Read Malay, Manado Yudas 1 Bible Online

Yudas 1 - Malay, Manado bible

Yudas 1

¹Ni surat dari kita, Yudas. Kita ini ja beking tu Yesus Kristus da suru, kong kita ini lei Yakobus pe sudara. Ni surat for ngoni tu orang-orang yang Tuhan Allah tu torang pe Bapa da pangge deng yang Dia sayang, Dia lei jaga pa ngoni for jadi Yesus Kristus pe orang-orang.

²Kita minta pa Tuhan supaya Dia se tunjung Dia pe rasa kasiang pa ngoni, beking ngoni bole hidop deng hati tenang, deng lei sayang pa ngoni, kong biar samua itu Dia kase deng talebe-lebe for ngoni.

³Sudara-sudara yang kita sayang, sebenarnya kita pe tujuan pertama kita suka skali mo tulis surat for ngoni tentang torang pe keslamatan yang torang sama-sama so dapa. Mar skarang pa kita pe hati ada rasa yang kuat for tulis ni surat deng se nasehat pa ngoni supaya ngoni tetap pertahankan tu ngoni pe iman. Tu iman itu Tuhan Allah so kase pa ngoni tu Dia pe orang-orang, tu iman yang Dia kase satu kali for slama-lamanya.

⁴Soalnya ada orang-orang yang so maso deng babasambunyi di tenga-tenga pa ngoni. Dorang itu orang-orang yang hidop jao dari pa Tuhan Allah. Dorang se putar bale tu brita tentang Tuhan Allah pe bae pa torang, dorang bilang kata torang bole beking dosa iko torang pe nafsu yang besae. Dorang itu lei manyangkal kalu Yesus Kristus itu satu-satunya Penguasa deng dorang bilang Dia bukang torang pe Tuhan. Tu orang-orang bagitu so dari dulu da tulis di Kitab Suci kalu dorang itu memang mo dapa hukuman.

⁵Biar ngoni so tau tu hal ini, kita mo se inga pa ngoni bagini: dulu, Tuhan da kase slamat pa bangsa Israel dari tana Mesir, mar Dia lei se binasa dari antara pa dorang tu orang-orang yang nyanda percaya pa Dia.

⁶Bagitu lei deng tu malaekat-malaekat yang da langgar tu dorang pe batas-batas kekuasaan sampe se tinggal tu dorang pe tampa tinggal sandiri. Dorang itu Tuhan da tahang di dunia glap pake rante tu nyanda talapas sampe slama-lamanya. Tuhan da tahang pa dorang sampe di hari waktu Dia mo bahakimi.

⁷Bagitu lei tu Sodom deng Gomora deng tu kota-kota yang ada di dekat situ. Tu orang-orang di situ ja baseks bebas deng ja baseks yang nyanda wajar. So itu dorang dapa hukuman di api yang nyanda mo mati for slama-lamanya, itu jadi conto pringatan for samua orang.

⁸Bagitu lei deng tu orang-orang yang da se ajar tu ajaran sesat. Dorang itu pangmimpi kong dorang anggap tu dong pe mimpi itu butul sampe dorang beking hal-hal caparuni, pandang enteng tu Tuhan pe kuasa, deng lei bahojat samua yang luar biasa tu ada di sorga.

⁹Hele Mikhael tu pemimpin malaekat di sorga, dia nyanda brani batudu deng bahojat pa setang pe bos macam itu. Jadi waktu Mikhael da baku ambe deng setang pe bos tentang Musa pe mayat, Mikhael tare cuma da bilang bagini, “Biar jo nanti Tuhan Allah togor pa ngana!”

¹⁰Mar tu orang-orang yang da se ajar tu ajaran sesat, dorang bahojat samua yang dorang nintau. Dorang ja beking tu hal-hal yang cuma iko tu dong pe mau sandiri, itu sama deng binatang yang beking sesuatu cuma iko dong pe naluri lantaran nyanda ada akal. Deng dorang beking bagitu, dorang beking dorang pe diri binasa.

¹¹Cilaka jo dorang itu! Soalnya dorang da beking tu jaha sama deng Kain da beking tu jaha. Dorang lei da beking dosa sama deng Bileam da beking dosa lantaran suka mo dapa doi imbalan. Dorang da malawang pa Tuhan sama lei deng Korah da malawang pa Tuhan, jadi dorang mo binasa lei sama deng Korah da binasa.

