Read Malay, Manado 1 Yohanes 2 Bible Online

1 Yohanes 2 - Malay, Manado bible

1 Yohanes 2

¹Hei ngoni yang kita so anggap kita pe anak-anak, kita da tulis tentang tu hal-hal ini pa ngoni supaya ngoni jang beking dosa. Mar kalu ada orang yang beking dosa, ada tu mo bela pa dia di muka pa Bapa. Tu mo babela pa dia itu tu Yesus Kristus, Dia itu yang adil.

²Dia mati jadi korban supaya samua torang pe dosa dapa ampung. Mar bukang cuma torang pe dosa, samua orang di dunia ini lei pe dosa.

³Ini de pe bukti kalu torang kanal pa Tuhan, kalu torang ja beking Dia pe prenta-prenta.

⁴Sapa tu da bilang, “Kita kanal pa Tuhan” mar dia nyanda beking Tuhan pe prenta-prenta, dia itu pangbadusta kong tu ajaran yang butul nyanda ada pa dia.

⁵Mar orang yang ja beking tu Tuhan pe prenta, pa dia itu ada Tuhan Allah pe sayang yang beking dia bole basayang iko Tuhan pe mau. Deng bagitu torang tau kalu torang hidop satu deng Tuhan.

⁶Sapa jo yang bilang kalu dia hidop satu deng Tuhan, dia pe cara hidop lei musti sama deng Kristus pe cara hidop.

⁷Sudara-sudara yang kita sayang, tu kita da tulis ini bukang prenta baru for ngoni mar prenta lama yang ngoni so dengar dulu waktu ngoni baru percaya. Tu prenta lama itu, itu no tu firman yang ngoni so perna dengar.

⁸Mar tu prenta yang kita da tulis skarang ini, itu prenta baru lei for ngoni. Tu prenta baru itu butul, kong Yesus ja beking tu prenta itu deng ngoni lei ja beking itu. Soalnya tu glap so mulai ilang, kong tu trang yang butul so bacahaya.

⁹Sapa jo tu babilang kalu dia hidop di trang mar dia binci pa de pe sudara yang percaya, itu de pe arti dia masi hidop di glap sampe skarang.

¹⁰Sapa yang sayang pa de pe sudara yang percaya, dia tetap ada di dalam trang kong nyanda ada tu bole beking dia berdosa kong jadi sesat.

¹¹Mar sapa yang binci pa de pe sudara yang percaya, dia itu hidop di glap kong dia nintau mo pigi ka mana, lantaran tu glap sama deng so beking buta pa dia.

¹²Hei ngoni yang kita so anggap kita pe anak-anak, kita tulis ni surat for ngoni lantaran ngoni pe dosa so dapa ampung lewat Yesus Kristus.

¹³Bapak-bapak, kita da tulis for ngoni lantaran ngoni so kanal pa Dia yang so ada dari dulu seblum dunia ini ada. Kita lei tulis for ngoni pemuda-pemuda lantaran ngoni so se kala setang pe bos.

¹⁴Anak-anak, kita da tulis for ngoni lantaran ngoni kanal pa Tuhan Allah tu torang pe Bapa. Bapak-bapak, kita tulis pa ngoni lantaran ngoni so kanal pa Dia yang so ada dari dulu seblum dunia ini ada. Kita lei tulis pa ngoni pemuda-pemuda lantaran ngoni pe iman kuat. Tu Tuhan Allah pe firman da hidop pa ngoni pe diri, deng ngoni so se kala tu setang pe bos.

¹⁵Ngoni nimbole sayang ni dunia yang jaha ini deng samua de pe isi. Kalu ngoni sayang ni dunia, ngoni nyanda sayang pa Tuhan Allah tu torang pe Bapa.

¹⁶Soalnya samua yang jaha yang ada di dunia ini, itu bukang dari Bapa mar itu dari dunia ini. Samua yang jaha itu bagini: nafsu yang besae, keinginan mata yang besae, deng ja se sombong de pe hidop.

¹⁷Ni dunia deng samua tu keinginan yang jaha samantara ilang, mar orang yang ja beking Tuhan Allah pe mau, dia mo hidop deng Tuhan slama-lamanya.

¹⁸Kita pe anak-anak dalam Tuhan, ini waktu so dekat mo kiamat. Ngoni so perna dengar kalu tu antiKristus mo datang. Skarang memang so banya tu da muncul, itu de pe tanda kalu tu kiamat so dekat.

¹⁹Memang dorang itu muncul dari antara pa torang, mar dorang itu bukang torang pe orang. Soalnya kalu dorang memang torang pe orang, tantu dorang tetap sama-sama deng torang. Mar deng dorang kaluar dari pa torang, itu jadi tanda kalu dorang itu bukang torang pe orang.

²⁰Mar Yesus Kristus Yang Kudus so kase tu Roh Kudus for kuasai pa ngoni, so itu ngoni tau tu ajaran yang butul.

²¹Kita tulis ini pa ngoni bukang lantaran ngoni nintau tu ajaran yang butul, malatare lantaran ngoni tau tu ajaran itu deng ngoni lei tau kalu nyanda ada dusta di ajaran yang butul itu.

²²Sapa tu pangbadusta? Tantu katu tu orang yang manyangkal kalu Yesus itu Kristus, tu Raja yang se slamat pa manusia. Tu orang yang manyangkal itu no tu antiKristus, dia itu yang manyangkal pa Bapa deng lei pa Anak.

²³Soalnya sapa yang manyangkal pa Anak, dia nyanda hidop satu deng Bapa. Mar sapa yang mangaku percaya pa Anak, tantu lei dia so ada hubungan dekat deng Bapa.

²⁴Jadi apa tu ngoni so dengar dari dulu waktu ngoni jadi percaya, itu musti ngoni simpang bae-bae pa ngoni pe hati. Deng bagitu ngoni mo tetap hidop satu deng Anak deng lei Bapa.

²⁵Kong ini tu janji yang Dia sandiri so janji pa torang, kalu torang ini mo dapa hidop kekal.

²⁶Tu samua yang kita da tulis pa ngoni ini tentang tu orang-orang yang da brusaha mo beking sesat pa ngoni.

²⁷Kong tentang ngoni sandiri, Tuhan so kase tu Roh Kudus di atas pa ngoni for kuasai pa ngoni. Tu Roh itu masi tetap ada pa ngoni, jadi so nyanda perlu lei orang laeng mo ajar pa ngoni. Soalnya tu Roh Kudus tu da kuasai pa ngoni so ajar pa ngoni tentang samua hal, kong apa tu Dia da se ajar itu butul, bukang dusta. Jadi ngoni so trima tu ajaran itu dari Dia, so itu ngoni musti tetap hidop satu deng Tuhan.

²⁸Hei ngoni yang kita so anggap kita pe anak-anak, ngoni musti tetap hidop satu deng Yesus Kristus supaya kalu Dia datang ulang, torang nyanda tako deng nyanda malo mo mangada pa Dia.

²⁹Kalu ngoni tau Dia itu butul, ngoni lei musti tau kalu tiap orang yang ja beking tu butul di muka pa Tuhan, tu orang itu so jadi Tuhan pe anak-anak.