Read Malay, Manado 2 Timotius 1 Bible Online

2 Timotius 1 - Malay, Manado bible

2 Timotius 1

¹Ni surat dari kita, Paulus. Kita ini Kristus Yesus pe rasul tu Dia pe utusan lantaran Tuhan Allah pe mau. Tuhan Allah da pili pa kita for kase tau tu Dia pe janji, kalu orang percaya pa Kristus Yesus, dia mo hidop slama-lamanya deng Tuhan.

²Timotius yang bae, ni surat for ngana. Kita sayang pa ngana, ngana ini kita so anggap kita pe anak. Kita minta supaya Allah Bapa deng Kristus Yesus tu torang pe Tuhan se tunjung tu bae for ngana, se tunjung tu rasa kasiang for ngana deng lei beking ngana hidop deng hati tenang.

³Siang deng malam kita ja basombayang bilang makase pa Tuhan Allah lantaran ngana. Kita bilang makase pa Tuhan Allah yang kita ja layani deng hati yang bersi sama deng kita pe nene moyang da beking dulu.

⁴Kalu kita inga tu tempo hari ngana da manangis waktu torang dua mo baku pisa, kita suka mo baku dapa ulang deng ngana supaya kita jadi snang.

⁵Kita lei inga kalu ngana butul-butul percaya pa Tuhan. Tu ngana pe percaya itu sama deng tu percaya yang so ada lebe dulu pa ngana pe oma Lois deng ngana pe mama Eunike.

⁶So itu kita kase inga supaya ngana tetap smangat pake tu karunia yang Tuhan Allah so kase pa ngana. Tu karunia itu yang ngana da dapa tempo hari dari Tuhan Allah waktu kita da taru tangan pa ngana, supaya ngana mampu beking tu tugas yang Tuhan da kase pa ngana.

⁷Soalnya Tuhan Allah nyanda kase roh panako pa torang, mar Dia kase roh yang beking torang pe hati jadi kuat, torang bole basayang pa orang laeng deng lei beking torang bole kuasai tong pe diri.

⁸Jadi ngana jang malo basaksi tentang torang pe Tuhan. Ngana lei jang malo lantaran kita tu ngana pe tamang ada di bui, soalnya kita ada di bui lantaran ja layani pa Tuhan. Ngana lei musti siap-siap dapa siksa sama deng kita lantaran torang ja kase tau tu Kabar Bae tentang Dia, kong Tuhan Allah mo kase kuat pa ngana for beking itu.

⁹Tuhan Allah yang so se slamat pa torang deng pangge pa torang supaya hidop deng hati yang bersi. Dia beking itu samua bukang lantaran torang ja beking tu bae, mar lantaran Dia pe rencana dari dulu deng Dia se tunjung tu Dia pe sayang pa manusia. Memang dari dulu waktu Tuhan Allah blum beking ni dunia, Dia so rencana kase tunjung tu De pe sayang pa manusia lewat Kristus Yesus.

¹⁰Kong skarang, Tuhan Allah so se tunjung Dia pe sayang pa torang deng cara Dia kase pa torang Kristus Yesus, tu torang pe Juruslamat. Kong lewat tu Kabar Bae tentang Yesus, torang bole tau kalu Dia so se kala tu maut sampe tu maut nyanda ada kuasa pa torang, deng lei kase hidop kekal pa torang.

¹¹Tuhan Allah da pili pa kita for se tau tu Kabar Bae tentang Yesus pa orang-orang. Dia pili pa kita jadi rasul deng jadi guru.

¹²Kita da beking kita pe tugas itu, so itu kita dapa siksa rupa ini. Mar biar lei bagitu, kita nyanda malo. Soalnya kita kanal Tuhan yang kita percaya, deng kita yakin kalu Dia ada kuasa for jaga tu tugas yang Dia so kase percaya pa kita sampe nanti hari kiamat, tu hari Tuhan mo adili pa samua orang.

¹³Jadi iko jo tu ajaran yang ngana da dengar dari pa kita. Tu ajaran itu butul deng bole jadi conto for ngana se ajar pa orang laeng. Ngana percaya jo trus pa Kristus Yesus deng sayang pa samua orang lantaran ngana so hidop satu deng Kristus Yesus.

¹⁴Jaga jo tu harta yang berharga yang Tuhan so se percaya pa torang. Roh Kudus yang ada pa torang pe hati mo bantu jaga tu harta itu.

¹⁵Timotius, tantu ngana so tau kalu tu Figelus deng Hermogenes, deng lei tu samua orang yang ada di daera Asia da bale blakang akang pa kita.

¹⁶Mar cuma Onesiforus yang nyanda bagitu. Kita minta supaya Tuhan se tunjung De pe rasa kasiang pa Onesiforus deng de pe kluarga. Soalnya dia banya kali hibur pa kita, dia lei nyanda malo ja datang pa kita biar lei kita ada di bui.

¹⁷Waktu Onesiforus datang ka Roma, dia da brusaha cari pa kita sampe dia baku dapa deng kita.

¹⁸Ngana lei tau butul kalu tempo hari dia so banya kali da bantu pa kita di Efesus itu. Kita minta pa Tuhan supaya nanti di hari kiamat, tu hari Tuhan mo adili pa orang-orang, Tuhan se tunjung De pe rasa kasiang pa Onesiforus.