Read Malay, Manado Ibrani 12 Bible Online

Ibrani 12 - Malay, Manado bible

Ibrani 12

¹Sudara-sudara, tu orang-orang dulu yang hidop deng iman jadi saksi for torang supaya torang pe iman bole jadi kuat, so itu biar dorang so mati, dorang bole mo se sama deng da badiri bakliling akang pa torang. Jadi brusaha jo for buang samua beban deng se lapas jo tu dosa-dosa yang masi jadi penghalang for torang, kong brusaha trus batahang deng torang pe iman, itu sama deng torang da brusaha trus batahang waktu iko lomba yang torang musti iko akang.

²Mari jo torang cuma lia pa Yesus, Dia yang da buka akang jalang for torang bole ada iman, Dia yang da beking tu torang pe iman itu jadi sempurna. Dia itu batahang waktu dapa siksa di kayu salib sampe Dia mati, Dia nyanda farduli waktu dapa hina di kayu salib lantaran Dia tau kalu abis itu nanti Dia mo snang skali. Kong skarang Dia so dudu di tampa terhormat di sabla kanan pa Tuhan Allah di sorga.

³Co ngoni pikir jo bae-bae tentang tu waktu Yesus sandiri da batahang tanggong tu siksa waktu mangada tu orang-orang yang berdosa, Dia tanggong samua itu supaya ngoni pe iman mo tetap kuat deng ngoni nyanda mo putus asa.

⁴Ngoni perna malawang tu godaan for beking dosa, mar waktu ngoni malawang itu, ngoni blum sampe dapa siksa sampe musti mati tacura dara.

⁵Apa ngoni so lupa tu Tuhan pe nasehat? Dia babicara sama deng da babicara pa Dia pe anak-anak, “Kita pe anak-anak, ngoni jang pandang enteng Tuhan pe ajaran! Ngoni jang putus asa kalu Dia togor.

⁶Soalnya Tuhan togor tu orang-orang yang Dia sayang, deng Dia kase hukuman for se ajar tu orang-orang yang Dia so anggap Dia pe anak-anak.”

⁷Tu siksa yang ngoni da dapa itu sama deng Tuhan Allah da togor pa ngoni, Dia beking ngoni ini sama deng Dia pe anak-anak. Soalnya apa ada anak yang nyanda perna dapa togor dari de pe papa?

⁸Mar kalu misalnya ngoni nyanda dapa togor rupa tu samua Tuhan pe anak-anak biasa ja dapa, itu de pe arti ngoni itu bukang butul-butul Tuhan pe anak.

⁹Torang ada papa di dunia kong tu torang pe papa itu ja togor pa torang, kong torang hormat pa tu tong pe papa itu. No kalu bagitu, torang lei musti lebe dengar-dengaran pa torang pe Bapa di sorga waktu Dia togor pa torang, supaya torang bole dapa tu hidop kekal.

¹⁰Tu torang pe papa di dunia, dorang ja togor pa torang cuma di waktu yang nyanda lama. Tu dorang pe tegoran itu iko apa tu dorang anggap butul. Mar Bapa di sorga, waktu Dia togor pa torang, itu supaya torang bole jadi lebe bagus deng lei supaya torang bole jadi kudus sama deng Dia itu kudus.

¹¹Memang tiap kali torang dapa togor, torang pe hati bukang jadi snang mar torang pe hati jadi sedi. Mar abis torang dapa togor, de pe hasil dari da dapa togor itu: torang jadi orang yang ja beking tu butul deng lei torang hidop deng hati tenang.

¹²So itu se kuat jo tu ngoni pe iman, itu sama deng ngoni se kuat tu ngoni pe tangan deng lutut yang lemah.

¹³Kong ngoni hidop lurus jo iko pa Tuhan, kong orang laeng yang kurang percaya pa Tuhan bole mo iko tu ngoni pe cara hidop yang lurus itu trus dorang pe iman bole jadi kuat, itu sama deng ngoni da bajalang di jalang yang lurus supaya tu orang yang de pe kaki kento yang mo iko pa ngoni nyanda mo tasala mar mo jadi bae.

¹⁴Ngoni brusaha jo for hidop baku-baku bae deng samua orang deng brusaha lei for hidop deng hati yang bersi di muka pa Tuhan. Kalu orang nyanda hidop deng hati yang bersi di muka pa Tuhan, tu orang itu nanti nyanda mo lia pa Tuhan.

¹⁵Hati-hati jo ngoni, jang sampe ada dari pa ngoni yang brenti percaya sampe nyanda rasa lei tu Tuhan Allah pe bae, supaya nyanda ada orang yang kase pengaru jaha yang beking tu orang percaya jadi kacau kong pengaruhi lebe banya orang. Tu orang yang kase pengaru jaha itu bole mo se sama deng tu tanaman baracun yang beking rusak tu tanaman laeng.

