Read Malay, Manado Ibrani 4 Bible Online

Ibrani 4 - Malay, Manado bible

Ibrani 4

¹Tuhan Allah da bajanji kalu Dia pe orang-orang bole mo maso ka tampa istirahat sama-sama deng Dia, kong tu janji itu masi tetap ada. So lantaran itu torang musti hati-hati, jang sampe ada dari pa torang biar cuma satu yang nyanda mo maso di situ.

²Soalnya torang ini lei so dengar tu Kabar Bae sama deng tu torang pe nene moyang lei da dengar. Mar tu Kabar Bae yang torang pe nene moyang da dengar itu nyanda ada de pe guna for dorang, lantaran dorang nyanda percaya sama-sama deng tu orang laeng yang percaya waktu itu.

³Soalnya cuma torang yang percaya tu bole mo maso ka tampa istirahat for baistirahat sama-sama deng Tuhan, kong tentang tu orang yang nyanda percaya, Tuhan Allah da bilang ini, “Waktu Kita mara, Kita basumpa, ‘Dorang nimbole mo maso ka tampa istirahat for sama-sama deng Kita.’ ” Tuhan Allah da bilang bagitu, mar sebenarnya Dia so se sadia tu tampa istirahat itu dari lei dulu waktu pertama Dia da beking ni dunia.

⁴Di Kitab Suci, ada tulis tu Tuhan Allah perna da bilang tentang hari istirahat tu hari katuju. Bagini tu da tulis, “Tuhan Allah beking samua Dia pe karja, abis itu Dia istirahat di hari katuju.”

⁵Trus ada lei tu da tulis di Kitab Suci, “Dorang nimbole mo maso ka tampa istirahat for istirahat sama-sama deng Kita.”

⁶Jadi memang so jelas kalu ada orang-orang yang mo maso ka tampa istirahat sama-sama deng Tuhan Allah, mar tu torang pe nene moyang yang lebe dulu da dengar tu Kabar Bae itu, dorang nyanda maso di situ lantaran dorang nyanda dengar-dengaran pa Tuhan.

⁷So lantaran itu Dia so tentukan satu hari lei supaya manusia bole mo istirahat sama-sama deng Dia. Tu hari yang Dia da tentukan, itu torang bole bilang “Ni hari”. Soalnya bebrapa ratus taong abis nabi Musa, raja Daud tulis tu Tuhan pe kata-kata ini, “Ni hari, kalu ngoni dengar Tuhan Allah pe suara, ngoni jang se kras tu ngoni pe hati.”

⁸Dulu, kalu misalnya Yosua berhasil bawa tu bangsa Israel maso ka tampa for istirahat sama-sama deng Tuhan, tantu waktu jaman Raja Daud Tuhan Allah nyanda mo babilang kalu Dia mo kase tu hari laeng for torang mo istirahat sama-sama deng Dia.

⁹Jadi for Tuhan Allah pe orang-orang, torang itu masi ada kesempatan for baistirahat sama-sama deng Tuhan, itu sama deng waktu Tuhan Allah da istirahat di hari Sabat, tu hari katuju.

¹⁰Soalnya sapa jo yang so istirahat sama-sama deng Tuhan Allah, dia itu lei so istirahat dari samua tu de pe karja sama deng Tuhan Allah da istirahat dari samua tu Dia pe karja di hari katuju.

¹¹So itu mari jo torang brusaha maso ka tampa baistirahat itu, supaya nyanda ada dari pa torang yang se tinggal tu torang pe percaya, sama deng tu torang pe nene moyang dulu yang nyanda beking tu Tuhan pe mau.

¹²Soalnya tu Tuhan Allah pe firman itu hidop deng ada kuasa. Tu Tuhan pe firman itu lebe tajang dari tu peda yang tajang dua sabla. Tuhan pe firman itu ada kuasa sampe bole priksa ka dalam torang pe pikiran deng torang pe maksut tu ada pa torang pe hati, itu sama deng da se pisa tu torang pe jiwa deng torang pe roh, deng torang pe sendi-sendi deng sumsum.

¹³Nyanda ada biar cuma satu tu Tuhan Allah da beking yang tasambunyi di muka pa Dia. Samua yang ada, sama deng talanjang deng lei tabuka di muka pa Dia. Pa Dia no tu torang musti tanggong jawab akang tu torang da beking.

¹⁴Torang skarang ini so ada Imam Basar yang Agung. Dia itu no Yesus tu Anak Allah. Dia yang so maso ka sorga di muka pa Tuhan Allah. So lantaran samua itu, torang yang so percaya, mari jo torang pegang trus tu torang pe percaya itu.

¹⁵Soalnya Yesus tu torang pe Imam Basar itu, Dia mangarti kalu torang yang ada kelemahan bole mo tagoda beking dosa. Dia itu so rasa da dapa goda di samua hal, sama deng torang da dapa goda, cuma katu Dia nyanda beking dosa.

¹⁶So itu sudara-sudara, mari jo deng hati yang brani torang badekat pa Tuhan tu da dudu di atas tahta, Dia yang da se tunjung tu Dia pe sayang pa torang. Deng torang badekat pa Tuhan, torang mo rasa tu Dia pe rasa kasiang pa torang deng tu Dia pe bae for tolong pa torang pas di waktu yang torang perlu.