Read Malay, Manado 1 Petrus 5 Bible Online

1 Petrus 5 - Malay, Manado bible

1 Petrus 5

¹Kita ini pemimpin jemaat, kong kita mo kase nasehat pa ngoni tu pemimpin-pemimpin jemaat, tu kita pe tamang-tamang karja. Kita ini da lia deng kita pe mata kapala sandiri waktu Kristus da dapa siksa dulu. Kong nanti waktu Kristus datang ulang, Dia mo se tunjung tu Dia pe luar biasa pa samua orang, trus kita ini tamaso dari tu orang-orang yang mo rasa tu Dia pe luar biasa itu. Jadi skarang, kita mo se nasehat pa ngoni bagini:

²ngoni jaga jo tu orang-orang yang percaya pa Kristus yang ngoni da pimpin, sama deng tu gembala da jaga de pe domba. Ngoni jaga jo pa dorang deng snang hati iko tu Tuhan Allah pe mau, bukang lantaran ngoni da dapa paksa ato bukang lantaran ngoni mo cari untung, mar ngoni jaga pa dorang lantaran ngoni memang butul-butul mo tolong pa dorang.

³Ngoni jang main prenta pa dorang yang Tuhan da kase percaya akang for ngoni pimpin, mar lebe bae ngoni jadi conto yang bae for dorang.

⁴Nanti waktu Kristus tu Gembala Agung itu so datang ulang, ngoni tu pemimpin jemaat mo dapa upah yang luar biasa, sama deng orang yang da dapa mahkota yang luar biasa, tu mahkota nyanda perna mo rusak.

⁵Bagitu lei kita se nasehat pa ngoni tu orang-orang muda, ngoni musti dengar-dengaran pa orang yang lebe tua. Ngoni samua musti hidop deng hati yang nyanda sombong satu deng laeng lantaran Tuhan Allah da bilang bagini di Kitab Suci, “Tuhan Allah malawang tu orang yang sombong, mar Dia kase tunjung Dia pe bae pa tu orang yang hidop nyanda sombong.”

⁶So itu, ngoni musti hidop nyanda sombong di muka pa Tuhan Allah yang berkuasa, supaya pas de pe waktu Tuhan mo angka pa ngoni for dapa hormat.

⁷Srahkan jo pa Tuhan samua hal yang beking ngoni kuatir, lantaran Dia itu farduli pa ngoni.

⁸Ngoni musti hati-hati kong bajaga-jaga! Setang pe bos tu ngoni pe musu itu da cari-cari orang for dia mo se ancor, itu sama deng tu singa yang da mangaung cari-cari mangsa for dia mo tlang.

⁹Ngoni musti malawang pa tu setang pe bos itu deng cara pegang kuat tu ngoni pe percaya. Soalnya ngoni lei tau kalu tu ngoni pe sudara yang percaya di dunia ini da rasa tu siksa yang sama deng tu ngoni da rasa.

¹⁰Mar tu siksa yang ngoni da rasa itu cuma samantara, kong abis itu, Tuhan Allah mo beking bae tu ngoni pe keadaan, mo beking kuat ngoni pe hati, mo beking ngoni mampu mo percaya, deng mo beking ngoni slalu tetap percaya pa Dia. So Dia itu tu Tuhan Allah yang ja se tunjung samua tu bae. Dia yang so pangge pa ngoni for jadi percaya pa Kristus, kong ngoni mo rasa tu Dia pe luar biasa for slama-lamanya.

¹¹Dia itu yang berkuasa sampe slama-lamanya. Amin.

¹²Kita da tulis surat yang pende ini pa ngoni, kong Silas tu da bantu pa kita. Silas ini kita pe sudara yang percaya tu bole mo percaya akang. Ni surat kita tulis for kase smangat supaya ngoni tetap yakin tu butul tentang Tuhan Allah pe bae yang Dia se tunjung pa ngoni, kong ngoni musti tetap yakin pa Tuhan Allah pe bae itu.

¹³Kong jemaat di Babel da kirim salam for ngoni. Tuhan so pili pa dorang for iko pa Dia sama deng Dia so pili pa ngoni. Kong lei tu Markus yang kita so anggap kita pe anak, dia da kirim salam for ngoni.

¹⁴Ngoni musti baku kase salam sayang satu deng laeng. Kita minta pa Tuhan supaya torang samua yang percaya pa Kristus bole hidop deng hati tenang.