Read Malay, Manado Ibrani 2 Bible Online

Ibrani 2 - Malay, Manado bible

Ibrani 2

¹Jadi, torang musti lebe pegang kuat tu ajaran yang torang so dengar tentang Yesus, jang sampe torang taiko deng yang laeng kong so jadi nyanda percaya lei.

²Soalnya tu ajaran yang ada di kitab Taurat yang malaekat-malaekat da kase pa torang orang Israel pe nene moyang, itu samua butul. Trus tiap orang yang nyanda iko ato nyanda beking tu ajaran itu, tu orang itu mo dapa hukuman yang pantas iko apa tu dia da beking.

³Bagitu lei deng torang, torang mo dapa hukuman kalu torang nyanda farduli deng tu Kabar Bae yang penting skali itu, tu Kabar Bae yang bole se slamat pa manusia dari tu hukuman dosa. Tuhan Yesus yang pertama tu da kase tau tu ajaran yang bole se slamat pa manusia itu, trus tu orang-orang yang da dengar langsung tu ajaran itu dari pa Dia, dorang itu yang da se tau tu ajaran itu pa torang.

⁴Kong lei supaya orang bole yakin kalu tu ajaran yang dorang da se tau itu butul, Tuhan Allah kase kuasa supaya dorang bole beking tu tanda-tanda, hal-hal luar biasa, deng macam-macam mujisat, deng lei Dia kase tu karunia-karunia dari Roh Kudus iko tu Dia pe mau.

⁵Sudara-sudara, bukang tu malaekat-malaekat yang Tuhan Allah kase kuasa for mo baprenta di dunia yang nanti mo ada, tu dunia yang torang da bicara skarang ini.

⁶Mar di Kitab Suci ada satu orang yang bilang bagini, “Oh Tuhan Allah, apa so tu manusia sampe Tuhan inga pa dia? Apa so tu manusia sampe Tuhan tarukira akang pa dia?

⁷Tuhan beking manusia pe posisi lebe renda sadiki dari tu malaekat-malaekat, mar itu cuma nyanda lama, itu cuma waktu dia masi ada di dunia. Tuhan beking pa dia jadi luar biasa, deng dapa hormat sama deng raja.

⁸Tuhan se kala samua tu dia pe musu-musu, sama deng Tuhan taru samua tu dia pe musu-musu di bawa pa dia pe kaki.” Jadi dari situ jelas kalu Tuhan Allah kase pa manusia for berkuasa pa samua yang ada. Nyanda ada yang dia nyanda kuasai, samua dia kuasai. Cuma skarang ini, torang blum lia kalu dia so berkuasa pa samua yang ada.

⁹Mar yang torang so tau tentang Yesus, Tuhan Allah da beking Yesus pe posisi lebe renda sadiki dari tu malaekat-malaekat, mar itu cuma nyanda lama, itu cuma waktu Dia masi ada di dunia. Kong skarang ini, Tuhan Allah so beking Dia jadi luar biasa deng beking Dia dapa hormat sama deng Raja lantaran Dia so mendrita sampe mati. Dia da rasa samua itu lantaran Tuhan Allah da se tunjung tu Dia pe sayang pa torang samua deng cara Yesus rasa samua itu kong mati for se slamat pa torang samua.

¹⁰Tuhan Allah yang da beking samua, kong samua yang Dia da beking for Dia. Dia beking banya orang jadi iko pa Dia kong dorang mo dapa puji deng hormat sama-sama deng Dia. Kong memang butul Dia suka supaya Yesus jadi sempurna, kong for dapa itu Yesus musti mendrita deng dapa siksa dulu sampe mati. Yesus itu no tu da buka jalang for manusia yang percaya supaya bole mo dapa slamat.

¹¹Yesus yang beking manusia jadi kudus. Dia deng torang manusia yang Dia da beking jadi kudus, Dia deng torang pe Bapa sama. So itu no Dia nyanda malo mo bilang kalu torang ini Dia pe sudara-sudara.

¹²Dia babilang pa Tuhan Allah, “Bapa, Kita mo kase tau tentang Bapa pa Kita pe sudara-sudara. Kita mo manyanyi puji pa Bapa waktu Kita bakumpul sama-sama deng jemaat.”

¹³Kong Yesus bilang lei, “Kita cuma taru Kita pe percaya pa Bapa.” Trus Dia bilang lei, “Bapa, tarukira jo, ini no Kita deng tu anak-anak yang Tuhan Allah da kase pa Kita.”

¹⁴Tu anak-anak yang Yesus da bilang itu, dorang itu manusia yang dari dara deng daging, so itu Yesus lei jadi manusia sama deng dorang. Deng Dia jadi manusia rupa itu, Dia lei mo mati sama deng manusia yang laeng. Kong deng Dia mati, Dia bole se kala pa setang pe bos yang ada kuasa deng tu hal-hal kematian.

¹⁵Waktu Yesus mati, Dia se bebas pa torang manusia dari tu torang pe rasa tako mati yang da kuasai pa torang. Soalnya slama manusia hidop, manusia tako mo mati, itu sama deng manusia jadi budak dari tu tong pe rasa tako itu.

¹⁶Soalnya pasti Dia datang for tolong tu Abraham pe keturunan, bukang for tolong tu malaekat-malaekat.

¹⁷Jadi so lantaran Dia mo tolong pa manusia, Dia lei musti jadi sama di samua hal rupa manusia tu ja bilang Dia pe sudara-sudara. Deng bagitu, Dia bole jadi Imam Basar tu prantara antara manusia deng Tuhan Allah, Dia jadi imam basar yang se tunjung Dia pe rasa kasiang pa manusia deng Dia itu setia ja beking tu Tuhan Allah da suru, kong lewat Dia, tu manusia pe dosa bole mo dapa ampung.

¹⁸Jadi so lantaran Dia sandiri so perna rasa tu siksa waktu da dapa goda, so itu Dia lei mampu mo tolong tu orang-orang yang da dapa goda supaya dorang nyanda tagoda beking dosa.