas ini pa ngana di muka pa Tuhan Allah, Kristus Yesus deng malaekat-malaekat yang Tuhan Allah so pili. Kita minta pa ngana supaya beking samua tu kita da bilang ini di jemaat. Ngana musti beking tu samua ini pa samua orang deng cara nyanda bapili-pili orang deng nyanda brat sabla.

²²Ngana jang talalu capat taru tangan pa orang for mo lantik pa dia jadi pemimpin jemaat. Kalu ada orang yang beking dosa, ngana jang taiko-iko beking dosa sama deng dorang. Ngana musti jaga supaya ngana pe hidop tetap bersi di muka pa Tuhan.

²³Timotius, ngana ja dapa saki puru deng panyaki-panyaki laeng. Jadi ngana jang cuma ja minum aer puti, mar minum lei anggor sadiki for se bae tu ngana pe saki puru deng ngana pe panyaki laeng.

²⁴Ada bebrapa orang yang beking dosa, kong itu dapa tau skali. Biar Tuhan tare blum adili pa dorang, samua orang so tau tu dong pe dosa. Mar komang tu laeng so beking dosa, cuma blum dapa tau. Dorang pe dosa itu nanti mo dapa tau brikut.

²⁵Bagitu lei ada orang yang beking tu bae, kong itu dapa tau skali. Mar ada lei yang da beking tu bae nyanda dapa tau, kong nanti mo dapa tau brikut.