Read Malay, Manado 2 Timotius 4 Bible Online

2 Timotius 4 - Malay, Manado bible

2 Timotius 4

¹Kristus Yesus nanti mo datang ulang kong Dia mo Berkuasa sbagai Raja. So Dia yang mo adili tu orang-orang yang masi hidop deng yang so mati. So itu skarang di muka pa Tuhan Allah deng Kristus Yesus, kita bilang pa ngana deng sunggu-sunggu supaya ngana

²kase tau tu Tuhan Allah pe firman pa orang-orang. Biar bagimana tu keadaan ngana musti slalu siap ja kase tau trus tu firman pa dorang. Ngana musti kase tau pa dorang kalu beking sala, ngana togor pa dorang supaya brenti beking tu sala, deng lei ngana kase nasehat pa dorang. Kong deng sabar ngana mangajar pa dorang.

³Ngana beking samua itu lantaran nanti ada de pe waktu, orang-orang nimau mo dengar tu ajaran yang butul, malatare dorang mo pangge guru-guru yang dorang suka. Tu guru-guru itu cuma mo bilang pa dorang tu hal-hal yang dorang suka mo dengar.

⁴Dorang nimau mo dengar tu ajaran yang butul, dorang lebe suka mo dengar dongeng-dongeng.

⁵Mar ngana komang Timotius, ngana musti tetap kuasai tu ngana pe diri di samua keadaan. Kalu ngana beking tu ngana pe tugas kong dapa siksa, ngana musti tetap batahang. Ngana ini penginjil tu orang yang ja kase tau tu Kabar Bae pa orang yang blum dengar itu, kong ngana musti beking bae-bae sampe klar tu ngana pe tugas yang Tuhan da kase pa ngana itu.

⁶Tentang kita ini, skarang so mo de pe waktu for kita mo mati. Kita pe hidop skarang sama deng minuman anggor tu da se cura for persembahan pa Tuhan yang so mo abis.

⁷Kita so beking tu kita pe tugas yang bae ini, itu sama deng kita da iko pertandingan deng bae. Kita beking ni tugas deng karja kras sampe klar, sama deng atlit yang da iko lomba lari sampe di finis. Kita beking samua itu deng kita tetap percaya pa Tuhan.

⁸Kalu orang iko lomba kong juara, dia dapa piala. Bagitu lei deng kita, Tuhan so kase sadia piala for kita lantaran kita da beking tu butul di muka pa Dia. Tu piala itu Dia da simpang kong nanti Dia mo kase pa kita di hari Dia mo adili samua orang. Tu piala itu bukang cuma kita yang mo dapa mar samua orang percaya yang da tunggu-tunggu Dia datang ulang ka dunia ini lei. Torang pe Tuhan ini memang Hakim yang adil.

⁹Timotius! Ngana brusaha jo for capat-capat datang pa kita.

¹⁰Soalnya Kreskes so pigi ka Galatia deng Titus so pigi ka Dalmatia. Demas so se tinggal pa kita lantaran dia lebe suka tu hal-hal di dunia ini, so itu dia so brangkat ka Tesalonika.

¹¹Kong cuma Lukas tu da tinggal sama-sama deng kita di sini. Ngana pi ambe jo pa Markus kong ngana bawa jo dia kamari. Soalnya Markus bole bantu pa kita for beking tu kita pe tugas di sini.

¹²Kita so suru pa Tikhikus pigi ka Efesus.

¹³Kalu ngana datang kamari, ngana bawa akang tu kita pe juba yang kita da se tinggal pa Karpus pe ruma di Troas. Bawa akang lei tu kita pe kitab-kitab, lebe kusus tu kitab yang da beking dari kuli binatang.

¹⁴Aleksander tu orang yang ja beking barang dari tembaga, dia so banya beking tu hal jaha pa kita. Nanti Tuhan mo hukum pa dia iko tu dia da beking.

¹⁵Dia malawang skali tu ajaran yang torang da se ajar. So itu ngana lei musti hati-hati pa dia.

¹⁶Waktu pertama kali kita babela diri di pengadilan, nyanda ada orang yang sama-sama deng kita di situ, samua orang se tinggal pa kita. Cuma kita minta pa Tuhan supaya Dia nyanda hukum pa dorang.

¹⁷Mar biar dorang se tinggal pa kita, Tuhan tetap da sama-sama deng kita. Dia se kuat pa kita supaya kita bole se tau samua tu Kabar Bae tentang Yesus pa samua orang yang bukang Yahudi. Deng bagitu Tuhan se slamat pa kita dari bahaya kematian, sama deng kita da talapas dari mulu singa.

¹⁸Tuhan lei mo se lapas pa kita dari samua orang pe rencana jaha yang mo beking kita cilaka. Dia mo bawa pa kita ka sorga, tu tampa Dia Berkuasa sbagai Raja. Mari jo puji deng hormat pa Dia for slama-lamanya! Amin.

¹⁹Timotius, nanti bilang akang kita pe salam for Priska, Akwila deng for Onesiforus pe kluarga.

²⁰Erastus masi da tinggal di Korintus, kong tu Trofimus terpaksa kita se tinggal di Miletus lantaran dia da saki.

²¹Kong ngana brusaha jo for datang kamari seblum oras dingin. Ebulus da titip salam for ngana, sama-sama deng Pudes, Linus, Klaudia deng lei banya sudara yang percaya da titip salam for ngana.

²²Kita minta supaya Tuhan sama-sama deng ngana deng se tunjung Dia pe bae pa ngoni samua.