Read Malay, Manado 2 Yohanes 1 Bible Online

2 Yohanes 1 - Malay, Manado bible

2 Yohanes 1

¹Ni surat dari kita tu pemimpin jemaat. Surat ini for ibu yang Tuhan da pili, deng lei for ibu pe anak-anak yang butul-butul kita sayang.[1] Mar bukang cuma kita yang sayang pa ngoni, samua orang yang iko tu ajaran yang butul lei sayang pa ngoni.

²Torang sayang pa ngoni lantaran tu ajaran yang butul itu ada pa torang pe hati, kong tu ajaran itu ada trus pa torang sampe slama-lamanya.

³Kita minta supaya Tuhan Allah tu torang pe Bapa deng Yesus Kristus tu Bapa pe Anak se tunjung tu bae deng tu rasa kasiang pa torang samua, deng lei beking torang hidop deng hati tenang. Samua itu for torang yang ja iko tu ajaran yang butul deng yang ja baku sayang.

⁴Kita snang skali lantaran dapa tau kalu ada dari ibu pe anak-anak yang hidop iko tu ajaran yang butul, sama deng tu Bapa da prenta pa torang.

⁵Kong skarang kita minta pa ibu supaya torang samua baku-baku sayang. Tu kita da minta ini bukang prenta baru, mar prenta yang so ada pa torang dari pertama waktu torang baru percaya.

⁶Kong dari pertama, ngoni so dengar tu Tuhan pe prenta kalu torang musti hidop baku-baku sayang. Kong kalu torang hidop baku-baku sayang, itu de pe arti torang so beking tu Dia pe prenta-prenta.

⁷So ada banya orang pigi ka sluru dunia for beking sesat pa tu orang-orang yang percaya pa Yesus Kristus. Dorang yang beking sesat itu nyanda percaya kalu Yesus Kristus da datang ka dunia sbagai manusia. Dorang itu no tu ja beking sesat deng lei tu antiKristus.

⁸So itu ngoni musti jaga bae-bae tu ngoni pe percaya pa Yesus Kristus supaya nyanda ilang. Deng bagitu torang pe karja dulu pa ngoni nyanda sia-sia, kong nanti ngoni mo trima samua tu ngoni pe upah.

⁹Tiap orang yang so nyanda iko tu Kristus pe ajaran kong iko tu ajaran laeng, dia itu nyanda ada hubungan deng Tuhan Allah. Mar tu orang yang iko tu Kristus pe ajaran, dia itu ada hubungan deng Bapa deng lei Anak.

¹⁰Jadi kalu ada orang datang kong kase tau pa ngoni tu ajaran yang nyanda sama deng Kristus pe ajaran, ngoni jang trima dia pa ngoni pe ruma deng jang ngoni kase salam pa dia.

¹¹Soalnya sapa yang trima kong kase salam pa tu orang itu, dia itu so iko beking jaha sama deng tu orang itu da beking.

¹²Masi banya tu kita mo tulis for kase tau pa ngoni, mar lebe bae jang lewat surat. Kita harap mo pigi baku dapa deng ngoni kong mo babicara langsung pa ngoni, supaya torang pe hati butul-butul snang.

¹³Tu ibu pe sudara parampuang yang Tuhan da pili lei, dia pe anak-anak da kirim salam for ibu.