Read Malay, Manado 1 Petrus 2 Bible Online

1 Petrus 2 - Malay, Manado bible

1 Petrus 2

¹Jadi, ngoni jang beking lei samua tu hal jaha, jang batipu, jang munafik, jang mangiri deng lei jang se besae orang laeng pe nama.

²Ngoni musti suka skali ajaran rohani yang butul tu Tuhan pe firman, itu sama deng tu bayi yang baru lahir suka skali minum susu yang murni. Kalu ngoni suka skali tu firman bagitu, ngoni pe percaya pa Tuhan mo lebe tatamba kuat sampe slamat kong dapa hidop kekal.

³Ngoni musti suka skali tu Tuhan pe firman lantaran ngoni so rasa tu Tuhan pe bae.

⁴Datang jo pa Yesus. Yesus da se sama deng batu yang hidop lantaran Dia yang beking manusia bole hidop. Dia itu sama deng batu yang orang so buang lantaran pikir nyanda berharga, mar di muka pa Tuhan Allah, Dia itu berharga skali deng Tuhan Allah tu da pili pa Dia.

⁵Kong ngoni ini lei so dapa hidop baru lantaran Yesus. Jadi, ngoni itu sama deng batu yang hidop, so itu kase jo tu ngoni pe diri pa Tuhan supaya Dia pake jadi Dia pe Roh pe tampa tinggal. Kong ngoni lei so jadi sama deng tu imam-imam yang ja kase korban persembahan pa Tuhan. Ngoni jadi imam-imam yang de pe hati bersi di muka pa Tuhan, kong ngoni kase tu persembahan yang Tuhan suka trima, trus Tuhan Allah mo trima tu ngoni pe persembahan itu lantaran apa yang Yesus Kristus da beking for torang samua.

⁶Soalnya di Kitab Suci da tulis bagini, “Tarukira jo bae-bae, Kita so pili satu batu yang berharga. Tu batu itu Kita so taru jadi batu fondasi yang paling penting di Yerusalem, tu ja bilang lei Sion. Kong sapa yang percaya pa Dia, nyanda mo kecewa.”

⁷Yesus Kristus itu berharga for orang-orang yang percaya pa Dia. Mar for tu orang-orang yang nyanda percaya pa Dia, ada tulis bagini di Kitab Suci tentang dorang, “Batu yang tukang-tukang bangunan da buang, batu itu so jadi batu fondasi yang paling penting.”

⁸Kong lei ada tu da tulis bagini, “Ada batu yang beking orang mo tasontong akang kong taplaka.” Jadi bagini: tu orang-orang yang nyanda percaya, dorang nyanda ja iko tu Tuhan pe firman, dorang itu sama deng orang-orang yang da tasontong di batu kong taplaka, dorang itu memang Tuhan so tentukan bagitu.

⁹Mar ngoni ini tu orang-orang yang Tuhan Allah so pili, ngoni so sama deng imam-imam yang ja layani pa Tuhan Allah tu torang pe Raja, ngoni tu bangsa yang hidop deng hati yang bersi di muka pa Tuhan, kong ngoni ini lei Tuhan punya. Ngoni jadi samua itu supaya ngoni bole kase tau pa orang-orang tu hal-hal luar biasa yang Tuhan so beking. So Dia no tu da pangge pa ngoni kaluar dari glap kong maso pa Dia pe trang yang ajaib.

¹⁰Dulu ngoni itu bukang Tuhan Allah punya, mar skarang so jadi Dia punya. Kong dulu lei ngoni blum trima tu Tuhan Allah pe rasa kasiang, mar skarang ngoni so trima tu Dia pe rasa kasiang itu.

¹¹Sudara-sudara yang kita sayang, ngoni ini orang-orang pendatang deng orang-orang yang cuma samantara da tinggal di dunia ini. Kita se nasehat pa ngoni supaya ngoni bajao dari tu nafsu yang besae tu da baprang malawang tu ngoni pe keinginan hati yang suka beking tu butul.

