Read Malay, Manado 3 Yohanes 1 Bible Online

3 Yohanes 1 - Malay, Manado bible

3 Yohanes 1

¹Ni surat dari kita, tu pemimpin jemaat. Surat ini for bapak Gayus yang butul-butul kita sayang.

²Bapak yang kita sayang, kita basombayang supaya bapak sehat-sehat deng berhasil di samua hal, trus bapak pe jiwa lei da bae-bae.

³Kita snang skali waktu ada bebrapa sudara yang percaya datang kong kase tau pa kita kalu bapak da tetap hidop ja iko tu ajaran yang butul, kong memang bapak ja beking tu ajaran itu.

⁴For kita, nyanda ada tu bole mo beking kita pe hati lebe snang daripada dengar kalu kita pe anak-anak dalam Tuhan da hidop iko tu ajaran yang butul.

⁵Bapak Gayus yang kita sayang, bapak setia ja bantu dalam samua hal tu sudara-sudara yang percaya, biar lei bapak blum kanal pa dorang.

⁶Tu sudara-sudara itu so datang kamari kong kase tau di jemaat tentang bapak pe sayang pa dorang. Bagus skali kalu bapak bantu trus pa dorang deng cara yang beking snang pa Tuhan Allah waktu dorang se trus tu dong pe perjalanan.

⁷Soalnya waktu dorang pi kase tau tentang Yesus Kristus ka bangsa laeng yang nyanda percaya, dorang nyanda dapa apa-apa dari tu orang-orang nyanda percaya itu.

⁸Jadi torang musti bantu pa orang-orang sama deng dorang itu, supaya torang samua jadi tamang karja for sama-sama se ajar tu ajaran yang butul.

⁹Kita so tulis surat sadiki for jemaat, mar Diotrefes tu suka jadi bos di jemaat nimau mo dengar pa kita.

¹⁰So itu kalu kita datang, kita mo kase tau pa ngoni samua tu dia da beking. Dia da cirita jaha yang nyanda butul tentang torang. Mar samua itu blum cukup for dia. Soalnya waktu tu sudara-sudara yang percaya datang, dia nimau trima pa dorang. Malatare dia larang pa orang-orang for mo trima tu sudara-sudara itu, kong dia nyanda kase tu orang-orang yang da trima tu sudara-sudara itu bagabung di jemaat.

¹¹Bapak Gayus yang kita sayang, bapak jang tiru tu conto yang jaha mar tiru jo tu conto yang bae. Sapa yang ja beking tu bae, dia itu dari Tuhan Allah. Mar sapa ja beking tu jaha, dia blum perna kanal pa Tuhan Allah.

¹²Tentang Demetrius, samua orang bilang kalu dia itu orang yang ja beking tu butul. Kong tu butul yang dia ja beking itu jadi bukti kalu memang dia ja iko tu ajaran yang butul. Torang lei bilang kalu tu Demetrius ja beking itu butul, kong bapak tau kalu tu torang ja bilang itu butul.

¹³Banya lei tu kita mo bilang pa bapak, mar kita nimau mo tulis lewat surat.

¹⁴Kita harap nyanda lama lei kita mo pigi baku dapa ulang deng bapak, kong torang bole babicara langsung.

¹⁵Kita minta supaya Tuhan beking bapak hidop deng hati tenang. Kong bapak pe tamang-tamang di sini lei da kirim salam. Tolong lei kirim akang kita pe salam for tamang-tamang di sana satu-satu.