Read Malay, Manado 1 Yohanes 3 Bible Online

1 Yohanes 3 - Malay, Manado bible

1 Yohanes 3

¹Co ngoni pikir, pe basar skali Bapa pe sayang pa torang, sampe Dia bilang torang ini Dia pe anak-anak, kong memang torang ini Dia pe anak-anak. So itu, orang-orang yang ja iko dunia yang jaha nyanda kanal pa torang lantaran dorang yang dari dunia ini nyanda kanal pa Bapa.

²Sudara-sudara yang kita sayang, skarang torang ini Tuhan Allah pe anak-anak, mar torang blum tau persis bagimana torang pe hidop nanti. Yang torang tau, kalu nanti Kristus so datang ulang, torang mo jadi sama deng Dia, lantaran torang mo lia pa Dia deng Dia pe keadaan yang sebenarnya.

³Orang yang da baharap bagitu pa Kristus, tu orang itu musti jaga tu de pe hidop supaya suci sama deng Dia itu suci.

⁴Orang yang ja beking dosa, dia itu lei malawang Tuhan pe prenta. Soalnya kalu orang nyanda beking Tuhan pe prenta, itu no tu dosa.

⁵Ngoni tau kalu Dia datang for mo se hapus tu manusia pe dosa-dosa, kong pa Dia itu nyanda ada dosa.

⁶Tiap orang yang hidop satu deng Tuhan, dia itu nyanda trus-trus ja beking dosa. Soalnya kalu ada orang yang trus-trus ja beking dosa, dia nyanda perna lia deng nyanda perna kanal pa Yesus.

⁷Hei ngoni yang kita so anggap kita pe anak-anak, jang sampe orang laeng beking sesat pa ngoni. Sapa yang ja beking tu butul di muka pa Tuhan Allah, dia itu orang yang butul sama deng Kristus itu butul.

⁸Mar sapa yang trus-trus ja beking dosa, dia itu setang pe bos da kuasai, lantaran tu setang pe bos dari dulu ja beking dosa. Kong Yesus tu Anak Allah datang for se ancor samua tu setang pe bos ja beking.

⁹Orang yang so jadi Tuhan Allah pe anak, dia itu nyanda trus-trus ja beking dosa lantaran Tuhan Allah da hidop pa de pe diri, sama deng Tuhan da tanang bibit pa orang itu pe hati kong da batumbu. Dia so nyanda trus-trus ja beking dosa, lantaran Tuhan Allah so beking dia jadi Tuhan pe anak.

¹⁰Torang bole dapa tau mana tu Tuhan Allah pe anak-anak deng mana tu setang pe bos pe anak-anak. Tu orang yang nyanda ja beking tu butul di muka pa Tuhan Allah deng nyanda sayang pa de pe sudara yang percaya, dia itu bukang Tuhan Allah pe anak.

¹¹Ini tu brita yang ngoni so dengar dari dulu waktu ngoni baru percaya: ngoni musti baku-baku sayang.

¹²Ngoni jang sama deng Kain yang da bunung de pe ade sandiri. Dia itu setang pe bos da kuasai, sampe dia bunung de pe ade. Jadi kiapa so Kain da bunung de pe ade? Kain da bunung dia pe ade lantaran Kain da beking tu hal-hal yang jaha di mata Tuhan, mar de pe ade da beking tu butul.

¹³Sudara-sudara, ngoni jang heran kalu tu orang yang ja iko tu dunia pe mau ini binci pa ngoni.

¹⁴Dulu torang pe hidop tapisa deng Tuhan, itu sama deng torang pe rohani so mati. Mar skarang torang tau kalu torang so dapa tu hidop kekal lantaran torang sayang pa tong pe sudara yang percaya. Mar sapa yang nyanda ja basayang, dia pe hidop tetap tapisa dari Tuhan sampe slama-lamanya, sama deng de pe rohani tetap mati.

¹⁵Sapa yang binci pa de pe sudara yang percaya, dia itu sama deng pangbabunung orang. Kong ngoni tau kalu nyanda ada tu pangbabunung orang yang mo dapa hidop kekal.

¹⁶Torang tau tu sayang yang butul dari Kristus pe sayang. Bagini tu Dia pe sayang: Dia so kase De pe diri sampe mati for samua orang. So itu torang lei musti siap for mo kase tong pe diri sampe mati for tong pe sudara-sudara yang percaya.

¹⁷Kalu ada orang yang de pe harta talebe, kong dia lia de pe sudara yang percaya pe hidop susa mar dia nyanda tolong, itu de pe arti Tuhan Allah pe sayang nyanda ada pa dia.

¹⁸Hei ngoni yang kita so anggap kita pe anak-anak, kalu torang basayang, jang cuma di mulu ato cuma bilang sayang mar torang nyanda beking apa-apa. Mari jo torang butul-butul basayang pa orang deng cara tolong pa dia.

¹⁹Kalu torang basayang deng cara bagitu, torang bole tau kalu torang ini da iko tu butul, deng lei torang pe hati jadi tenang di muka pa Tuhan Allah,

²⁰biar lei torang pe hati batudu kalu torang berdosa, Tuhan Allah itu lebe basar dari torang pe hati yang batudu, deng Dia tau samua yang ada.

²¹Sudara-sudara yang kita sayang, kalu torang pe hati nyanda batudu pa torang, torang lei nyanda mo tako di muka pa Tuhan Allah.

²²Kong apa jo yang torang da minta pa Dia, torang mo dapa. Soalnya torang ja beking Dia pe prenta-prenta, deng ja beking tu hal-hal yang beking snang Dia pe hati.

²³Kong ini tu Tuhan Allah pe prenta: torang musti percaya pa Yesus Kristus tu Dia pe Anak, deng lei torang musti baku sayang sama deng tu Kristus da prenta pa torang.

²⁴Jadi sapa yang iko Tuhan pe prenta-prenta, dia itu hidop satu deng Tuhan kong Tuhan lei hidop satu deng dia. Kong torang bole tau kalu Tuhan hidop satu deng torang, lantaran Tuhan so kase Dia pe Roh pa torang.