Read Malay, Manado Titus 3 Bible Online

Titus 3 - Malay, Manado bible

Titus 3

¹Titus, ngana musti kase inga akang pa orang-orang percaya supaya dorang ja badengar deng iko akang tu atoran dari pemerenta deng orang-orang yang pegang kuasa. Dorang musti slalu siap beking tu hal-hal yang bae.

²Dorang lei nimbole se besae orang laeng pe nama deng nimbole baku ambe. Malatare dorang musti bae-bae pa samua orang deng nyanda sombong.

³Dulu waktu torang blum percaya, torang nyanda mangarti apa-apa. Waktu itu torang nyanda ja iko Tuhan Allah pe mau, torang tapengaru beking tu hal-hal yang jaha, torang jadi budak dari nafsu deng keinginan yang cuma for se snang diri sandiri. Torang hidop bamangiri pa orang laeng, torang jaha pa orang deng torang lei ja baku binci.

⁴Mar biar lei bagitu, Tuhan Allah tu torang pe Juruslamat, Dia so se tunjung Dia pe bae deng Dia pe sayang pa samua orang.

⁵Tuhan se slamat pa torang bukang lantaran torang da beking tu butul di muka pa Dia, mar lantaran Dia se tunjung tu Dia pe rasa kasiang pa torang. Dia beking bersi pa torang dari tong pe dosa-dosa, Dia pake tu Roh Kudus for beking torang pe hidop jadi baru, sama deng torang da lahir ulang.

⁶Tuhan so kase talebe-lebe Dia pe Roh pa torang lewat Yesus Kristus tu torang pe Juruslamat.

⁷Dia se tunjung Dia pe sayang pa torang supaya torang bole jadi butul di muka pa Dia, kong deng bagitu torang ada hak for mo trima tu hidop kekal sama deng apa yang torang da harap deng yakin mo dapa.

⁸Samua tu kita da bilang ini butul, kong bagus deng ada de pe guna for samua orang. Kita suka ngana bilang tu ajaran itu deng tegas pa samua orang yang percaya pa Tuhan Allah, supaya dorang brusaha butul-butul beking tu hal-hal yang bae.

⁹Ngana jang iko baku ambe pendapat tentang hal-hal yang nyanda ada de pe guna deng tentang daftar keturunan dari ngoni pe nene moyang. Ngana lei nimbole baku ambe pendapat kong bakalae tentang tu atoran-atoran di kitab Taurat. Soalnya samua itu percuma deng nyanda ada de pe guna.

¹⁰Kalu ada orang yang beking orang-orang di jemaat jadi tapisa-pisa, ngana musti kase pringatan pa dia. Kalu ngana so kase pringatan pa dia sampe dua kali kong dia nyanda badengar, ngana jang bergaul lei deng dia.

¹¹Soalnya ngana tau kalu tu orang rupa itu pe pikiran memang so nyanda lei iko tu butul. Dia pe dosa sandiri se tunjung kalu dia sala kong dia pe dosa-dosa da hukum de pe diri sandiri.

¹²Titus, nanti kita mo suru pa Artemas ato Tikhikus pigi pa ngana. Kalu dia sampe, ngana brusaha jo iko datang pa kita di Nikopolis. Soalnya kita ambe keputusan for mo tinggal di situ slama oras dingin ini.

¹³Ngana lei brusaha jo tolong pa Zenas tu ahli hukum deng pa Apolos supaya dorang nyanda mo kekurangan apa-apa pa dorang pe perjalanan.

¹⁴Kong torang pe orang-orang musti blajar ja beking tu bae supaya bole mo bantu orang laeng dapa tu keperluan hari-hari, deng bagitu dorang pe hidop mo ada de pe guna.

¹⁵Titus, samua orang yang da sama-sama deng kita di sini da kirim salam pa ngana. Kong tolong bilang akang kita pe salam for torang pe tamang-tamang yang sayang pa torang, tu sama-sama percaya pa Yesus. Kita minta Tuhan se tunjung Dia pe bae pa ngoni samua.