¹⁶Jangan ada dari pa ngoni yang hidop ja beking tu hal-hal cabul ato nyanda hargai tu dia pe hak sbagai anak yang tua yang Tuhan da kase pa dia sama deng Esau yang da tukar deng satu piring makanan tu dia pe hak itu.

¹⁷Ngoni so tau waktu dia mo trima tu berkat sbagai anak yang tua, dia pe papa nyanda mo kase itu pa dia. Soalnya dia so nyanda dapa kesempatan lei for mo bertobat dari tu sala yang dia da beking, biar lei dia cari jalang for beking butul itu deng mamanangis.

¹⁸Sudara-sudara, dulu Tuhan babicara deng bangsa Israel di gunung Sinai, tu gunung yang bole mo sontong. Di situ dapa lia api yang bamanyala-manyala, tatutu deng tu glap, deng ada lei angin kancang da batiop. Mar ngoni so nyanda sama deng bangsa Israel yang dulu musti pigi ka gunung Sinai.

¹⁹Dorang dengar bunyi dari trompet yang pe kras, deng Tuhan pe suara yang pe kuat da babicara pa dorang. Waktu dorang dengar tu suara itu, dorang jadi tako kong dorang bamohon supaya tu suara itu jang lei babicara pa dorang.

²⁰Soalnya dorang nyanda tahang da dengar tu prenta yang suara itu da se tau bagini, “Samua yang da sontong ni gunung ini, biar lei itu cuma binatang, musti dapa lempar deng batu sampe mati.”

²¹Tu orang-orang Israel pe tako skali waktu da mangada itu, sampe Musa babilang, “Kita tako skali sampe totofore.”

²²Mar ngoni sudara-sudara, ngoni so datang ka Bukit Sion tu kota dari Tuhan Allah yang hidop, tu Yerusalem yang ada di sorga deng ngoni datang pa tu ribuan malaekat yang da bakumpul deng basnang-snang.

²³Ngoni itu datang pa tu kumpulan dari tu orang-orang yang pertama[3] da jadi Tuhan pe anak-anak, dorang itu pe nama-nama yang so tatulis di sorga. Ngoni lei datang pa Tuhan Allah, tu Hakim yang mo adili pa samua orang. Kong ngoni lei datang pa tu orang-orang yang so mati dari dulu, tu orang-orang yang waktu dorang hidop ja beking tu butul di muka pa Tuhan kong Tuhan so beking jadi sempurna.

²⁴Ngoni datang lei pa Yesus, tu Prantara dari tu perjanjian yang baru antara Tuhan Allah deng manusia. Yesus mati, kong Dia pe dara yang da tacura itu lebe bae dari tu Habel pe dara yang da tacura dulu, lantaran tu Habel pe dara se tunjung supaya orang dapa hukum, mar Yesus pe dara se tunjung supaya orang dapa ampung dari dosa.

²⁵Ngoni dengar bae-bae pa Tuhan Allah yang da babicara pa ngoni, jang ngoni tolak pa Dia. Soalnya dulu tu orang-orang Israel nyanda farduli tu Tuhan pe kata-kata yang Musa da se tau pa dorang di dunia ini, kong dorang itu da dapa hukuman. Apa lei nanti deng torang, torang pasti nyanda mo lolos dari hukuman kalu torang nimau mo badengar tu Tuhan pe kata-kata yang langsung dari sorga.

²⁶Dulu di jaman Musa, waktu Tuhan Allah babicara dari gunung Sinai, Dia pe suara pe kuat skali sampe beking tu bumi tagoyang. Mar skarang, ada tu janji yang Dia da bilang, “Nanti satu kali lei Kita mo se goyang bukang cuma ni bumi, mar deng tu langit lei.”

²⁷Tu “satu kali lei,” itu de pe arti samua yang Tuhan Allah da beking di bumi ini mo dapa se goyang deng mo ancor, trus tu laeng yang nyanda dapa se goyang yang mo tatinggal.

²⁸Jadi sudara-sudara, torang bilang makase pa Tuhan Allah lantaran torang ini so jadi orang-orang dari Tuhan Allah yang Berkuasa sbagai Raja di krajaan yang nyanda perna mo tagoyang. Mari jo torang semba pa Dia iko tu cara yang beking snang pa Dia, torang semba pa Dia deng rasa tako deng hormat pa Dia.

²⁹Soalnya Tuhan Allah yang torang ja semba, Dia itu sama deng api yang se angus samua.