Read Malay, Manado Titus 1 Bible Online

Titus 1 - Malay, Manado bible

Titus 1

¹Ni surat dari kita, Paulus. Kita ini ja beking tu Tuhan Allah da suru pa kita, deng kita ini Kristus Yesus pe rasul tu Dia pe utusan. Kita da dapa suru for kase ajar tu orang-orang yang Tuhan Allah so pili supaya dorang pe iman tatamba kuat, deng supaya dorang bole tau tu ajaran yang butul tu bole mo se tunjung pa dorang for hidop iko Tuhan pe mau.

²Kita se ajar bagitu pa tu orang percaya, supaya dorang bole baharap deng yakin mo dapa tu hidop kekal. Tuhan Allah so bajanji lebe dulu seblum Dia beking ni dunia kalu Dia mo kase tu hidop kekal. Dia pe janji itu pasti mo jadi lantaran Dia nyanda perna badusta.

³Kong pas de pe waktu yang Tuhan Allah so tentukan, Dia kase tunjung pa torang tu jalang for dapa hidop kekal. Dia se percaya pa kita for kase tau tu Kabar Bae itu, kong kita kase tau iko tu Tuhan Allah pe prenta, Tuhan Allah tu torang pe Juruslamat.

⁴Titus, torang dua sama-sama percaya pa Kristus Yesus, ngana kita so anggap kita pe anak sandiri. Kita minta supaya Allah Bapa deng Kristus Yesus tu torang pe Juruslamat slalu kase tunjung tu bae pa ngana deng lei slalu beking ngana bole hidop deng hati tenang.

⁵Tempo hari, kita da se tinggal pa ngana di pulau Kreta supaya ngana bole ator bebrapa hal yang masi perlu mo ator di jemaat. Ngana lei mo lantik pemimpin-pemimpin jemaat di tiap kota di pulau itu sama deng tu kita so bilang pa ngana.

⁶Tu orang yang mo jadi pemimpin, dia itu musti bagini: dia itu orang yang hidop lurus deng cuma ada satu bini. Trus de pe anak-anak lei percaya pa Tuhan, deng bagitu orang nyanda mo bilang kalu tu de pe anak-anak itu begal ato pangmalawang.

⁷Tu pemimpin jemaat ja ator tu Tuhan Allah pe jemaat, so itu dia musti orang yang nyanda beking sala sampe nyanda ada yang mo se sala pa dia. Dia nyanda sombong, nyanda pangmara, nyanda pangmabo, nyanda ja beking kekrasan deng nyanda gila doi.

⁸Mar dia itu musti orang yang suka trima orang laeng pa de pe ruma, suka tu bae, bijaksana, adil, hidop bersi di muka pa Tuhan deng mampu tahang diri.

⁹Dia itu lei musti orang yang iko butul-butul tu ajaran yang butul, tu ajaran yang so se ajar pa dia. Deng bagitu, dia mampu kase smangat pa orang pake tu ajaran yang butul itu, deng lei dia mampu se tre tu pikiran dari orang-orang yang malawang tu ajaran itu.

¹⁰Soalnya so banya orang yang ja malawang tu ajaran yang butul. Dorang beking sesat pa orang-orang pake cirita yang nyanda ada de pe guna. Di antara pa dorang itu, ada tu orang Yahudi tu so percaya pa Yesus, yang kase ajar kalu samua orang musti dapa sunat baru butul-butul iko pa Yesus.

¹¹Ngana musti suru badiam tu orang-orang bagitu, supaya dorang nyanda lei se ajar tu nyanda-nyanda. Soalnya dorang so beking kacau banya kluarga deng dong pe ajaran itu, tu ajaran yang cuma mo tipu orang supaya dorang bole dapa doi.

¹²Di antara tu orang-orang Kreta, ada tu dorang pe nabi yang perna da babilang bagini, “Memang orang-orang Kreta pangbadusta, sama deng binatang buas, rakus deng pangmalas.”

¹³Tu nabi da bilang itu memang butul. So itu ngana musti togor deng tegas pa dorang supaya dorang percaya tu ajaran yang butul.

¹⁴Ngana larang pa dorang badengar tu orang Yahudi pe dongeng-dongeng deng nyanda mo iko tu atoran-atoran dari orang-orang yang nyanda trima tu ajaran yang butul.

¹⁵Orang-orang yang dong pe hati bersi di muka pa Tuhan, dorang bole beking samua. Mar for orang-orang yang dong pe hati kotor di muka pa Tuhan kong nyanda percaya pa Tuhan, samua yang dong beking itu najis lantaran dorang itu pe hati deng pikiran so kotor.

¹⁶Dorang bilang kalu dorang kanal pa Tuhan Allah, mar kalu mo lia tu dorang pe cara hidop, dorang sama deng tu orang yang nyanda kanal pa Tuhan Allah. Orang-orang rupa dorang ini tu paling jaha, nimau beking tu Tuhan Allah da prenta deng nyanda mampu beking tu bae.