Read Malay, Manado 2 Petrus 3 Bible Online

2 Petrus 3 - Malay, Manado bible

2 Petrus 3

¹Sudara-sudara yang kita sayang, ini kita pe surat kadua yang kita da tulis for ngoni. Di dua surat itu, kita brusaha se inga pa ngoni supaya ngoni smangat bapikir tu hal-hal yang ngoni so tau,

²supaya ngoni bole inga tu kata-kata yang nabi-nabi kudus da bilang dulu, deng lei supaya ngoni inga tu prenta dari torang pe Tuhan deng Juruslamat yang rasul-rasul tu Dia pe utusan-utusan da kase tau pa ngoni.

³Tu paling penting yang ngoni musti tau bagini: di hari-hari seblum Tuhan mo datang ulang, mo muncul tu orang-orang yang pangbahina tu mo hina pa ngoni, dorang itu orang-orang yang hidop iko dorang pe nafsu yang besae.

⁴Dorang mo bilang bagini, “Tu Kristus bajanji kalu Dia mo datang ulang, mar skarang mana jo Dia? Soalnya dari dulu, dari jo tu waktu torang pe nene moyang mati sampe ni hari nyanda ada yang bruba, samua masi sama dari waktu ni dunia da beking sampe skarang.”

⁵Dorang bilang bagitu lantaran dorang sengaja nimau mo tau kalu dulu Tuhan Allah cuma bicara kong tu langit iko jadi, deng lei Dia cuma bicara, kong ni bumi jadi dari aer kong se pisa dari tu aer itu.

⁶Kong deng tu aer itu no dulu Tuhan se ancor ni bumi deng banjer basar.

⁷Trus Tuhan cuma bicara lei kong tu langit deng bumi yang ada skarang tetap dapa jaga, kong nanti waktu Tuhan mo adili samua orang, Tuhan lei mo se binasa tu orang-orang yang hidop jao dari pa Dia deng mo se abis ni dunia deng langit pake api.

⁸Mar sudara-sudara yang kita sayang, ada satu hal yang ngoni musti tarukira: di muka pa Tuhan Allah, satu hari sama deng sribu taong, deng sribu taong sama deng satu hari.

⁹Jadi bagini: ada orang yang anggap kalu Tuhan talalu lama mo beking Dia pe janji kalu tu Kristus mo datang ulang, mar Tuhan nyanda bagitu. Tuhan itu sabar deng ngoni, Dia suka samua orang ada waktu for mo bertobat, lantaran Dia nimau ada yang mo binasa biar lei cuma satu orang.

¹⁰Mar tempo apa Tuhan mo datang ulang nyanda ada yang tau, Dia mo datang kage-kage sama deng papancuri. Kong di hari itu tu langit mo abis, trus waktu itu jo mo ada bunyi pe kuat skali kong tu benda-benda di langit mo tabakar trus abis, kong bumi deng samua yang ada di bumi mo abis.

¹¹Jadi kalu samua itu nanti mo abis deng cara bagitu, kira-kira torang mo hidop bagimana skarang? Tantu katu torang musti hidop deng hati bersi deng lei ja beking Tuhan Allah pe mau,

¹²waktu torang da samantara batunggu deng beking capat tu hari yang Tuhan Allah so tentukan. Di hari itu, tu langit mo ancor tabakar deng api, kong samua benda-benda di langit mo malele lantaran tu api pe panas.

¹³Mar Tuhan Allah so janji pa torang kalu Dia mo kase langit deng bumi yang baru, kong torang da tunggu-tunggu tu Dia pe janji itu. Di situ cuma ada orang-orang yang ja beking tu butul di muka pa Dia.

¹⁴So itu sudara-sudara yang kita sayang, samantara torang batunggu samua itu mo jadi, torang musti brusaha lei hidop tre deng hidop bae supaya nyanda ada orang bole se sala apa-apa, deng lei musti slalu ada hubungan bae deng Tuhan.

¹⁵Ngoni anggap jo kalu Tuhan pe sabar itu jadi kesempatan for ngoni bole percaya kong dapa slamat dari tu hukuman dosa. Itu samua sama deng Paulus da tulis lei for ngoni iko tu hikmat yang Tuhan da kase pa dia. Dia itu torang pe sudara yang percaya tu torang sayang.

¹⁶Paulus tulis tu hal-hal itu pa de pe samua surat. Memang ada bebrapa hal pa de pe surat-surat itu yang susa mo mangarti de pe maksut. Kong ada orang yang nyanda mangarti deng nyanda kuat dong pe percaya pa Tuhan da se putar bale tu Paulus pe maksut itu. Dorang se putar bale bukang cuma itu mar Tuhan pe firman yang laeng lei dorang se putar bale. Dorang itu mo binasa.

¹⁷Jadi sudara-sudara yang kita sayang, ngoni so tau samua tu guru-guru palsu da beking. So itu, ngoni musti hati-hati deng tu guru-guru palsu yang ja malawang tu butul itu, supaya ngoni nyanda iko akang tu dong pe ajaran yang sesat sampe ngoni nyanda percaya lei tu ajaran yang butul.

¹⁸Mar lebe bae tiap hari ngoni lebe rasa tu Tuhan pe bae, deng lei ngoni tiap hari lebe cari kanal butul pa torang pe Tuhan deng Juruslamat tu Yesus Kristus. Kong for Dia tu puji deng hormat dari skarang sampe slama-lamanya. Amin.