Read Malay, Manado Wahyu 13 Bible Online

Wahyu 13 - Malay, Manado bible

Wahyu 13

¹Kong kita lia ada satu binatang buas kaluar dari dalam laut. Tu binatang pe kapala ada tuju kong de pe tanduk ada spulu. Di atas pa de pe tanduk-tanduk itu ada spulu mahkota, kong pa dia pe kapala-kapala da tatulis nama yang bahojat pa Tuhan.

²Binatang yang kita da lia itu, de pe badan pe model sama deng macan tutul. Dia pe kaki sama deng beruang pe kaki, kong de pe mulu sama deng singa pe mulu. Kong tu naga kase tu de pe kekuatan, tu de pe tahta deng tu de pe kuasa yang basar pa tu binatang itu.

³Kong kita lia satu dari tu binatang itu pe kapala ada bekas luka. Tu luka itu bole mo beking mati pa dia, mar tu luka itu so bae. Samua orang yang ada di bumi heran da lia tu binatang itu, kong dorang iko pa binatang itu.

⁴Trus dorang semba pa tu naga lantaran dia da kase kuasa pa tu binatang itu. Dorang lei da semba pa tu binatang deng bilang, “Nyanda ada yang mo sama kuat rupa tu binatang itu pe kuat. Nyanda ada yang mampu mo malawang se kala tu binatang itu.”

⁵Tuhan Allah se biar tu binatang itu for basombong tentang tu binatang pe kuasa deng lei for bahojat pa Tuhan Allah, tu binatang lei dapa kuasa for baprenta slama ampa pulu dua bulan.

⁶Tu binatang mulai bahojat tentang Tuhan Allah, dia bahojat tu Tuhan Allah pe nama, deng dia bahojat tu Tuhan Allah pe tampa tinggal di sorga deng lei samua yang tinggal di sana.

⁷Tuhan Allah lei kase isin pa dia for baprang malawang Tuhan pe orang-orang, kong dia se kala pa dorang. Dia lei dapa kuasa for baprenta samua orang dari samua fam, suku bangsa, bahasa deng bangsa.

⁸Samua orang yang tinggal di bumi mo semba pa tu binatang itu. Dorang itu no tu orang-orang yang dong pe nama nyanda da tulis di dalam buku kehidupan, dari jo ni dunia da beking. Tu buku itu Anak Domba punya, tu Anak Domba yang so dapa bunung.

⁹Sapa yang ada talinga, lebe bae dia badengar jo bae-bae tu brita ini,

¹⁰“Sapa yang memang so ditentukan for mo dapa tahang di bui, dia pasti dapa tangka. Sapa yang memang so ditentukan mo dapa bunung pake peda, dia pasti dapa bunung deng peda.” So itu, tu Tuhan pe orang-orang musti tetap percaya pa Dia deng batahang percaya biar lei dapa siksa.

¹¹Abis itu kita lia lei satu binatang buas laeng kaluar dari dalam bumi. Tu binatang itu ada dua tanduk sama deng tu tanduk dari domba pe anak, kong dia pe suara sama deng naga pe suara.

¹²Kong di muka pa tu binatang yang pertama itu, dia pake samua tu binatang pertama itu pe kuasa. Dia beking samua orang di bumi basemba pa tu binatang yang pertama itu. Tu binatang yang pertama itu ada luka brat, mar so bae.

¹³Tu binatang yang kadua itu beking tanda-tanda yang pe hebat skali, malatare dia sampe da kase turung api dari langit ka bumi di muka pa manusia.

¹⁴Kong deng tu tanda-tanda itu yang dia da beking di muka pa binatang yang pertama itu, dia bole tipu tu orang-orang di bumi for iko pa dia. Dia suru pa dorang beking satu patong rupa tu binatang yang pertama, tu binatang yang so dapa potong deng peda mar tetap da hidop.

¹⁵Kong tu binatang yang kadua itu dapa kuasa for beking tu patong rupa tu binatang yang pertama itu bole babicara deng babunung tu orang-orang yang nyanda semba pa dia.

¹⁶Binatang yang kadua lei suru tiap orang dapa cap pa dorang pe tangan kanan ato testa. Tu orang-orang itu, tu orang yang nyanda penting deng yang penting, tu orang miskin deng kaya, deng lei tu orang yang jadi budak deng yang bebas.

¹⁷Kong nyanda ada satu orang yang bole bajual ato babli apa-apa kalu dia nyanda ada tu cap itu. Tu cap itu ada tatulis tu binatang pertama pe nama ato nomor dari de pe nama.

¹⁸Jadi tu paling penting di sini, orang musti ada hikmat. Sapa yang bijaksana, dia musti cari tau bae-bae tu nomor dari binatang itu lantaran itu nomor dari satu orang pe nama, kong tu nomor itu 666.