Read Malay, Manado Ibrani 9 Bible Online

Ibrani 9 - Malay, Manado bible

Ibrani 9

¹Dulu memang di perjanjian yang pertama antara Tuhan Allah deng tu orang-orang Israel, ada atoran-atoran for baibada deng ada tenda ibada yang kudus tu dorang da beking.

²Dorang beking tu tenda ibada itu ada dua bagean, bagean muka tu ja bilang Ruang Suci. Di situ ada taru akang tu tampa pelita deng meja yang da taru akang roti for srahkan pa Tuhan Allah.

³Kong di Tenda itu ada satu kaeng pampele basar yang da gantong for pele tu bagean muka deng bagean blakang. Tu bagean blakang itu no tu ruangan yang ja bilang Ruang Mahasuci.

⁴Di Ruang Mahasuci itu ada satu tampa yang de pe model rupa meja tu da beking dari mas for ja bakar akang kemenyan, deng lei ada tu tabut perjanjian yang de pe bagean dalam deng luar da lapis akang deng mas. Di tabut perjanjian itu ada isi akang guci dari mas yang da isi deng manna, deng di tabut itu da isi tu Harun pe tongkat yang perna da batunas, deng lei dua lempeng batu tulis yang da tulis akang tu spulu prenta dari pa Tuhan Allah.

⁵Di atas tu tabut itu ada dua patong yang de pe model rupa malaekat tu ja bilang kerub, tu dua patong itu lambang kalu Tuhan Allah yang luar biasa ada di situ. Tu sayap dari dua kerub itu da tabuka lebar kong tutu tu tabut pe penutup itu, itu no tu tampa for Tuhan Allah se ampung tu orang-orang pe dosa. Mar skarang blum de pe waktu kita babicara tentang samua yang ada dalam tenda.

⁶Dorang ator bagitu tu barang-barang di tenda ibada, trus tu imam-imam ja maso di bagean muka dari tu tenda ibada for beking dorang pe karja.

⁷Mar di bagean blakang, cuma tu imam basar yang bole maso ka situ, itu lei tu imam basar cuma bole maso ka situ satu taong satu kali. Kong dia bole maso di situ cuma kalu dia bawa binatang pe dara for kase persembahan pa Tuhan for se hapus tu dia pe dosa sandiri deng lei for se hapus tu orang-orang laeng pe dosa yang nyanda sengaja da beking.

⁸Kong lewat tu atoran-atoran yang dulu itu, tu Roh Kudus kase tunjung kalu slama tu bagean muka masi tetap ada, pasti manusia nimbole langsung mo maso ka bagean blakang tu Ruang Mahasuci for badekat pa Tuhan, itu sama jo deng tu Ruang Mahasuci masi da tatutu.

⁹Jadi samua tu dorang pe korban persembahan itu jadi gambaran for torang skarang ini, kalu torang pe hati nyanda mo bersi dari dosa cuma deng kase persembahan deng tu korban-korban persembahan itu.

¹⁰Soalnya kalu iko tu atoran-atoran dari tu perjanjian yang pertama, itu cuma atoran tentang apa tu dorang mo makang deng minum, deng lei tu atoran se bersi tu dong pe diri. Samua tu atoran itu de pe hubungan cuma deng manusia pe diri, kong itu lei berlaku cuma samantara sampe waktu tu perjanjian yang baru datang.

¹¹Kristus so datang jadi Imam Basar, Dia so bawa tu hal yang bae for torang. Dia so maso pa Tuhan Allah pe tampa tinggal di sorga, yang lebe luar biasa deng lebe sempurna, yang bukang manusia da beking, deng bukang dari ni dunia ini.

¹²Kristus da maso satu kali for slama-lamanya ka tampa yang kudus itu. Dia da maso di situ nyanda da bawa kambing jantan pe dara ato anak sapi pe dara sama deng tu biasa imam basar ja bawa for kase korban persembahan, mar Kristus da maso di situ da bawa tu Dia pe dara sandiri. Kong deng Dia pe dara itu, Dia se bebas pa torang dari torang pe dosa-dosa for slama-lamanya.

¹³Soalnya kalu iko tu atoran agama, kalu orang beking dosa kong mo beking bersi de pe diri dari dosa supaya dia bole mo semba ulang pa Tuhan, tu orang itu musti se pancar akang deng tu kambing jantan pe dara ato tu sapi jantan pe dara ato tu abu dari sapi pe anak yang da bakar, supaya tu orang itu jadi bersi dari de pe dosa.

¹⁴Jadi kalu tu dara deng tu abu itu bole mo kase bersi orang-orang dari dong pe dosa, no apa lei dang tu Kristus pe dara, pasti lebe dari itu. Kristus so kase Dia pe diri sandiri pa Tuhan Allah jadi korban persembahan yang sempurna, kong tu Roh Kudus yang ada trus sampe slama-lamanya yang da pimpin pa Kristus kase Dia pe diri. Dia pe dara yang da tacura itu se bersi tu torang pe hati dari tu hal-hal yang torang da beking tu nyanda ada de pe guna, supaya torang bole semba pa Tuhan Allah Yang Hidop.

