Read Malay, Manado 1 Yohanes 5 Bible Online

1 Yohanes 5 - Malay, Manado bible

1 Yohanes 5

¹Tiap orang yang percaya kalu Yesus itu Kristus tu Raja yang mo se slamat pa manusia, dia itu jadi Tuhan Allah pe anak. Samua orang yang sayang pa Tuhan Allah tu Bapa, dorang itu lei sayang pa orang yang so jadi Tuhan Allah pe anak.

²Trus kalu torang sayang pa Tuhan Allah deng beking Dia pe prenta-prenta, itu jadi bukti kalu torang lei sayang pa De pe anak-anak.

³Soalnya kalu torang sayang pa Tuhan Allah, torang mo beking Dia pe prenta-prenta, kong Dia pe prenta-prenta itu nyanda brat mo beking.

⁴Soalnya torang yang so jadi Tuhan Allah pe anak-anak mampu se kala tu dunia yang jaha ini. Torang mampu se kala tu dunia yang jaha lantaran torang percaya pa Tuhan.

⁵Sapa dang yang bole se kala tu dunia yang jaha ini? Tantu katu tu orang yang percaya kalu Yesus itu Anak Allah.

⁶Yesus Kristus datang ka dunia deng aer deng lei dara.[1] Jadi Dia datang bukang cuma deng aer mar deng dara lei. Kong Roh Allah yang basaksi kalu samua itu butul, lantaran tu Roh ja bilang tu butul.

⁷Kong ada tiga yang jadi saksi kalu Yesus itu Anak Allah [di sorga: Bapa, firman deng Roh Kudus, kong tiga itu satu.

⁸Kong ada tiga lei yang jadi saksi di bumi]: Roh, aer deng dara, kong samua itu kase kesaksian yang sama.

⁹Torang trima tu manusia pe kesaksian, mar tu Tuhan Allah pe kesaksian lebe kuat dari tu manusia pe kesaksian. Tuhan Allah pe kesaksian itu tentang Dia pe Anak.

¹⁰Sapa yang percaya pa Anak Allah, dia itu so trima tu kesaksian pa de pe hati. Mar sapa yang nyanda percaya pa Tuhan Allah, itu sama deng dia so beking Tuhan Allah itu pangbadusta lantaran dia nyanda percaya tu Tuhan Allah pe kesaksian tentang Dia pe Anak.

¹¹Tu kesaksian itu pe isi bagini: Tuhan Allah so kase pa torang tu hidop kekal, kong tu hidop kekal itu torang dapa lewat percaya pa Dia pe Anak.

¹²Sapa yang da trima pa Anak Allah, dia itu so dapa tu hidop kekal. Mar sapa yang nyanda trima pa Anak Allah, dia itu nyanda dapa tu hidop kekal itu.

¹³Kita da tulis samua itu for ngoni yang percaya pa Anak Allah, supaya ngoni tau kalu ngoni so dapa tu hidop kekal.

¹⁴Kong torang brani baminta pa Dia lantaran kalu torang basombayang minta sesuatu iko Dia pe mau, torang yakin kalu Dia pasti dengar deng iko akang tu torang da minta itu.

¹⁵Kong kalu torang tau Dia so dengar tu torang da minta, torang lei yakin kalu torang so dapa samua tu torang da minta pa Dia itu.

¹⁶Kalu satu orang lia dia pe sudara yang percaya beking dosa, mar tu dosa itu nyanda beking tu sudara itu dapa hukuman tapisa deng Tuhan for slama-lamanya, tu orang yang da lia itu musti basombayang supaya Tuhan Allah beking bagus ulang tu sudara itu pe hubungan deng Tuhan. Mar ada dosa yang beking orang tapisa deng Tuhan Allah. Kalu ada orang yang beking dosa itu, kita nyanda bilang kalu ngoni perlu basombayang akang pa dia.

¹⁷Samua tu jaha itu dosa, mar ada dosa yang nyanda beking orang dapa hukuman tapisa deng Tuhan for slama-lamanya.

¹⁸Torang tau kalu samua orang yang so jadi Tuhan Allah pe anak-anak, dorang nyanda trus-trus beking dosa. Soalnya tu Anak Allah da jaga pa dorang, deng setang pe bos nyanda mampu mo beking apa-apa pa dorang.

¹⁹Torang tau kalu torang ini dari Tuhan Allah, kong tu sluru dunia ini setang pe bos da kuasai.

²⁰Torang lei tau kalu tu Anak Allah so datang kong so beking torang mangarti supaya torang kanal Tuhan Allah Yang Butul. Torang hidop satu deng Tuhan Allah Yang Butul itu, lantaran torang hidop satu deng Dia pe Anak Yesus Kristus. So Dia itu tu Tuhan Allah Yang Butul deng Dia yang beking orang bole hidop kekal.

²¹Hei ngoni yang kita so anggap kita pe anak-anak, ngoni hati-hati, jang sampe ngoni basemba tu opo-opo.