Read Malay, Manado Yakobus 4 Bible Online

Yakobus 4 - Malay, Manado bible

Yakobus 4

¹Ngoni baku ambe deng bakalae satu deng laeng lantaran tu nafsu-nafsu yang besae tu ada pa ngoni pe diri. Tu nafsu-nafsu besae itu baku malawang pa ngoni pe diri for mo kuasai pa ngoni supaya ngoni beking tu jaha.

²Ngoni suka sesuatu mar nyanda dapa, kong ngoni babunung orang. Ngoni mangiri lantaran ngoni suka sesuatu, mar ngoni nyanda dapa itu. Kong ngoni baku ambe kong bakalae. Ngoni nyanda dapa apa-apa lantaran ngoni nyanda ja basombayang.

³Ato tare ngoni da basombayang mar ngoni nyanda dapa apa-apa lantaran ngoni pe tujuan da minta pa Tuhan itu sala, ngoni cuma minta for se snang tu ngoni pe diri sandiri.

⁴Hei ngoni, orang-orang yang nyanda setia! Ngoni pasti tau kalu ngoni ja iko tu dunia pe mau, itu de pe arti ngoni so baku musu deng Tuhan Allah. Sapa jo yang mo iko dunia pe mau, dia beking de pe diri jadi Tuhan Allah pe musu.

⁵Jang ngoni kira nyanda ada alasan tu da tulis di Kitab Suci bagini, “Roh yang Tuhan da taru pa torang pe hati, tu Roh itu cemburu kalu torang nyanda setia pa Tuhan.”

⁶Mar lebe basar tu Tuhan Allah pe bae yang Dia da se tunjung pa torang. So itu ada bilang di Kitab Suci bagini, “Tuhan Allah malawang tu orang-orang sombong, mar Dia se tunjung tu Dia pe bae pa orang-orang yang nyanda sombong.”

⁷So itu srahkan jo ngoni pe diri pa Tuhan Allah kong iko pa Dia. Ngoni lawang jo tu setang pe bos kong dia mo lari dari pa ngoni.

⁸Brusaha jo for hidop dekat deng Tuhan Allah kong Dia lei mo badekat pa ngoni. Hei ngoni orang-orang yang berdosa, kase bersi jo ngoni pe tangan dari ja beking tu jaha! Kong ngoni tu orang-orang yang badua hati, ngoni musti hidop deng hati yang bersi di muka pa Tuhan.

⁹Brenti jo tatawa deng snang lantaran ngoni pe dosa, mustinya ngoni ganti itu deng cara manyasal kong manangis lantaran sedi skali da beking tu dosa.

¹⁰Ngoni musti hidop deng hati yang nyanda sombong di muka pa Tuhan, kong deng bagitu Dia mo angka pa ngoni.

¹¹Sudara-sudara, ngoni jang baku se besae nama. Sapa yang se besae de pe sudara pe nama ato batudu kalu tu sudara itu sala, itu sama deng dia se besae ato se sala tu Tuhan Allah pe atoran-atoran. Kalu ngoni beking bagitu, ngoni bukang orang yang ja iko tu Tuhan pe atoran-atoran, mar ngoni beking ngoni pe diri jadi hakim for se sala tu atoran-atoran itu.

¹²Cuma ada satu yang da kase tu atoran-atoran pa manusia, itu Tuhan sandiri, kong cuma Dia lei yang bole jadi hakim pa torang. Dia itu no yang ada kuasa for se slamat deng se binasa pa manusia. Mar ngoni, ngoni ini sapa so sampe bole mo hakimi pa orang laeng?

¹³Kong ngoni yang babilang, “Ni hari ato eso torang mo pigi ka satu kota. Di sana torang mo tinggal satu taong kong mo mancari for dapa doi.”

¹⁴Padahal, ngoni nintau apa tu mo jadi eso. Apa so ngoni pe hidop ini? Ngoni pe hidop sama deng uap yang cuma nyanda lama ada kong ilang.

¹⁵Mustinya ngoni babilang rupa ini, “Kalu ini Tuhan pe mau, torang bole hidop kong mo beking ini ato itu.”

¹⁶Mar ngoni tare bicara sombong for angka ngoni pe diri sandiri. Padahal tu bicara rupa itu dosa.

¹⁷Jadi kalu ada orang yang tau bagimana musti beking tu bae, mar dia nyanda beking, dia itu so berdosa.