Read Malay, Manado 1 Petrus 1 Bible Online

1 Petrus 1 - Malay, Manado bible

1 Petrus 1

¹Ni surat dari kita, Petrus, kita ini Kristus Yesus pe rasul tu Dia pe utusan. Surat ini for ngoni tu orang-orang yang Tuhan Allah da pili for percaya pa Dia. Ngoni ini pendatang tu da tinggal di tenga-tenga orang-orang Pontus, Galatia, Kapadokia, Asia deng Bitinia.

²Tuhan Allah tu torang pe Bapa da pili pa ngoni dari dulu iko Dia pe rencana. Tuhan Allah pe Roh da beking ngoni jadi kudus supaya ngoni mampu beking tu Yesus Kristus pe mau deng lei supaya ngoni bersi dari dosa lewat Yesus Kristus pe dara. Kita minta Tuhan Allah se tunjung Dia pe bae pa ngoni deng beking ngoni hidop deng hati tenang, kong samua itu kita minta supaya Dia beking deng talebe-lebe.

³Puji jo pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang pe basar, so itu torang bole dapa hidop baru kong torang bole hidop deng punung harapan. Torang bole dapa tu hidop baru itu lantaran Yesus Kristus yang da mati mar so hidop ulang.

⁴Torang hidop deng punung harapan kalu torang pasti mo dapa warisan, tu warisan itu berkat-berkat dari pa Tuhan Allah yang da simpang for torang di sorga. Tu berkat-berkat itu nyanda mo rusak, nyanda mo kotor deng nyanda mo bruba.

⁵Tuhan Allah da jaga pa ngoni pake Dia pe kuasa lantaran ngoni pe percaya pa Dia. Dia jaga pa ngoni sampe ngoni mo dapa slamat dari hukuman dosa kong dapa hidop kekal. Tu slamat yang ngoni mo dapa itu Dia so se sadia for ngoni di hari kiamat.

⁶Tuhan da beking samua itu, so itu ngoni musti snang biar lei skarang ini for samantara waktu ngoni sedi lantaran dapa macam-macam siksa.

⁷Ngoni dapa tu siksa itu for se bukti kalu ngoni itu butul-butul percaya pa Tuhan. Ngoni pe percaya itu lebe berharga dari tu mas yang bole mo rusak. Kalu mo dapa mas murni, tu mas itu musti bakar dulu, bagitu lei deng ngoni pe percaya pa Tuhan musti dapa uji dulu deng macam-macam siksa. Kalu ngoni batahang percaya rupa itu, nanti waktu Yesus Kristus datang ulang, ngoni mo dapa puji deng hormat, deng Dia mo se tunjung tu ngoni pe luar biasa.

⁸Biar ngoni blum perna lia pa Yesus Kristus, ngoni sayang pa Dia. Kong biar lei skarang ini ngoni nyanda lia pa Dia, ngoni percaya pa Dia. Ngoni snang luar biasa, sampe ngoni so nyanda dapa bilang deng kata-kata tu ngoni pe rasa snang itu,

⁹lantaran ngoni so sampe pa ngoni pe tujuan percaya pa Yesus. Tu ngoni pe tujuan itu tu mo dapa slamat dari hukuman dosa.

¹⁰Dulu tu nabi-nabi da kase tau tentang Tuhan pe sayang yang nanti Dia mo kase tunjung pa ngoni supaya ngoni slamat dari tu hukuman dosa kong dapa hidop kekal. Kong waktu itu, tu nabi-nabi da cari tau deng cari mangarti bae-bae tentang tu Tuhan pe sayang itu.

¹¹Kristus pe Roh yang ada pa tu nabi-nabi itu da kase tau tu siksa yang Kristus mo dapa nanti, deng lei tentang Dia pe luar biasa abis Dia dapa tu siksa itu. Jadi, tu nabi-nabi itu lei cari tau bagimana deng tempo apa itu mo jadi.