¹²Dorang yang da se ajar tu ajaran sesat, so dorang itu yang beking rusak tu ngoni pe acara makang-makang for mo inga Tuhan Allah pe sayang, dorang sama deng jadi noda di acara itu. Dorang nyanda malo-malo bamakang deng rakus di acara itu, kong dorang cuma pikir dong pe diri sandiri. Dorang sama deng awan yang nyanda bawa ujang. Dorang lei sama deng pohong-pohong yang nyanda babua waktu oras babua, so itu tacabu sampe pa de pe akar-akar, sampe mati sama skali.

¹³Dorang itu se lia dorang pe kalakuan besae yang beking dorang jadi malo, sama deng buih dari omba laut yang ganas. Dorang itu lei sama deng bintang-bintang tu pinda kasana-kamari, kong for dorang itu so tasadia tampa yang paling glap for slama-lamanya.

¹⁴Ada tu Adam pe keturunan katuju tu de pe nama Henokh. Henokh da dapa pesan dari Tuhan Allah tentang apa tu mo jadi nanti pa tu orang-orang skarang yang da se ajar tu ajaran sesat. Kong dia bilang tu pesan bagini, “Tarukira jo bae-bae, Tuhan mo datang deng Dia pe ribuan malaekat yang kudus.

¹⁵Dia datang for mo adili samua orang, deng lei Dia mo hukum samua orang yang hidop jao dari pa Tuhan Allah. Dia mo hukum pa dorang yang hidop jao dari pa Tuhan Allah lantaran samua dorang pe kalakuan yang jaha, deng lantaran dong pe kata-kata kasar tentang Tuhan.”

¹⁶Dorang itu ja babafeto, ja bamengelu, dorang cuma hidop iko dorang pe nafsu yang besae. Dorang bilang tu kata-kata for angka dong pe diri sandiri, dorang cari muka pa orang supaya bole dapa untung.

¹⁷Sudara-sudara yang kita sayang, ngoni inga jo apa yang rasul-rasul tu Tuhan Yesus Kristus pe utusan-utusan so perna da bilang tu mo jadi nanti.

¹⁸Dorang da bilang pa ngoni bagini, “Kalu nanti waktu so mo kiamat, mo muncul tu orang-orang yang pangbahina, dorang yang ja iko tu dong pe nafsu yang besae.”

¹⁹Dorang itu no tu ja beking orang-orang percaya baku ambe sampe jadi tapisa-pisa. Dorang hidop iko tu dunia pe mau, kong nyanda ada Roh Kudus pa dorang itu.

²⁰Mar ngoni tu kita pe sudara-sudara yang kita sayang, ngoni musti brusaha se kuat tu ngoni pe percaya, ngoni pe percaya pa Dia itu kudus. Basombayang jo pake kuasa dari Roh Kudus.

²¹Tuhan Allah sayang pa ngoni, kong ngoni musti tetap hidop basandar pa Dia pe sayang itu. Ngoni basandar pa Dia pe sayang waktu ngoni samantara batunggu tu Tuhan Yesus Kristus se tunjung tu Dia pe rasa kasiang pa ngoni, kong itu no yang mo bawa pa ngoni mo dapa tu hidop kekal.

²²Ngoni lei musti se tunjung tu rasa kasiang pa orang-orang yang masi ragu-ragu percaya.

²³Ngoni lei musti tolong tu orang-orang yang so sesat supaya dorang bole slamat, itu sama deng ngoni da hela pa dorang kaluar dari api. Kong pa orang laeng lei ngoni musti kase tunjung tu rasa kasiang, mar ngoni musti hati-hati supaya nyanda taiko beking dosa sama deng dorang, sama deng ngoni binci tu dong pe baju yang so kotor.

²⁴Tuhan yang mampu jaga pa ngoni supaya ngoni nyanda jatung kong jadi nyanda percaya lei pa Dia. Dia mo bawa pa ngoni di muka pa Dia yang luar biasa, kong di muka pa Dia nyanda ada yang mo se sala pa ngoni, ngoni mo snang skali.

²⁵So itu, puji jo pa Tuhan Allah, Dia itu cuma satu. Dia yang kase slamat pa torang lewat Yesus Kristus tu torang pe Tuhan. Dia itu luar biasa, Dia Mahabasar, Dia ada kuasa for baator deng baprenta. Dia itu tetap bagitu dari tu dunia blum ada, skarang deng sampe slama-lamanya. Amin.