Read Malay, Manado Yakobus 3 Bible Online

Yakobus 3 - Malay, Manado bible

Yakobus 3

¹Kita pe sudara-sudara yang percaya, dari pa ngoni ini jang banya tu coba mo jadi guru for se ajar tentang Tuhan. Soalnya ngoni tau kalu torang tu ja se ajar tentang Tuhan, torang ini mo dapa adili sampe di hal-hal yang paling kacili, lebe dari orang yang bukang guru.

²Torang samua ja beking sala dalam banya hal. Tu orang yang mampu kontrol de pe mulu sampe nyanda sala bicara, dia itu orang yang sempurna, tu bole kuasai dia pe diri sandiri.

³De pe conto tu kuda: kalu torang pake tali kekang pa kuda pe mulu kong torang hela tu tali, tu kuda pasti mo iko torang pe mau. Deng bagitu torang bole kontrol tu kuda itu.

⁴De pe conto laeng lei tu kapal basar. Biar lei tu kapal itu pe basar kong angin kuat ja tiop sampe tu kapal bagra, mar tu kamudi yang pe kacili bole mo kontrol tu kapal itu iko tu nahkoda pe mau.

⁵Bagitu lei deng torang pe lida. Torang pe lida itu cuma bagean yang kacili dari torang pe badan, mar tu lida bole mo bicara sombong tentang hal-hal yang basar. Bagitu lei deng api, biar dia cuma kacili mar dia bole jadi basar sampe bakar abis tu utang yang pe basar.

⁶Kong tu lida lei sama deng tu api. Pa torang pe badan ini, tu lida itu satu bagean yang bole beking torang pe badan ini jadi jaha. Tu lida bole beking rusak tu torang pe hidop enteru. Tu lida jadi jaha bagitu lantaran sama deng setang pe bos da taru akang api dari neraka.

⁷Manusia mampu se jinak macam-macam binatang, kong so ada yang se jinak binatang rupa ini: binatang liar, burung-burung, binatang yang bamaraya deng lei tu binatang yang hidop di laut.

⁸Mar nyanda ada satu orang yang mampu mo kontrol de pe lida. Tu lida itu jaha deng nyanda dapa mo kontrol, kong punung deng racun yang bole mo beking mati.

⁹Deng torang pe lida, torang ja puji pa Tuhan tu torang pe Bapa, deng lei torang ja pake tong pe lida for bakutuk pa manusia yang Tuhan Allah da beking iko Dia pe model.

¹⁰Torang ini cuma ada satu mulu mar tu kata-kata yang kaluar ada dua macam, tu kata-kata for puji pa Tuhan deng tu kata-kata for bakutuk pa orang. Sudara-sudara, mustinya torang nyanda bagitu.

¹¹De pe conto tu mata aer, pasti nyanda ada aer tawar deng aer bagaram yang da kaluar dari satu mata aer.

¹²Sudara-sudara, bagitu lei deng tu conto laeng ini: nyanda mungkin tu pohong ara kong mo babua Zaitun. Kong tu batang anggor pasti lei nyanda mungkin mo babua ara. Bagitu lei tu mata aer yang de pe aer bagaram pasti nyanda mungkin mo kase kaluar aer tawar.

¹³Kalu di antara pa ngoni ada orang yang bijaksana deng pande, dia musti se tunjung itu lewat de pe cara hidop yang ja beking tu bae deng lewat de pe hati yang nyanda sombong.

¹⁴Mar kalu pa ngoni pe hati ada rasa mangiri deng cuma pikir diri sandiri, ngoni jang basombong babilang kalu ngoni itu bijaksana, deng ngoni jang se putar bale tu ajaran yang butul.

¹⁵Kalu ngoni pe bijaksana cuma rupa itu, itu bukang bijaksana yang dari pa Tuhan mar dari dunia ini, dari nafsu manusia deng dari setang-setang.

¹⁶Soalnya kalu ada rasa mangiri deng cuma pikir diri sandiri, di situ pasti mo ada kekacauan deng lei samua hal yang jaha.

¹⁷Mar tu orang yang de pe bijaksana dari pa Tuhan, dia itu bagini: pertama dia hidop deng hati yang bersi, dia suka baku bae, bae-bae pa orang, dengar-dengaran, punung deng rasa kasiang, deng ja beking tu hal-hal bae. Dia lei nyanda ja bapro pa sapa-sapa deng nyanda munafik.

¹⁸Kalu orang yang suka hidop baku bae bantu pa orang laeng sampe lei tu orang laeng itu hidop baku-baku bae, dia itu ja beking tu butul di muka pa Tuhan. Itu sama deng tu orang itu ada tanang bibit yang bagus kong dapa hasil yang bagus.