Read Malay, Manado 1 Yohanes 1 Bible Online

1 Yohanes 1 - Malay, Manado bible

1 Yohanes 1

¹Ni surat tentang firman yang bole beking orang hidop slama-lamanya deng Tuhan. Tu firman ini memang so ada dari dulu seblum Tuhan Allah da ciptakan ni dunia. Torang so dengar deng so lia pa Dia deng tong pe mata kapala sandiri, torang lei so pegang pa Dia deng tong pe tangan sandiri.

²Firman yang hidop itu ada sama-sama deng Bapa di sorga. Dia so datang kong torang so lia pa Dia. Kong torang mo basaksi deng kase tau pa ngoni bagimana ngoni bole mo dapa hidop kekal deng Dia.

³Skarang torang kase tau pa ngoni apa tu torang so lia deng so dengar dari pa Dia supaya ngoni bole ada hubungan dekat deng torang. Torang samua ini lei ada hubungan dekat deng Bapa, deng Dia pe Anak tu Yesus Kristus.

⁴Samua ini torang tulis supaya torang pe hati lebe snang.

⁵Ini tu brita yang torang so dengar dari pa Dia, kong torang se tau pa ngoni bagini: Tuhan Allah itu trang kong pa Dia itu sama skali nyanda ada tu glap.

⁶Kalu torang bilang torang so ada hubungan dekat deng Dia mar torang pe hidop masi di glap, torang so badusta kong torang nyanda ja beking tu butul.

⁷Mar kalu torang hidop di trang, sama deng Tuhan lei ada di trang, torang pasti mo ada hubungan dekat satu deng laeng, kong tu dara dari Yesus tu Anak Allah se bersi pa torang dari samua dosa.

⁸Kalu torang bilang torang nyanda ada dosa, torang so tipu tong pe diri sandiri kong tu butul nyanda ada pa torang.

⁹Kalu torang mangaku dosa pa Tuhan, Dia itu setia deng Dia pe janji deng Dia lei adil, so itu Dia mo kase ampung torang pe dosa-dosa deng mo se bersi pa torang dari samua tu jaha yang torang da beking.

¹⁰Kalu torang bilang torang nyanda perna beking dosa, itu sama jo deng torang bilang Dia itu pangbadusta kong lei Dia pe firman nyanda ada pa torang.