¹²Ngoni musti hidop deng kalakuan yang bagus di muka pa tu orang-orang yang nyanda kanal pa Tuhan Allah supaya kalu dorang fitna ngoni itu ja beking tu jaha, dorang cuma mo dapa lia tu ngoni pe kalakuan yang bagus. Trus kalu dorang lia ngoni pe kalakuan yang bagitu, tu orang-orang yang nyanda kanal pa Tuhan Allah itu mo puji deng hormat pa Dia waktu Yesus Kristus datang ulang.

¹³Ngoni da iko pa Tuhan, so itu ngoni musti dengar-dengaran pa samua orang yang da pegang kuasa di pemerenta. Ngoni musti dengar-dengaran pa tu raja yang pegang kuasa paling tinggi,

¹⁴sampe pa orang-orang yang raja da suru pegang kuasa di bawa pa dia. Tu orang-orang itu yang dapa tugas mo hukum pa orang yang da beking jaha, deng lei puji pa orang yang da beking tu bae.

¹⁵Soalnya Tuhan Allah pe mau ngoni beking tu bae, supaya tu orang yang nintau apa-apa tentang tu Tuhan pe mau brenti ja bicara yang nyanda butul tentang ngoni.

¹⁶Ngoni ini orang bebas, ngoni hidop jo deng bebas kong jang pake tu ngoni pe hidop bebas for ja beking tu jaha. Mar lebe bae tare ngoni hidop jo jadi orang yang ja beking tu Tuhan Allah da suru.

¹⁷Ngoni musti hormat pa samua orang deng sayang jo tu ngoni pe sudara-sudara yang percaya. Ngoni lei musti tako pa Tuhan Allah deng hormat jo tu ngoni pe raja.

¹⁸Hei ngoni tu orang-orang karja, ngoni musti dengar-dengaran deng punung rasa hormat pa ngoni pe tuang. Ngoni musti beking itu pa ngoni pe tuang biar ngoni pe tuang yang pangbae, ato pa ngoni pe tuang yang pangjaha.

¹⁹Soalnya kalu dari pa ngoni ada yang mendrita biar nyanda beking sala apa-apa, kong kalu ngoni sabar mendrita lantaran ngoni da inga Tuhan pe mau, Tuhan Allah mo se tunjung De pe bae pa ngoni.

²⁰Soalnya, kalu ngoni mendrita da dapa pukul lantaran beking dosa trus ngoni tetap sabar, apa ngoni mo dapa puji? Pasti nyanda to? Mar kalu ngoni da beking tu bae kong ngoni mendrita dapa pukul trus ngoni tetap sabar, itu pasti Tuhan Allah mo se tunjung tu Dia pe bae pa ngoni.

²¹Soalnya Tuhan Allah pangge pa ngoni for beking tu bae biar lei mendrita, lantaran Yesus lei so mendrita for ngoni. Yesus so kase conto for ngoni supaya ngoni iko tu Dia ja beking.

²²Di Kitab Suci da tulis bagini tentang Dia, “Dia nyanda perna beking dosa, kong nyanda perna bicara dusta.”

²³Waktu orang hina pa Dia, Dia nyanda balas hina pa tu orang itu. Waktu Dia dapa siksa, Dia nyanda bale baancam for mo babalas, mar Dia cuma da srahkan Dia pe diri pa Tuhan Allah yang baadili deng adil.

²⁴Dia lei so tanggong tu torang pe dosa pa Dia pe badan sandiri waktu Dia mati di kayu salib. Deng bagitu torang bole bebas dari kuasa dosa, deng lei torang bole hidop ja beking tu butul di muka pa Tuhan Allah. Tu luka-luka yang Dia da dapa waktu itu, itu no yang beking torang jadi bae.

²⁵Soalnya ngoni dulu sama deng domba yang so tailang akang jalang, mar skarang ngoni so babale pa Tuhan tu Gembala yang ja jaga pa ngoni pe jiwa.