Read Malay, Manado Ibrani 13 Bible Online

Ibrani 13 - Malay, Manado bible

Ibrani 13

¹Sudara-sudara, ngoni tetap jo baku-baku sayang sbagai orang-orang yang percaya pa Tuhan.

²Ngoni trima jo pa ngoni pe ruma tu orang-orang yang ngoni blum kanal. Soalnya deng beking bagitu, ada bebrapa orang yang nyanda sangka-sangka da trima malaekat-malaekat pa dong pe ruma.

³Ngoni inga jo tu orang-orang yang ada di bui, sama deng ngoni lei ada di bui sama-sama deng dorang. Ngoni inga lei tu orang yang dapa siksa, sama deng ngoni lei da rasa tu siksa itu.

⁴Samua orang musti hormat tu perkawinan. Tu laki bini itu musti setia satu deng laeng, nimbole ada hubungan seks deng orang laeng. Soalnya tu orang-orang yang baseks bebas ato yang da bersina, nanti dorang itu mo dapa hukuman dari Tuhan Allah.

⁵Ngoni lei jang jadi orang yang gila doi, mar lebe bae ngoni puas deng apa yang ada pa ngoni. Soalnya Tuhan Allah da bilang bagini, “Kita nyanda perna mo se biar pa ngana, deng Kita nyanda perna mo se tinggal pa ngana.”

⁶So lantaran tu Tuhan da bilang itu, torang bole yakin kong babilang, “Tuhan itu kita pe Penolong. Kita nyanda mo tako apa-apa, apa yang manusia bole mo beking pa kita?”

⁷Inga jo tu ngoni pe pemimpin-pemimpin yang so se tau tu Tuhan Allah pe firman pa ngoni. Tarukira jo bagimana dorang pe cara hidop sampe dorang pe akhir hidop, kong ngoni iko jo tu conto dari dorang pe iman.

⁸Yesus Kristus tetap sama, dari dulu, skarang deng sampe slama-lamanya.

⁹Ngoni jang iko tu macam-macam ajaran yang nyanda butul tu bole mo beking ngoni jadi sesat. Lebe bae beking kuat tu ngoni pe hati lewat tu bae yang Tuhan da se tunjung, jang ngoni iko tu atoran-atoran tentang makanan yang bole mo makang deng nimbole mo makang, lantaran tu atoran itu nyanda ada de pe guna for tu orang yang iko itu.

¹⁰For torang, ada Yesus yang jadi korban persembahan for se hapus torang pe dosa-dosa, Dia jadi sama deng torang pe persembahan yang da se korban di tampa korban persembahan di tenda ibada, mar tu imam-imam yang ja layani di tenda ibada nyanda mo dapa untung apa-apa dari tu korban persembahan itu.

¹¹Soalnya tu binatang-binatang yang dapa potong for korban persembahan, tu dong pe dara tu imam basar da bawa maso ka Ruang Mahasuci sbagai korban for se hapus dosa. Kong tu binatang-binatang pe bangkai da bakar di luar dari tu dorang pe tampa tinggal.

¹²Dorang bakar tu binatang pe bangkai di luar dari dong pe tampa tinggal, bagitu lei no deng Yesus, Dia da mendrita sampe mati di luar dari tu kota Yerusalem for beking kudus tu Dia pe orang-orang deng Dia pe dara.

¹³So lantaran itu, mari jo torang pigi pa Yesus di luar dari tampa tinggal, biar orang mo hina pa torang sama deng Yesus da dapa hina.

¹⁴Soalnya di dunia ini, torang nyanda ada tampa tinggal yang tetap, mar torang baharap skali tu satu kota yang nanti torang mo tinggal akang.

¹⁵So itu, mari jo lewat Yesus torang puji pa Tuhan Allah, itu sama deng torang kase korban persembahan for Dia. Torang puji-puji Dia pe nama, torang mangaku kalu Dia itu torang pe Tuhan.

¹⁶Ngoni nimbole lupa ja beking tu bae deng tolong pa orang. Soalnya kalu ngoni beking bagitu, itu sama jo deng ngoni pe korban persembahan yang beking snang pa Tuhan Allah.

¹⁷Ngoni musti dengar-dengaran pa ngoni pe pemimpin-pemimpin deng musti iko apa tu dorang da prenta. Soalnya dorang yang dapa tugas for jaga tu ngoni pe percaya pa Tuhan, kong dorang sandiri nanti mo tanggong jawab tu dong pe karja sbagai pemimpin pa Tuhan. Ngoni musti dengar-dengaran pa dorang supaya dorang bole bakarja deng hati snang. Mar kalu ngoni nyanda dengar-dengaran pa dorang, dorang pe hati mo jadi susa, kong itu nyanda mo ada untung for ngoni.

¹⁸Torang minta pa ngoni supaya ngoni basombayang akang trus for torang. Soalnya torang yakin kalu torang pe hati butul-butul bersi, torang suka beking apa yang butul di samua hal.

¹⁹Kita minta kusus pa ngoni supaya ngoni basombayang akang for kita, minta pa Tuhan supaya buka akang jalang for kita supaya capat pi babale ulang pa ngoni.

²⁰Tuhan Allah so kase hidop ulang pa Yesus dari tu kematian. Yesus itu torang pe Tuhan, Dia jadi Gembala yang Agung pa torang tu Dia pe domba-domba. Dia pe dara yang da tacura itu yang beking kuat tu perjanjian antara Tuhan Allah deng manusia for slama-lamanya. Kita minta pa Tuhan Allah yang bole beking manusia hidop deng hati tenang,

²¹supaya Dia bantu pa ngoni bole beking samua hal yang bae supaya ngoni bole beking tu Dia pe mau. Kita minta lei supaya lewat Yesus Kristus, Tuhan Allah bole bakarja pa torang pe hati supaya torang bole mo beking apa tu Dia suka. Puji deng hormat jo pa Dia sampe slama-lamanya. Amin.

²²Sudara-sudara, kita minta deng sangat pa ngoni supaya ngoni trima deng bae tu kita pe nasehat-nasehat, biar lei kita pe surat ini cuma pende.

²³Kita suka ngoni tau ini: Timotius, tu torang pe sudara yang percaya so bebas dari bui. Kong kalu dia so datang kamari pa kita, torang dua mo sama-sama pigi pa ngoni.

²⁴Ngoni bilang akang tu torang pe salam pa samua tu ngoni pe pemimpin jemaat deng pa samua tu Tuhan pe orang-orang. Kong tu sudara-sudara yang percaya tu dari Italia da kirim salam lei for ngoni.

²⁵Kita minta pa Tuhan supaya Dia kase tunjung tu Dia pe bae pa ngoni samua.