Read Malay, Manado Ibrani 8 Bible Online

Ibrani 8 - Malay, Manado bible

Ibrani 8

¹Sudara-sudara, de pe inti dari samua tu kita da bilang itu bagini: torang ada Imam Basar yang luar biasa. Dia da dudu di tampa yang paling terhormat, di sabla kanan tahta dari Tuhan Allah Yang Mahabasar di sorga.

²Tu torang pe Imam itu, Dia beking tu Dia pe karja sbagai Imam Basar yang da balayani di tampa yang kudus di sorga, tu Tuhan Allah pe tampa tinggal yang sebenarnya[2], bukang tenda ibada di bumi yang manusia da beking.

³Tiap imam basar yang da dapa pili, dia pe tugas kase orang pe persembahan deng lei kase korban persembahan pa Tuhan Allah. So itu, tu torang pe Imam Basar Yesus, Dia lei musti ada sesuatu for kase pa Tuhan Allah.

⁴Jadi kalu misalnya Dia tetap ada di dunia ini, Dia itu nyanda mo jadi Imam, lantaran di dunia ini so ada imam-imam yang ja kase persembahan iko tu atoran-atoran di kitab Taurat.

⁵Tu imam-imam itu ja kase persembahan pa Tuhan di tenda ibada, kong apa tu dorang ja beking di situ, de pe model sama deng satu gambaran dari apa yang ada di sorga. Soalnya waktu nabi Musa mo beking tu tenda ibada itu, Tuhan Allah da bilang pa nabi Musa bagini, “Musa, inga jo bae-bae! Ngana musti beking itu sama rupa tu conto yang Kita da kase tunjung pa ngana di atas gunung.”

⁶Mar Yesus tu torang pe Imam Basar, Dia pe karja sbagai Imam Basar itu so jao lebe bagus dari tu imam-imam pe karja di perjanjian yang pertama. Soalnya Yesus itu jadi prantara hubungan antara Tuhan Allah deng manusia di perjanjian yang baru, kong tu perjanjian itu so jao lebe bagus lantaran Tuhan Allah so janji torang mo dapa hal-hal yang lebe bae dari tu perjanjian yang pertama.

⁷Soalnya kalu misalnya bakase korban persembahan dari tu perjanjian yang pertama itu mampu mo beking torang pe hubungan deng Tuhan Allah jadi bagus ulang, pasti katu so nyanda perlu lei Yesus kase Dia pe diri for tu perjanjian yang baru.

⁸Mar dulu Tuhan Allah lia kalu dorang so beking sala lantaran dorang nyanda iko tu atoran-atoran dari tu perjanjian yang pertama, so itu Tuhan Allah bilang pa dorang bagini, “Tarukira jo bae-bae tu Kita mo bilang ini! Nanti mo ada de pe waktu, Kita mo beking perjanjian yang baru deng tu orang-orang dari bangsa Israel, deng tu orang-orang dari bangsa Yehuda.

⁹Tu perjanjian yang baru itu nyanda mo sama deng tu perjanjian yang Kita da beking deng dorang pe nene moyang dulu. Kita da pimpin pa dorang, itu sama deng Kita da pegang tu dorang pe tangan for se kaluar dari tana Mesir. Soalnya dorang itu nyanda ja beking tu atoran yang Kita da kase waktu Kita beking tu perjanjian deng dorang itu, so itu no Kita so nyanda lei mo tarukira akang pa dorang.

¹⁰Mar skarang, Kita mo beking satu perjanjian yang baru deng orang-orang dari bangsa Israel di hari-hari yang nanti mo datang ini. Kita mo taru tu Kita pe atoran-atoran pa dorang pe pikiran, deng Kita mo tulis itu pa dorang pe hati. Kita mo jadi dorang pe Tuhan Allah, deng dorang mo jadi Kita pe orang-orang.

¹¹Kong dorang lei nanti so nyanda perlu mo se ajar pa orang-orang tu sama-sama satu bangsa deng dorang, deng nyanda perlu mo se ajar lei pa dorang pe sudara bagini, ‘Ngoni musti kanal pa Tuhan Allah’, lantaran dorang samua mo kanal pa Kita, basar kacili, penting ato nyanda penting.

¹²Soalnya Kita mo se tunjung tu Kita pe rasa kasiang pa dorang deng cara se ampung tu dorang pe dosa, Kita so nyanda lei mo inga-inga tu dorang pe dosa.”

¹³Jadi sudara-sudara, waktu Tuhan bilang kalu Dia mo beking satu perjanjian yang baru, itu beking tu perjanjian yang pertama itu so nyanda mo tapake lei. Kong tu perjanjian yang pertama yang so nyanda tapake itu, itu no yang so tua deng so nyanda lama mo ilang.