Read Malay, Manado Wahyu 11 Bible Online

Wahyu 11 - Malay, Manado bible

Wahyu 11

¹Abis itu, ada yang kase pa kita satu batang kayu yang de pe model sama deng tu alat yang ja pake for baukur. Kong Tuhan Allah prenta pa kita bagini, “Yohanes, bangong jo kong pi ukur tu Kita pe Ruang Mahasuci deng tu tampa korban persembahan, kong rekeng lei brapa tu orang yang ja semba pa Kita.

²Mar ngana jang ukur tu kintal yang di luar dari tu Ruang Mahasuci itu, lantaran tu tampa itu so kase for bangsa-bangsa yang nyanda kanal pa Kita. Kong slama ampa pulu dua bulan, dorang mo kuasai tu Yerusalem tu kota yang suci itu.

³Kita lei mo kase kuasa pa Kita pe dua saksi, kong dorang dua itu mo kase tau tu Kita pe pesan pa orang-orang slama sribu dua ratus anam pulu hari, kong slama itu dorang mo pake baju berkabung lantaran sedi deng tu kota itu.”

⁴Tu dua saksi itu sama deng tu dua pohong zaitun deng tu dua tiang tampa ja taru akang pelita yang ada di muka pa Tuhan Allah yang pegang kuasa di sluru dunia.

⁵Kalu ada orang yang mo beking tu jaha pa dorang dua itu, dari pa dorang pe mulu mo kaluar api yang mo se angus tu dong pe musu-musu itu. Deng cara bagitu no tu orang yang mo beking jaha pa dorang dua itu mo mati.

⁶Waktu dorang kase tau tu Tuhan pe pesan pa orang-orang, Tuhan kase kuasa pa dorang. Dorang dapa kuasa for beking tu ujang nyanda turung dari langit, itu sama deng dorang dapa kuasa for tutu tu langit. Dorang dapa kuasa for beking samua aer bruba jadi dara, deng lei dapa kuasa for beking samua malapetaka di bumi. Kong tiap kali dorang suka tu malapetaka mo jadi, itu pasti jadi.

⁷Kalu dorang dua so klar kase tau tu Tuhan pe pesan, ada binatang buas kaluar dari jurang maut tu tampa ja tahang akang setang-setang. Kong tu binatang buas itu srang deng se kala pa dorang kong bunung pa dorang.

⁸Kong tu dua saksi itu pe mayat mo tabiar-biar di jalang raya di kota basar itu. Tu kota basar itu no tu tampa dorang pe Tuhan da se salib akang. Tu orang-orang di kota itu pe kalakuan jaha, jadi orang ja bilang lei kota itu kota Sodom deng Mesir.

⁹Orang-orang dari samua fam, suku bangsa, bahasa deng bangsa mo lia-lia tu dorang dua pe mayat itu slama tiga hari stenga. Kong orang-orang itu nyanda mo kase isin kubur tu dorang dua pe mayat.

¹⁰Samua orang tu ada di dunia mo snang lantaran tu dua saksi itu so mati. Dorang samua mo beking pesta kong lei baku kase kado, lantaran tu dua saksi itu so beking samua orang di bumi dapa banya siksa.

¹¹Mar serta so lewat tiga hari stenga, Tuhan Allah kase akang nafas hidop pa tu dua saksi itu sampe dorang dua badiri. Kong samua orang yang da lia dorang dua itu so hidop ulang jadi tako skali.

¹²Tu dua orang saksi itu dapa dengar suara yang pe kuat skali dari sorga babilang pa dorang, “Nae jo kamari!” Kong dorang dua nae ka sorga, samantara itu awan tutu pa dorang. Waktu itu, dorang pe musu-musu da lia tu samua itu.

¹³Waktu itu jo ada tana goyang pe kuat skali kong sepersepulu dari kota itu ancor. Ada tuju ribu orang mati lantaran tu tana goyang itu, kong tu orang-orang laeng yang da slamat jadi tako skali, trus dorang puji deng hormat pa Tuhan Allah yang ada di sorga.

¹⁴Deng bagitu tu malapetaka kadua so lewat. Mar co ngoni lia, tu malapetaka yang katiga so nyanda lama lei so mo datang.

¹⁵Tu malaekat yang katuju tiop de pe trompet, kong kita dengar suara-suara yang pe kuat skali dari sorga babilang, “Skarang yang berkuasa di dunia ini, cuma tu torang pe Tuhan deng Kristus tu Raja yang mo se slamat pa manusia. Dia itu mo baprenta sbagai Raja sampe slama-lamanya.”

¹⁶Kong tu dua pulu ampa tua-tua yang da dudu pa dorang pe tahta di muka pa Tuhan Allah, dorang berlutut sampe dong pe muka kana di tana di muka pa Tuhan Allah, kong dorang semba pa Tuhan Allah.

¹⁷Dorang bilang, “Torang bilang makase pa Tuhan Allah Yang Mahakuasa! Dia itu Tuhan yang dari dulu ada sampe skarang. Torang bilang makase lantaran Tuhan so pake tu Tuhan pe kuasa yang basar, kong so mulai baprenta sbagai Raja.

¹⁸Samua suku bangsa yang nyanda percaya so mara, mar tu waktu for Tuhan se tunjung Dia pe mara pa tu suku-suku itu so sampe, kong lei so de pe waktu for Tuhan mo adili orang-orang yang so mati. Trus so de pe waktu lei for Tuhan mo kase akang upah: pa tu orang-orang yang ja beking tu Dia da suru, pa nabi-nabi tu ja kase tau Tuhan pe pesan pa orang-orang, pa orang-orang yang dong pe hati bersi di muka pa Tuhan, deng lei pa orang-orang yang hormat pa Dia, biar itu orang yang nyanda penting ato orang yang penting. Kong waktu itu lei, Dia mo se binasa sapa jo yang da se binasa tu bumi.”

¹⁹Abis itu, kita dapa lia di sorga tu Tuhan Allah pe Ruang Mahasuci tabuka, kong kita lia tu Dia pe tabut perjanjian ada di Ruang Mahasuci itu. Trus ada kilat yang bapancar deng bunyi guntur yang pe kras, ada lei tana goyang deng ujang es yang kras skali.