¹⁵Jadi so lantaran samua yang Kristus da beking itu, Dia jadi Prantara for tu perjanjian yang baru antara Tuhan Allah deng manusia. Deng Kristus beking bagitu samua orang yang Tuhan Allah da pangge for iko pa Dia, dorang samua bole mo dapa tu warisan yang Tuhan Allah da janji mo kase, tu warisan itu no tu hidop kekal. Soalnya Kristus mati for tubus tu manusia dari dosa-dosa yang dorang da beking waktu masi da iko tu perjanjian yang pertama.

¹⁶Kalu misalnya ada surat for mo kase warisan pa orang tertentu, tu orang yang mo kase warisan itu musti ada bukti kalu dia so mati lebe dulu baru tu surat warisan itu berlaku.

¹⁷Soalnya slama tu orang yang da kase tu warisan itu masi hidop, tu surat itu blum berlaku. Tu surat itu nanti berlaku kalu yang mo bakase tu warisan itu so mati.

¹⁸Bagitu lei no deng tu perjanjian yang pertama, musti ada dara yang tacura dari korban binatang yang mati for beking sah tu perjanjian itu.

¹⁹Soalnya dulu Musa da kase tau samua tu atoran-atoran di kitab Taurat pa bangsa Israel. Abis itu dia ambe tu anak sapi pe dara deng kambing jantan pe dara trus dia campur tu dara itu deng aer, kong dia lei taru tu kayu hisop deng domba pe buluh yang warna mera tua di dara itu, trus dia kase pancar tu dara itu di kitab-kitab yang da tulis akang tu Tuhan Allah pe atoran-atoran, deng lei dia se pancar itu pa samua orang Israel.

²⁰Samantara Musa beking itu, dia babilang, “Ni dara ini beking sah tu perjanjian antara Tuhan Allah deng ngoni, kong Tuhan suru ngoni musti iko tu perjanjian itu.”

²¹Kong deng cara yang sama, Musa lei kase pancar tu dara ka tenda ibada deng lei se pancar tu dara ka alat-alat yang ja pake for baibada di situ.

²²Memang kalu iko tu atoran agama Yahudi, amper samua barang bole mo beking jadi suci kalu pake dara, kong kalu manusia pe dosa-dosa mo dapa ampung, musti ada dara lei yang da tacura.

²³Jadi tu tenda ibada deng lei samua alat yang dorang ja pake di situ, itu no satu gambaran dari apa yang ada di sorga, kong musti pake dara dari korban persembahan for beking suci tu samua itu. Mar for beking suci apa yang ada di sorga, itu musti pake dara dari korban persembahan yang jao lebe bagus dari korban persembahan binatang.

²⁴Soalnya Kristus memang da maso di Ruang Mahasuci yang sebenarnya tu ada di sorga, bukang da maso di Ruang Mahasuci yang ada di dunia, yang di tenda ibada tu manusia da beking. Tu Ruang Mahasuci yang ada di tenda ibada, itu cuma gambaran dari tu Ruang Mahasuci yang ada di sorga. Kong skarang ini Kristus ada di sorga di muka pa Tuhan Allah for mewakili torang di muka pa Tuhan Allah.

²⁵Kristus nyanda kase ulang-ulang Dia pe Diri for jadi korban persembahan, sama deng tu imam basar yang musti ulang-ulang kase korban persembahan. Tiap taong, tu imam basar ja maso ka Ruang Mahasuci for bawa dara tu bukang de pe dara sandiri mar dara binatang for kase korban persembahan.

²⁶Soalnya kalu Dia ulang-ulang se korban tu Dia pe diri, tantu katu dari pertama ni dunia da beking, Dia itu so ulang-ulang mendrita sampe mati. Mar yang sebenarnya, di waktu-waktu yang so dekat deng akhir jaman ini, Kristus datang ka dunia cuma satu kali for tubus tu manusia pe dosa-dosa deng cara kase Dia pe diri sandiri mati jadi korban persembahan.

²⁷Kong sama deng tu Tuhan Allah so tetapkan kalu manusia mati cuma satu kali, trus abis itu mo dapa adili,

²⁸bagitu lei deng Kristus cuma mati satu kali for jadi korban persembahan for se hapus manusia pe dosa-dosa. Kong Dia mo datang ulang yang kadua kali, Dia bukang datang for mo hapus lei tu manusia pe dosa-dosa, mar Dia datang for se slamat pa orang-orang dari hukuman dosa, tu orang-orang yang da tunggu-tunggu pa Dia.