Read Malay, Manado Ibrani 3 Bible Online

Ibrani 3 - Malay, Manado bible

Ibrani 3

¹Sudara-sudara tu Tuhan pe orang-orang, ngoni itu Tuhan da pangge for hidop deng Dia di sorga. Ngoni pikir jo bae-bae tentang Yesus, Dia itu Tuhan Allah pe Utusan deng Dia itu lei Imam Basar tu jadi prantara hubungan antara manusia deng Tuhan Allah yang torang so akui.

²Dia itu Tuhan Allah da pili, kong Dia setia pa Tuhan Allah. Dia pe setia itu sama deng Musa yang setia ja balayani pa Tuhan Allah pe ruma, tu Tuhan Allah pe ruma itu no tu Tuhan Allah pe orang-orang.

³Mar biar lei bagitu, Yesus itu pantas dapa puji deng hormat lebe basar dari Musa. Itu sama deng tu ahli bangunan yang beking ruma, dia itu mo dapa puji deng hormat lebe dari tu ruma yang dia da beking.

⁴Soalnya tiap ruma yang beking itu satu ahli bangunan, mar samua yang ada, yang beking itu Tuhan Allah.

⁵Musa itu memang setia pa Tuhan Allah pe ruma sbagai orang karja. Apa tu Musa da beking, itu jadi satu kesaksian tentang tu butul yang Tuhan Allah mo kase tau nanti.

⁶Mar Kristus itu setia sbagai Anak Allah yang ada tanggong jawab pa Tuhan Allah pe ruma, so itu Dia lebe dari Musa. Kong torang ini no tu Tuhan Allah pe ruma, itu lei kalu torang tetap pegang trus tu tong pe percaya pa Dia deng lei baharap deng yakin kalu torang mo dapa tu Tuhan Allah mo kase pa torang, tu torang bole mo babangga akang.

⁷Jadi dengar jo apa tu Roh Kudus da bilang, bagini tu Dia da bilang, “Ni hari, kalu ngoni dengar tu Tuhan Allah pe suara,

⁸ngoni jang se kras tu ngoni pe hati, sama rupa tu ngoni pe nene moyang dulu da beking, waktu dorang malawang pa Tuhan. Waktu itu dorang ada di padang gurun, dorang da coba-coba pa Tuhan deng cara malawang Tuhan pe prenta.

⁹Di padang gurun itu, ngoni pe nene moyang dulu da lia samua mujisat yang Kita da beking pa dorang slama ampa pulu taong, mar dorang da coba-coba pa Kita.

¹⁰So itu no kiapa sampe Kita mara pa dorang itu, kong Kita bilang, ‘Dorang itu nimau iko pa Kita, deng dorang nimau beking tu Kita da suru.’

¹¹So itu, waktu Kita mara, Kita basumpa, ‘Dorang nyanda mo maso pa Kita pe tampa istirahat for sama-sama deng Kita di situ.’ ”

¹²Jadi sudara-sudara, ngoni hati-hati jo, jang sampe ada dari pa ngoni yang de pe hati jaha rupa itu kong nyanda percaya sampe so nimau lei iko pa Tuhan Allah yang Hidop.

¹³Mar tiap hari ngoni baku se kuat hati jo slama ngoni masi bole bilang “ni hari”, supaya nyanda ada dari antara pa ngoni tu mo jadi kras hati sampe tatipu for beking dosa.

¹⁴Soalnya torang samua so jadi Kristus pe tamang karja, asal katu torang tetap percaya pa Dia dari pertama torang percaya sampe akhir jaman.

¹⁵Ini tu da tulis di Kitab Suci, “Ni hari, kalu ngoni dengar tu Tuhan Allah pe suara, ngoni jang se kras tu ngoni pe hati, sama rupa tu ngoni pe nene moyang dulu yang da malawang pa Tuhan Allah.”

¹⁶Sapa tu orang-orang yang da dengar tu Tuhan Allah pe suara mar malawang pa Dia? Dorang samua itu no tu orang-orang Israel yang Musa da pimpin kaluar dari tana Mesir.

¹⁷Kong sapa tu orang-orang yang Tuhan Allah mara slama ampa pulu taong? Dorang itu no tu orang-orang Israel yang berdosa da malawang pa Tuhan Allah kong so lantaran itu Dia hukum pa dorang mati di padang gurun.

¹⁸Kong sapa tu orang-orang yang Tuhan Allah da sumpa akang kalu dorang itu nimbole mo maso ka tampa for istirahat sama-sama deng Dia di situ? Dorang itu no tu orang-orang Israel yang nyanda da dengar-dengaran pa Dia.

¹⁹Jadi torang bole tau kalu dorang itu nimbole maso di tampa itu lantaran dorang nyanda percaya pa Dia.