Read Malay, Manado 1 Timotius 6 Bible Online

1 Timotius 6 - Malay, Manado bible

1 Timotius 6

¹Tu budak-budak yang percaya pa Yesus, dorang itu musti ja hormat tu dong pe tuang. Deng bagitu, tu orang-orang yang nyanda percaya pa Yesus nyanda mo dapa alasan for mo se besae Tuhan Allah pe nama deng lei tu tong pe ajaran.

²Kong tu budak-budak yang dong pe tuang lei percaya pa Yesus, dorang nimbole pandang enteng pa dong pe tuang lantaran dorang deng dong pe tuang itu sama-sama percaya pa Yesus. Malatare dorang musti ja layani deng bae skali lebe dari biasa pa dong pe tuang, lantaran dorang pe tuang lei sama-sama percaya pa Yesus kong dorang sayang tu dong pe tuang. Timotius, ngana musti kase ajar deng kase nasehat tu samua ini pa jemaat.

³Sapa yang kase ajar tu ajaran yang laeng kong anggap sala tu ajaran dari torang pe Tuhan Yesus Kristus deng tu torang pe ajaran for ja beking Tuhan Allah pe mau,

⁴so dia tu orang yang stel tau padahal dia nintau apa-apa. Dia pe pikiran nyanda sehat lantaran dia cuma suka ja baku ambe pendapat tentang arti dari kata-kata. Kong tu baku ambe rupa itu beking orang jadi bagini: pangmangiri, ja bakalae, ja se besae orang laeng pe nama deng curiga pa orang laeng,

⁵ja baku ambe, so nyanda ja bapikir tu bae, deng lei so nintau tu ajaran yang butul. Dia kira kalu dia ja beking Tuhan Allah pe mau, dia bole mo dapa untung yang basar.

⁶Sebenarnya kalu orang butul-butul ja beking Tuhan Allah pe mau, trus dia lei rasa puas deng apa yang ada pa dia, dia so dapa untung yang basar.

⁷Soalnya waktu torang lahir di dunia ini, torang nyanda bawa apa-apa. Bagitu lei kalu torang so mati, torang nyanda mo bawa apa-apa.

⁸So itu, kalu torang so ada cukup makanan deng baju, torang mustinya so puas deng apa tu ada pa torang itu.

⁹Mar tu orang-orang yang suka mo jadi kaya, dorang itu gampang tagoda for beking dosa, lantaran dorang pe nafsu so kuasai pa dorang. Dorang pe nafsu itu nyanda ada de pe guna, cuma mo beking dorang mendrita. De pe laste orang-orang yang suka skali mo jadi kaya tagoda sampe beking dosa, kong dorang beking dong pe diri sandiri cilaka deng ancor brantakan, itu sama deng da taprangkap.

¹⁰Soalnya kalu orang gila doi, dari situ muncul macam-macam kejahatan. Dorang itu brusaha skali mo jadi kaya, kong ada dari pa dorang itu yang so nyanda lei percaya pa Yesus. Kong de pe laste, dorang dapa banya pendritaan yang beking dong pe hati saki.

¹¹Mar ngana Timotius, ngana itu Tuhan Allah pe orang. Ngana musti bajao dari samua hal yang jaha itu. Ngana musti brusaha beking bagini: beking tu butul di muka pa Tuhan, beking Tuhan Allah pe mau, lebe percaya pa Tuhan, sayang pa orang laeng, tetap batahang percaya biar dapa macam-macam siksa, kong babae-bae pa orang laeng.

¹²Ngana musti brusaha trus percaya pa Tuhan, sama deng orang yang iko pertandingan da brusaha for mo dapa tu piala. Ngana pegang trus tu ngana pe hidop kekal, lantaran Tuhan so pangge pa ngana for dapa tu hidop kekal itu. Waktu Tuhan da pangge pa ngana, ngana da bilang deng sunggu-sunggu di muka banya orang kalu ngana percaya pa Yesus Kristus.

¹³Skarang di muka pa Tuhan Allah yang beking samua jadi hidop, deng di muka lei pa Kristus Yesus yang da bilang tu kesaksian yang bae di muka gubernur Pilatus, kita suru pa ngana,

¹⁴ngana musti iko bae-bae tu prenta yang ngana so trima deng jang langgar apa-apa dari tu prenta itu supaya nyanda ada orang yang mo se sala pa ngana. Ngana beking bagitu sampe tu waktu Tuhan Yesus Kristus datang ulang.

¹⁵Tuhan Allah sandiri yang so tentukan tu waktu for Tuhan Yesus mo datang ulang. Tuhan Allah itu tu satu-satunya Penguasa, kong pantas mo dapa puji. So Dia no tu Raja dari samua raja yang ada, deng Tuhan dari samua tuhan yang orang puji.

¹⁶Dia itu satu-satunya yang nyanda perna mo mati. Dia tinggal di trang, kong orang nimbole mo badekat di trang itu. Kong nyanda ada orang yang so perna lia pa Dia deng memang nyanda ada orang tu bole mo lia pa Dia. Samua hormat for Dia. Samua kuasa ada pa Dia sampe slama-lamanya. Amin.

¹⁷Ngana musti kase inga pa orang-orang kaya di dunia ini, supaya dorang jang sombong deng jang hidop bagantong pa dorang pe harta. Harta di dunia ini, hari ini ada kong eso bole abis. Dorang itu musti hidop bagantong pa Tuhan Allah. Dia yang da kase samua pa torang deng talebe-lebe supaya torang bole mo rasa akang samua itu.

¹⁸Kase inga pa tu orang-orang kaya itu supaya dorang ja beking tu bae. Dorang musti suka bakase pa orang-orang kong ja bakase lei banya.

¹⁹Deng dorang beking bagitu, dorang so ada satu fondasi yang kuat di sorga, kong deng fondasi itu dorang bole mo dapa tu hidop sebenarnya yang sama-sama deng Tuhan.

²⁰Timotius, ngana musti jaga bae-bae samua tu Tuhan so se percaya for ngana mo beking. Ngana jang bacirita tu nyanda ada guna deng nyanda hormat pa Tuhan Allah. Kong lei ngana jang baku ambe pendapat tentang tu hal-hal yang orang ja bilang “pengetahuan” padahal itu bukang pengetahuan, itu dorang cuma baku ambe tentang kata-kata.

²¹Ada bebrapa orang yang iko tu ajaran yang dong ja bilang “pengetahuan,” so itu dorang so nyanda percaya lei pa Yesus. Kita minta pa Tuhan supaya se tunjung tu De pe bae pa ngoni.