Read Malay, Manado Wahyu 10 Bible Online

Wahyu 10 - Malay, Manado bible

Wahyu 10

¹Kong kita lia ada satu malaekat laeng yang kuat turung dari sorga. Dia pe badan tabungkus deng awan, kong pelangi ada balingkar pa de pe kapala. Dia pe muka bacahaya sama deng matahari, kong de pe kaki dapa lia sama deng tiang dari api.

²Kong pa dia pe tangan ada satu gulungan kitab kacili yang da tabuka. Dia pe kaki kanan da bainjang di laut kong de pe kaki kiri da bainjang di darat.

³Kong dia bataria deng suara kuat sama deng singa yang da mengaum. Abis dia bataria, tu tuju guntur babicara deng suara kuat.

⁴Serta tu tuju guntur klar babicara, kita mo tulis apa tu guntur da bilang, cuma kita dapa dengar ada suara dari sorga yang babilang, “Ngana jang tulis itu! Ngana musti se rahasia apa tu tuju guntur itu da bilang.”

⁵Abis itu, tu malaekat yang kita da lia da badiri tu de pe kaki satu di laut deng de pe kaki laeng di darat itu, dia angka de pe tangan kanan ka langit,

⁶trus dia basumpa demi Dia yang hidop slama-lamanya, Dia yang so beking langit deng samua tu ada di situ, bumi deng de pe isi, deng lei laut deng de pe isi. Dia basumpa, “Tuhan so nyanda mo tunda for beking tu Dia pe rencana.”

⁷Nanti waktu tu malaekat katuju tiop tu de pe trompet, waktu itu no Tuhan Allah mo se gnap tu Dia pe rencana yang rahasia. Tu rencana rahasia itu yang Dia so kase tau dari dulu pa Dia pe nabi-nabi tu ja kase tau Dia pe pesan pa orang-orang.

⁸Abis itu, kita dengar tu suara yang sama deng tadi dari sorga babilang pa kita, “Pigi jo kong ambe tu gulungan kitab yang da tabuka di tangan pa malaekat yang da badiri di atas laut deng darat itu.”

⁹So itu kita pigi pa tu malaekat itu, trus kita minta pa dia supaya kase tu gulungan kitab kacili itu pa kita. Kong dia babilang pa kita, “Ambe jo, kong makang jo ini! Tu gulungan kitab ini mo beking ngana pe puru rasa pait, mar pa ngana pe mulu mo rasa manis sama deng madu pe manis.”

¹⁰Kong kita ambe tu gulungan kitab kacili itu dari pa malaekat itu pe tangan, trus kita makang. Pa kita pe mulu, tu gulungan itu dapa rasa manis sama deng madu, mar serta kita tlang tu gulungan itu, pa kita pe puru dapa rasa jadi pait.

¹¹Abis itu, ada suara yang prenta pa kita, “Ngana musti kase tau ulang pa orang-orang apa tu mo jadi nanti. Ngana kase tau itu pa orang-orang, pa suku-suku bangsa, pa orang-orang yang pake macam-macam bahasa, deng lei pa raja-raja.”