Read Malay, Manado Yakobus 1 Bible Online

Yakobus 1 - Malay, Manado bible

Yakobus 1

¹Salam dari kita, Yakobus. Kita ini ja beking tu Tuhan Allah deng Tuhan Yesus Kristus da suru pa kita. Ni surat for ngoni sudara-sudara dari dua blas suku Israel yang so percaya pa Yesus Kristus, tu da pi merantau ka sluru dunia.

²Kita pe sudara-sudara yang percaya, kalu ngoni dapa macam-macam cobaan, ngoni musti trima samua itu deng snang hati.

³Soalnya ngoni so tau kalu ngoni percaya pa Tuhan kong ngoni dapa macam-macam cobaan, tu cobaan-cobaan itu mo beking ngoni jadi lebe kuat batahang percaya.

⁴Ngoni musti trus batahang percaya rupa itu, supaya ngoni jadi butul-butul percaya, deng ngoni pe percaya mo jadi sempurna. Trus ngoni nyanda mo kurang apa-apa di samua hal.

⁵Kalu ada dari pa ngoni kurang tau mana tu bae yang dia musti beking, lebe bae dia minta dari pa Tuhan Allah. Kalu dia minta pa Tuhan Allah, Tuhan Allah mo kase tu dia da minta. Soalnya Tuhan Allah ja kase apa tu samua orang da minta deng talebe-lebe, deng lei nyanda ja pake syarat.

⁶Mar waktu orang baminta pa Tuhan, dia musti yakin pa Tuhan, dia nimbole ragu-ragu. Soalnya orang yang ragu-ragu, dia itu sama deng omba di laut yang kasana-kamari lantaran angin ja tiop.

⁷Tu orang yang rupa itu, jang bapikir kalu dia mo dapa apa-apa dari pa Tuhan.

⁸Soalnya dia itu orang yang badua hati, dia pe pikiran nyanda tetap pa Tuhan. Tu orang bagitu, de pe hidop nyanda mo tenang.

⁹Tu sudara yang percaya yang miskin, dia itu musti rasa bangga kalu Tuhan angka pa dia jadi orang yang penting.

¹⁰Kong tu orang kaya yang percaya lei, dia musti rasa bangga kalu Tuhan beking dia jadi orang biasa yang nyanda jadi apa-apa. Soalnya dia itu ini hari ada mar de pe eso dia so nyanda ada, sama deng tu rumpu yang babunga yang capat layu.

¹¹Soalnya kalu matahari muncul kong de pe sinar yang panas kana di bunga, tu bunga itu jadi layu sampe de pe klopak ciri kong ilang de pe bagus. Bagitu lei deng tu orang kaya, waktu dia samantara sibuk deng de pe karja for cari doi lebe banya, dia pe hidop mo abis.

¹²Tu orang yang dapa cobaan kong batahang deng tetap percaya pa Tuhan, dia itu yang paling snang. Soalnya kalu dia tetap batahang sampe dia berhasil lewat samua tu cobaan, dia mo dapa hadia tu hidop kekal yang Tuhan Allah so janji mo kase pa orang-orang yang sayang pa Dia.

¹³Kalu ada orang yang dapa cobaan kong tagoda beking tu jaha, dia itu nimbole babilang bagini, “Tuhan Allah yang da coba pa kita!” Soalnya Tuhan Allah nyanda perna tagoda for beking tu jaha, kong Dia lei nyanda perna kase cobaan pa orang.

¹⁴Mar kalu orang tagoda for beking tu jaha, itu lantaran dia da iko akang tu de pe keinginan sandiri yang jaha, sama deng dia da lia tu umpan kong dia ambe lantaran dia tertarik.

¹⁵Kong kalu tu orang iko akang tu keinginan itu, itu de pe arti dia so beking dosa. Trus kalu tu dosa so kuasai pa dia, dia pe hidop so tapisa deng Tuhan for slama-lamanya.

¹⁶Sudara-sudara yang kita sayang, ngoni jang tatipu, bukang Tuhan tu da goda pa ngoni for beking tu jaha.

¹⁷Soalnya samua yang bae deng sempurna tu torang da dapa, itu datang dari Tuhan di sorga. Dia itu torang pe Bapa yang da beking tu benda-benda yang ja kase trang di langit. Tu benda-benda itu ja bruba-bruba, laengkali basinar deng laengkali nyanda, mar Tuhan nyanda bagitu, Dia nyanda perna bruba, Dia slalu bae.

¹⁸Tuhan beking torang jadi Dia pe anak-anak lewat Dia pe ajaran yang butul, itu Dia pe mau supaya torang jadi hasil yang paling utama dari samua tu Dia da beking.

¹⁹Sudara-sudara yang kita sayang, ngoni musti inga tu hal-hal ini: tiap orang lebe bae badengar jo lebe dulu waktu ada orang yang samantara bicara, dia jang capat babicara, deng lei dia jang capat mara.

²⁰Soalnya kalu orang mara, dia nyanda mo beking tu butul yang Tuhan Allah suka dia mo beking.

²¹Jadi ngoni musti brenti beking samua yang besae deng tu jaha yang pe banya itu. Ngoni musti trima tu Tuhan pe firman deng hati yang nyanda sombong. Tu firman yang Tuhan da se tanang pa ngoni pe hati itu ada kuasa for mo se slamat pa ngoni.

²²Ngoni jang cuma ja dengar tu Tuhan pe firman mar ngoni musti ja beking itu. Soalnya kalu ngoni nyanda beking tu firman, itu de pe arti ngoni tipu tu ngoni pe diri sandiri.

²³Tu orang yang cuma dengar tu firman mar nyanda ja beking, dia itu sama deng orang yang da tarukira bae-bae de pe muka yang sebenarnya di muka kaca.

²⁴Dia lia dia pe muka di kaca, mar abis itu dia pigi kong dia iko lupa bagimana de pe muka itu pe model.

²⁵Mar kalu orang cari tau deng tarukira bae-bae kong beking tu firman bukang cuma dengar kong lupa, pasti Tuhan mo beking dia jadi orang yang paling snang. Tu Tuhan pe firman, itu ajaran yang sempurna, tu ajaran yang bole mo bantu se lapas orang dari dosa.

²⁶Kalu orang pikir dia iko pa Tuhan, mar dia nyanda ja jaga de pe mulu, dia itu tipu de pe diri sandiri, itu de pe arti nyanda ada de pe guna dia iko pa Tuhan.

²⁷Mar orang butul-butul iko pa Tuhan Allah deng de pe kalakuan bae di muka pa Tuhan Allah tu torang pe Bapa, kalu dia itu bagini: pi tolong tu anak-anak yang so nyanda ada orang tua deng tu janda-janda yang mendrita, deng lei jaga diri supaya nyanda tapengaru deng tu cara hidop yang jaha tu ada di dunia ini.