Read Malay, Manado Wahyu 12 Bible Online

Wahyu 12 - Malay, Manado bible

Wahyu 12

¹Abis itu, kage-kage kita lia tanda yang luar biasa di langit. Di langit dapa lia ada satu parampuang yang de pe badan da tabungkus deng matahari. Dia pe kaki ada di atas bulan, trus pa dia pe kapala ada mahkota yang da beking dari dua blas bintang.

²Dia da hamil kong so sampe de pe waktu for mo melahirkan, so itu dia da bataria lantaran saki mo melahirkan.

³Trus dapa lia lei tanda yang laeng di langit. Dapa lia ada satu naga mera yang basar. Tu naga itu pe kapala ada tuju deng de pe tanduk ada spulu, kong di atas pa de pe tuju kapala itu, masing-masing ada mahkota.

⁴Kong deng dia pe ekor, dia hela sepertiga dari bintang di langit, trus dia lego tu bintang-bintang itu ka bumi. Tu naga itu badiri di muka tu parampuang yang mo melahirkan itu, supaya dia bole mo tlang tu Anak waktu tu parampuang itu melahirkan.

⁵Tu parampuang melahirkan satu Anak laki-laki. Mar ada yang datang kong rampas tu Anak itu, trus bawa tu Anak pa Tuhan Allah deng pa Tuhan pe tahta. Tu Anak itu yang nanti mo baprenta pa samua suku bangsa di bumi pake tongkat besi.

⁶Kong tu parampuang itu lari ka padang gurun, di satu tampa yang Tuhan Allah so se sadia akang for dia. Di situ ada yang mo urus pa dia slama sribu dua ratus anam pulu hari.

⁷Abis itu jadi prang di sorga. Mikhael deng de pe anak bua tu malaekat-malaekat laeng da baprang malawang tu naga deng lei tu malaekat-malaekat yang so jadi tu naga pe anak bua.

⁸Mar tu naga deng de pe anak bua itu kala baprang, sampe dorang samua so nimbole lei tinggal di sorga, dorang musti kaluar dari situ.

⁹Naga yang basar itu no tu ular tua, tu ja bilang setang pe bos ato setang tu ja beking sesat pa orang-orang di sluru dunia. Dia itu da dapa lempar ka bumi sama-sama deng de pe anak bua.

¹⁰Kong kita dengar suara yang kuat di sorga babilang, “Skarang ini so sampe de pe waktu for torang pe Tuhan Allah mo se slamat tu Dia pe orang-orang. Dia mo se tunjung De pe kuasa, Dia mo baprenta sbagai Raja. Deng skarang lei so sampe tu waktu for Kristus tu Raja yang mo se slamat pa manusia dari dulu mo se tunjung tu Dia pe kuasa di dunia. Soalnya tu setang pe bos so dapa lempar kaluar dari sorga. Dia itu yang siang malam ja batudu tu sudara-sudara yang percaya di muka pa Tuhan.

¹¹Kong tu sudara-sudara yang percaya so se kala pa setang pe bos. Dorang da se kala pa dia deng tu Anak Domba itu pe dara, deng dorang se kala lei pa dia pake tu dong pe kesaksian tentang Yesus. Kong dorang so nyanda farduli deng dong pe nyawa sandiri, sampe dorang siap mati.

¹²So itu, snang jo ngoni yang tinggal di sorga, mar ngoni yang tinggal di darat deng di laut mo rasa tu siksa. Soalnya deng mara skali setang pe bos so turung pa ngoni, lantaran dia tau kalu dia pe waktu so mo abis.”

¹³Kong waktu tu naga itu sadar kalu dia so dapa lempar ka bumi, dia pi cari tu parampuang yang da se lahir tu Anak laki-laki itu.

¹⁴Mar ada yang kase akang dua sayap burung rajawali yang basar pa tu parampuang itu, supaya dia bole terbang pa dia pe tampa di padang gurun, tu tampa yang dia mo dapa urus akang slama tiga stenga taong, deng lei tu tampa itu jao dari tu naga pe tampa.

¹⁵Kong tu naga itu kase kaluar aer dari pa de pe mulu. Tu aer yang da bakaluar itu pe banya sama deng satu kuala bapigi pa tu parampuang itu for mo se anyor pa dia.

¹⁶Mar bumi da tolong pa tu parampuang itu. Tu bumi da buka de pe tana sama deng mulu yang da tabuka, kong tu bumi tlang tu aer yang da kaluar dari tu naga pe mulu itu.

¹⁷Abis itu, tu naga jadi mara skali pa tu parampuang itu. So itu dia pi baprang deng tu parampuang itu pe keturunan yang laeng. Dorang itu no tu orang-orang yang iko tu Tuhan Allah pe prenta deng lei yang ja kase tau tu dorang pe kesaksian tentang Yesus.

¹⁸Kong tu naga itu badiri di pante.