¹²Kristus pe Roh so kase tau itu pa tu nabi-nabi dulu kalu tu pesan yang dorang ja kase tau itu bukang for dorang pe diri sandiri mar for ngoni skarang ini. Tu dorang da kase tau itu, itu no tu Kabar Bae tentang Yesus Kristus. Kong skarang ini ada orang-orang tu Roh Kudus yang dari sorga da kuasai, kong dorang so kase tau tu Kabar Bae itu pa ngoni. Tu Kabar Bae itu, itu no tu hal-hal yang malaekat-malaekat suka mo cari tau.

¹³Sudara-sudara, lantaran ngoni so bole tau tu Kabar Bae itu, so itu ngoni musti siap for beking tu hal yang bae, ngoni musti kuasai diri supaya nyanda beking tu jaha, deng lei ngoni hidop punung deng harapan kalu Tuhan mo se tunjung Dia pe bae pa ngoni waktu Yesus Kristus datang ulang.

¹⁴Ngoni ini Tuhan pe anak-anak yang dengar-dengaran, kong ngoni jang iko akang tu nafsu yang besae yang kuasai pa ngoni dulu waktu ngoni blum percaya pa Tuhan.

¹⁵Mar ngoni musti kudus di samua ngoni pe hidop sama deng Tuhan Allah yang da pangge pa ngoni lei kudus.

¹⁶Soalnya di Kitab Suci da tulis bagini, “Ngoni musti hidop kudus, lantaran Kita ini kudus.”

¹⁷Ngoni pangge Tuhan Allah itu ‘Bapa’ waktu ngoni basombayang. Dia itu yang baadili iko apa tu orang da beking deng nyanda bapili-pili orang waktu Dia baadili. Jadi kalu ngoni pangge pa Dia ‘Bapa’, ngoni lei musti hidop deng rasa tako pa Dia slama ngoni masi manumpang di dunia ini.

¹⁸Ngoni musti hidop bagitu lantaran ngoni tau kalu ngoni so dapa tubus, ngoni so bebas dari tu cara hidop yang lama tu nyanda ada de pe guna. Tu cara hidop itu yang ngoni da iko dari ngoni pe nene moyang. Ngoni da dapa tubus bukang deng barang yang bole mo rusak rupa tu mas ato perak,

¹⁹mar ngoni dapa tubus deng Kristus pe dara yang berharga skali. Kristus itu sama deng domba pe anak yang nyanda ada cacat ato nyanda kurang apa-apa for kase korban persembahan.

²⁰Kristus yang Tuhan Allah so pili seblum dunia ini ada. Kong di hari-hari yang so dekat deng kiamat ini, Kristus so datang ka dunia supaya ngoni samua bole mo slamat dari hukuman dosa.

²¹Jadi lantaran tu Kristus da beking itu, ngoni bole percaya pa Tuhan Allah. Tuhan Allah itu yang da kase hidop ulang pa Kristus waktu Dia mati, deng yang da beking Kristus dapa puji deng hormat. Deng bagitu, ngoni bole percaya deng baharap pa Tuhan Allah.

²²Ngoni so beking kudus tu ngoni pe hidop deng cara ja iko tu ajaran yang butul, so itu ngoni bole basayang yang butul-butul pa ngoni pe sudara yang percaya. Jadi kita minta ngoni lebe baku sayang deng segnap hati.

²³Soalnya ngoni ini so dapa hidop baru. Ngoni nyanda dapa tu hidop baru itu dari manusia yang memang mo mati, mar ngoni dapa tu hidop baru itu dari Tuhan Allah yang mo ada for slama-lamanya. Ngoni dapa hidop baru lantaran ngoni percaya deng tu Tuhan Allah pe firman. Tu firman itu mo tetap ada trus kong beking orang bole hidop deng Tuhan Allah for slama-lamanya.

²⁴Soalnya di Kitab Suci da tulis bagini, “Manusia pe hidop deng de pe hebat nyanda mo batahang lama. Manusia sama deng tu rumpu yang babunga bagus, mar nyanda lama tu bunga ciri trus tu rumpu jadi kring,

²⁵mar tu Tuhan pe firman tetap ada for slama-lamanya.” Tu firman itu no, tu Kabar Bae yang orang-orang so kase tau pa ngoni samua.