Read Malay, Manado 1 Petrus 3 Bible Online

1 Petrus 3 - Malay, Manado bible

1 Petrus 3

¹Ngoni tu bini-bini, ngoni musti dengar-dengaran pa ngoni pe laki. Deng bagitu, kalu ngoni pe laki ada yang nyanda ja iko Tuhan pe firman, biar ngoni nyanda kase tau tu firman pa dorang, dorang mo lia tu ngoni pe cara hidop yang bae, trus dorang itu mo jadi iko tu Tuhan pe firman lei.

²Dorang mo iko tu Tuhan pe firman waktu dorang lia tu ngoni pe cara hidop yang bersi di muka pa Tuhan, deng lei waktu dorang lia tu ngoni pe rasa hormat pa Tuhan deng pa orang.

³Kalu ngoni mo dapa lia cantik, jang cuma dapa lia cantik di luar tu sama deng ini: bagaya deng cara beking tu rambu bamodel-model, pake perhiasan mas deng baju yang talalu mahal.

⁴Mar kalu suka butul-butul cantik, musti yang dari dalam hati sama deng ini: tu hati yang nyanda sombong deng hati yang tenang. Itu no tu parampuang pe cantik yang nyanda mo ilang kong lei itu yang bagus skali di muka pa Tuhan Allah.

⁵Soalnya tu parampuang-parampuang jaman dulu yang hidop deng hati bersi da beking cantik dorang pe diri deng cara bagitu lei. Dorang itu parampuang-parampuang yang butul-butul da baharap deng yakin pa Tuhan Allah deng yang dengar-dengaran pa dong pe laki.

⁶De pe conto Sara. Dia ja beking samua tu Abraham ja suru pa dia kong dia ja bilang kalu de pe laki itu tuang. Kong ngoni tu parampuang-parampuang, ngoni bole mo bilang kalu ngoni ini Sara pe keturunan kalu ngoni ja beking tu bae sama rupa dia da beking deng nyanda tako kalu ada yang baancam pa ngoni.

⁷Bagitu lei ngoni tu laki-laki, ngoni musti hidop bae-bae deng ngoni pe bini, dorang itu nyanda sama kuat deng ngoni. Ngoni musti hormat tu ngoni pe bini yang sama-sama trima tu warisan hidop kekal yang Tuhan mo kase lantaran Dia sayang. Kalu ngoni hidop bagitu deng ngoni pe bini, Tuhan mo tetap dengar ngoni pe sombayang.

⁸De pe laste, kita minta pa ngoni supaya ngoni samua hidop satu hati. Kalu ada satu orang yang rasa susa, ngoni coba rasa sama deng tu dia da rasa itu. Ngoni lei musti basayang pa ngoni pe sudara yang percaya, se tunjung rasa kasiang pa samua orang, deng lei se tunjung hati yang nyanda sombong.

⁹Kong lei ngoni jang balas tu jaha deng jaha. Kalu ada orang bicara jaha tentang ngoni, ngoni jang balas bicara jaha tentang dorang. Malatare minta jo pa Tuhan supaya kase akang berkat pa dorang, lantaran Tuhan da pangge pa ngoni for kase berkat pa orang laeng, kong deng bagitu ngoni lei mo dapa berkat.

¹⁰Ngoni musti hidop bagitu lantaran di Kitab Suci da tulis bagini, “Sapa yang suka mo hidop snang deng suka mo lia de pe hari-hari bae, dia itu musti jaga de pe lida supaya nyanda bicara tu jaha, deng jaga de pe bibir supaya nyanda badusta.

¹¹Dia musti bajao dari tu cara hidop yang jaha, kong beking tu bae. Dia lei musti brusaha sunggu-sunggu for mo hidop baku-baku bae deng orang laeng.

¹²Soalnya Tuhan pe mata ja tarukira pa orang-orang yang ja beking tu butul, deng Dia pe talinga ja badengar tu dorang pe sombayang-sombayang yang minta tolong. Mar Dia malawang pa tu orang-orang yang ja beking tu jaha.”

¹³Kalu ngoni brusaha ja beking tu bae, sapa yang mo beking hal-hal jaha pa ngoni? Nyanda ada to?

¹⁴Mar biar lei ngoni ja beking tu butul kong ngoni dapa siksa, ngoni itu mo jadi yang paling snang. Ngoni nyanda perlu tako deng kuatir pa tu orang-orang yang mo siksa pa ngoni.

¹⁵Mar ngoni hormat jo pa Kristus, Dia itu Tuhan yang baprenta pa ngoni pe hati. Kong kalu ada orang batanya kiapa ngoni baharap deng yakin pa Kristus, ngoni musti slalu siap for mo bajawab pa dorang. Kong waktu ngoni bajawab, ngoni musti bajawab deng nyanda kasar deng se tunjung tu hormat,

¹⁶deng ngoni pe hati musti bersi di muka samua orang. Kalu ngoni pe cara bajawab rupa itu, tu orang-orang yang bicara besae tentang ngoni yang percaya pa Kristus, dorang mo malo sandiri lantaran ngoni ja beking tu bae.

¹⁷Lebe bae ngoni mendrita lantaran ja beking tu bae kalu itu Tuhan Allah pe mau, daripada ngoni mendrita lantaran ja beking tu jaha.

¹⁸Soalnya Kristus so mati satu kali for se hapus torang pe dosa. Dia itu yang ja beking tu butul so mati for torang tu orang-orang yang nyanda ja beking tu butul, supaya Dia bole bawa pa torang datang pa Tuhan Allah. Dia da dapa bunung waktu Dia jadi manusia, mar tu Roh Kudus da kase hidop ulang pa Dia.

¹⁹Kong tu Roh Kudus itu da kuasai pa Kristus trus bawa pa Dia pi kase tau tu Tuhan Allah pe pesan pa roh-roh yang ada di satu tampa yang sama deng bui.

²⁰Tu roh-roh itu roh dari orang yang dulu nyanda badengar pa Tuhan Allah waktu jaman Nuh. Waktu itu Nuh da beking kapal basar, samantara itu Tuhan deng sabar da tunggu pa manusia mo roba dorang pe kalakuan yang besae, mar dorang nyanda bruba. Kong waktu banjer basar datang, cuma ada dlapan orang tu da maso di kapal basar kong dapa slamat.

²¹Tu banjer basar waktu itu bole mo se sama deng baptisan skarang. Tu baptisan jadi tanda kalu Tuhan Allah so se slamat pa ngoni lewat Yesus Kristus pe hidop ulang. Tu baptisan itu bukang for se bersi ngoni pe badan dari tu kotor, mar for mo minta pa Tuhan Allah supaya ngoni pe hati jadi bersi.

²²Skarang Yesus Kristus so nae ka sorga kong dudu di tampa yang paling terhormat tu di sabla kanan pa Tuhan Allah. Kong samua malaekat, samua yang berkuasa deng samua kekuatan ada di bawa pa Dia pe kekuasaan.