Read Malay, Manado 2 Timotius 3 Bible Online

2 Timotius 3 - Malay, Manado bible

2 Timotius 3

¹Timotius, ngana musti tau, kalu nanti waktu so mo kiamat, mo ada tu hari-hari yang pe siksa skali.

²Kong di hari-hari itu, orang-orang cuma mo sayang dorang pe diri sandiri deng gila doi. Dorang suka bicara tinggi deng sombong. Dorang suka bicara jaha tentang orang laeng, malawang pa dong pe orang tua, nimau bilang makase kong nyanda farduli tentang Tuhan.

³Dorang nintau basayang pa orang laeng, nimau baku-baku bae deng orang, suka se besae orang pe nama, nyanda mampu tahang diri, jaha skali, nimau tu bae,

⁴suka bahianat, nyanda ja pikir panjang, stel tau deng lebe suka iko dong pe nafsu yang besae daripada iko Tuhan Allah pe mau.

⁵Kalu cuma mo lia, dorang itu ja beking Tuhan Allah pe mau, mar sebenarnya dorang tolak tu Tuhan pe kuasa, jadi nyanda butul dorang da iko pa Tuhan. Bajao jo dari pa dorang itu!

⁶Soalnya bebrapa orang dari pa dorang maso pa orang pe ruma kong ja tipu tu parampuang-parampuang yang gampang tagoda. Tu parampuang-parampuang itu gampang tagoda lantaran dorang rasa bersala skali deng tu dosa yang dorang ja beking deng lei macam-macam nafsu da kuasai pa dorang.

⁷Tu parampuang-parampuang itu slalu suka dapa tu ajaran dari orang laeng, mar dorang nyanda perna tau mana tu ajaran yang butul.

⁸Ngana to masi inga tu cirita Yanes deng Yambres? Dulu dorang dua da malawang pa Musa, itu sama deng skarang tu orang-orang yang ja tipu pa tu parampuang-parampuang, dorang itu lei da malawang tu ajaran yang butul tentang Yesus. Tu orang-orang itu pe pikiran so rusak, dorang pe percaya nyanda butul pa Tuhan.

⁹Mar dorang tu ja batipu itu nyanda mo trus-trus berhasil. Lama-lama orang mo lia deng jelas kalu dorang itu nintau apa-apa, sama deng dulu orang lia kalu tu Yanes deng Yambres lei nintau apa-apa.

¹⁰Mar ngana Timotius, ngana so iko samua tu kita pe ajaran, kita pe cara hidop, kita pe tujuan hidop, kita pe percaya pa Yesus, kita pe sabar, kita pe sayang pa orang, deng biar kita dapa siksa kita tetap beking tu kita pe tugas.

¹¹Ngana lei tau bagimana orang-orang da siksa deng beking susa pa kita di Antiokhia, Ikonium, deng Listra. Biar kita dapa siksa dari orang-orang di situ, mar Tuhan so se lapas pa kita dari samua itu.

¹²Memang samua orang yang percaya pa Kristus Yesus deng hidop iko Dia pe mau mo dapa siksa.

¹³Mar tu orang jaha deng tu ja batipu orang, dorang itu lebe hari lebe tamba jaha. Dorang mo tipu pa orang-orang kong orang laeng mo bale tipu pa dorang.

¹⁴Mar ngana komang Timotius, ngana musti pegang trus tu ajaran yang butul yang ngana so trima, deng yang ngana so butul-butul percaya. Soalnya ngana tau kalu tu orang-orang yang dulu da se ajar pa ngana, ngana bole percaya.

¹⁵Ngana lei musti inga kalu dari kacili, ngana so tau tu Kitab Suci. Tu Kitab Suci beking ngana jadi bijaksana kong ngana bole slamat lantaran percaya pa Kristus Yesus.

¹⁶Samua tu tulisan yang ada di Kitab Suci dari Tuhan Allah. Kong tu tulisan itu de pe guna for: se ajar pa orang, se tunjung tu sala, se roba tu cara hidop deng latih for beking tu butul di muka pa Tuhan.

¹⁷Deng bagitu, tu Kitab Suci beking tu Tuhan Allah pe orang mampu beking samua tu bae.