Read Malay, Manado 1 Petrus 4 Bible Online

1 Petrus 4 - Malay, Manado bible

1 Petrus 4

¹Yesus Kristus so mendrita pa Dia pe badan, so itu ngoni lei musti se siap ngoni pe diri for mo trima tu pendritaan sama deng Dia. Soalnya sapa yang so mendrita pa de pe badan, dia itu so nyanda mo beking dosa lei.

²Jadi slama ngoni masi hidop di dunia, ngoni pake jo tu waktu itu for beking tu hal-hal yang iko Tuhan Allah pe mau, jang ngoni iko akang tu manusia pe nafsu besae.

³Soalnya dulu, ngoni so banya pake tu waktu for beking tu hal-hal yang orang-orang nyanda kanal pa Tuhan Allah suka ja beking. Waktu itu, ngoni da hidop rupa ini: iko tu keinginan-keinginan yang cabul, nafsu yang besae, ja bamabo, ja beking pesta mabo-mabo sampe ngoni beking tu hal-hal yang iko tu ngoni pe nafsu yang besae, deng ngoni ja semba tu opo-opo yang mustinya nimbole ngoni beking.

⁴Mar skarang ini orang-orang yang nyanda percaya pa Tuhan jadi heran, lantaran ngoni so nyanda iko lei sama-sama deng dorang for beking tu hal-hal jaha rupa itu sampe so nyanda ada batas, so itu dorang se besae tu ngoni pe nama.

⁵Mar nanti, dorang itu musti tanggong jawab pa Tuhan Allah tentang samua tu dorang da beking. Tuhan Allah so siap mo adili samua orang yang hidop deng yang mati.

⁶So itu no tu Kabar Bae da kase tau lei pa tu orang-orang yang so mati. Biar dorang itu dapa hukuman mati sama deng samua orang musti mati lantaran da beking dosa, dorang pe roh mo hidop di sorga iko Tuhan Allah pe mau.

⁷Tu hari kiamat so dekat. So itu, ngoni musti bapikir tenang deng kuasai diri supaya ngoni bole basombayang.

⁸Kong yang paling penting ngoni musti butul-butul baku sayang. Soalnya kalu torang baku sayang, torang so nyanda mo inga lei orang laeng pe sala yang banya pa torang.

⁹Ngoni lei trima jo orang laeng pa ngoni pe ruma deng nyanda bamengelu.

¹⁰Tiap orang dari pa ngoni so trima karunia dari Tuhan Allah, kong pake jo tu karunia itu for layani orang laeng, pake bae-bae itu lantaran Tuhan Allah tu da se tunjung tu Dia pe bae pa ngoni sampe Dia kase tu karunia-karunia itu.

¹¹De pe conto bagini: kalu ada orang dapa karunia for kase tau tu Tuhan Allah pe firman pa orang-orang, apa tu orang itu ja kase tau musti iko tu Tuhan Allah pe firman. Kong kalu ada orang yang dapa karunia for bantu orang, dia pake jo tu karunia itu deng kekuatan yang Tuhan da kase pa dia. Jadi pake jo tu ngoni pe karunia dengan itu, supaya di samua hal Tuhan Allah mo dapa puji deng hormat lewat Yesus Kristus. Tuhan Allah itu memang luar biasa deng Dia pe kuasa ada sampe slama-lamanya. Amin.

¹²Sudara-sudara yang kita sayang, ngoni da dapa siksa yang brat skali yang mo uji ngoni pe iman supaya kuat. Mar jang ngoni heran kalu ngoni dapa siksa yang brat itu, jang ngoni pikir kalu cuma ngoni yang dapa siksa rupa itu.

¹³Lebe bae tare ngoni snang jo lantaran ngoni da rasa tu siksa sama deng tu siksa yang Yesus perna da rasa. Deng bagitu, ngoni mo snang deng sukacita waktu Yesus datang ulang kong torang dapa lia Dia pe luar biasa.

¹⁴Kong kalu ada orang hina pa ngoni lantaran ngoni da iko pa Kristus, ngoni itu paling snang lantaran tu Roh yang luar biasa tu Tuhan Allah pe Roh ada pa ngoni.

¹⁵Mar jang sampe ada dari pa ngoni yang dapa siksa lantaran dia da babunung, bapancuri, suka maso campur deng orang laeng pe urusan, ato lantaran da beking tu jaha yang laeng.

¹⁶Mar kalu ngoni dapa siksa lantaran ngoni ini orang Kristen, ngoni nyanda usa malo. Lebe bae ngoni puji deng hormat pa Tuhan Allah lantaran ngoni ini orang-orang yang so percaya pa Kristus.

¹⁷Soalnya skarang so de pe waktu for Tuhan Allah mo adili samua orang, kong Dia mo adili lebe dulu pa tu Dia pe orang-orang sandiri. Kong kalu Dia mo adili lebe dulu pa torang tu Dia pe orang-orang, bagimana lei deng tu hukuman nanti waktu Dia adili tu orang-orang yang nimau mo percaya deng tu Kabar Bae dari pa Dia?

¹⁸Di Kitab Suci da tulis bagini, “Tu orang-orang yang ja beking tu butul di muka pa Tuhan, dorang itu amper-amper nyanda mo slamat dari hukuman dosa. No kalu bagitu, bagimana dang deng tu orang-orang yang hidop jao dari Tuhan Allah deng tu orang-orang yang ja beking dosa? Dorang itu pasti lebe soe!”

¹⁹So itu, kalu ada orang yang dapa siksa lantaran itu Tuhan Allah pe mau, dia itu musti srahkan de pe diri pa Tuhan deng lei ja beking tu bae. Tuhan itu yang so beking samua kong Dia itu setia.