Read Malay, Manado Yakobus 5 Bible Online

Yakobus 5 - Malay, Manado bible

Yakobus 5

¹Hei orang-orang kaya, lebe bae skarang ngoni manangis kong bataria lantaran ngoni mo mendrita skali.

²Ngoni pe kekayaan so busu kong ngoni pe baju rayap so makang.

³Ngoni pe mas deng perak so bakarat. Tu karat itu jadi bukti kalu ngoni cuma da kumpul-kumpul tu harta. Nanti tu karat itu mo makang tu ngoni pe badan sama deng api yang bakar ngoni pe badan. Ngoni itu yang so kumpul-kumpul tu harta yang banya di hari-hari yang so dekat kiamat ini.

⁴Tarukira jo bae-bae, tu orang-orang karja yang so bapanen akang tu ngoni pe hasil kobong da mengelu lantaran ngoni nyanda ja bayar akang gaji. Kong tu dorang pe keluhan itu Tuhan Allah Yang Mahakuasa so dengar.

⁵Ngoni so hidop mewa deng bafoya-foya di dunia. Ngoni so beking puas tu ngoni pe diri sandiri, mar Tuhan mo hukum pa ngoni. Itu sama deng tu binatang yang da makang-makang sampe gode, tu siap for mo potong.

⁶Ngoni so hukum tu orang-orang yang ja beking tu butul di muka pa Tuhan, malatare ngoni bunung pa dorang, kong dorang nyanda mampu malawang pa ngoni.

⁷So itu sudara-sudara, ngoni musti basabar sampe Tuhan datang ulang. Co tarukira bae-bae, tu petani pe sabar da batunggu tu ujang mo turung waktu oras batanang deng oras tu tanaman babua. Dia sabar batunggu dapa hasil yang berharga dari tu de pe tana.

⁸Bagitu lei deng ngoni, ngoni musti basabar deng se kuat tu ngoni pe hati, lantaran so dekat tu waktu for Tuhan mo datang ulang.

⁹Sudara-sudara, ngoni jang bamengelu deng baku tudu, supaya ngoni nyanda dapa hukum. Co tarukira bae-bae, tu Hakim so dekat, Dia so badiri di muka pintu.

¹⁰Sudara-sudara, inga jo tu nabi-nabi dulu, dorang itu yang da kase tau tu Tuhan pe pesan pa orang-orang. Kong waktu itu, dorang dapa macam-macam susa, mar biar lei bagitu dorang tetap sabar. Jadi ngoni iko jo tu conto dari dorang pe sabar itu.

¹¹Tarukira jo bae-bae, orang-orang yang batahang iko pa Tuhan biar lei da mangada tu siksa, dorang tu paling snang. Pasti ngoni so dengar tentang Ayub dulu. Dia dapa macam-macam siksa mar dia batahang da mangada tu samua itu, kong de pe laste Tuhan kase akang berkat pa dia. Tuhan beking bagitu lantaran Tuhan pangsayang skali deng Dia ja se tunjung Dia pe rasa kasiang pa orang.

¹²Kita pe sudara-sudara yang percaya, tu paling penting, ngoni jang basumpa demi langit, demi bumi ato demi apa jo yang ada. Kalu ngoni mo bilang “iyo,” lebe bae ngoni cuma bilang “iyo.” Kong kalu ngoni mo bilang “nyanda,” lebe bae ngoni cuma bilang “nyanda.” Kalu ngoni bilang bagitu, ngoni nyanda mo dapa hukum dari Tuhan.

¹³Kalu ada di antara pa ngoni yang mendrita, lebe bae dia basombayang. Kalu ada orang yang snang, lebe bae dia manyanyi puji pa Tuhan.

¹⁴Kalu ada di antara pa ngoni yang saki, lebe bae dia pangge tu penatua-penatua jemaat, supaya dorang basombayang akang deng goso minya pa dia pake Tuhan pe Nama lantaran ada kuasa.

¹⁵Kalu dorang basombayang deng percaya, tu orang saki itu mo bae. Tuhan mo beking tu orang itu butul-butul bae. Kong kalu dia da beking dosa, Tuhan mo se ampung tu de pe dosa.

¹⁶So itu lebe bae ngoni baku mangaku dosa jo deng baku sombayang supaya ngoni jadi bae. Tu sombayang dari orang yang ja beking tu butul di muka pa Tuhan, de pe sombayang pe kuasa pe basar skali kong mo ada de pe hasil.

¹⁷Co pikir tu nabi Elia! Dia itu manusia biasa sama deng torang. Dia sunggu-sunggu da basombayang minta nyanda turung ujang, kong memang nyanda ujang di bumi slama tiga stenga taong.

¹⁸Kong abis itu dia basombayang ulang minta ujang, trus dari langit turung ujang sampe tu tanaman se kaluar de pe hasil.

¹⁹Kita pe sudara-sudara yang percaya, kalu ada di antara pa ngoni yang dulu percaya pa Tuhan mar so nyanda iko lei tu ajaran yang butul, trus ada orang yang bantu pa dia supaya babale ulang di ajaran yang butul,

²⁰ngoni musti tau kalu tu orang yang bantu de pe tamang supaya se tinggal tu jalang sesat itu kong babale ulang percaya tu ajaran yang butul, dia so bantu tu orang berdosa itu dapa ampung kong tu orang itu pe jiwa mo slamat dari hukuman tapisa deng Tuhan for slama-lamanya.