Read Malay, Manado Wahyu 14 Bible Online

Wahyu 14 - Malay, Manado bible

Wahyu 14

¹Abis itu, kita lia Anak Domba da badiri di bukit Sion kong ada sratus ampa pulu ampa ribu orang da sama-sama deng Dia. Pa tu orang-orang itu pe testa ada tatulis tu Anak Domba pe nama deng Dia pe Bapa pe nama.

²Kong kita dengar ada suara dari sorga. Tu suara itu pe kuat sama deng tu aer terjun basar, deng tu suara itu pe kras sama deng guntur. Tu suara yang kita da dengar itu sama deng suara musik dari orang-orang yang da bermain kecapi.

³Kong di muka tahta deng di muka ampa mahluk deng tu tua-tua itu, tu sratus ampa pulu ampa ribu orang itu da manyanyi satu lagu baru. Nyanda ada satu orang lei yang bole mo blajar tu lagu itu kacuali tu sratus ampa pulu ampa ribu orang itu. Dorang itu no tu orang-orang yang Tuhan Allah so se slamat dari dunia ini.

⁴Dorang itu hidop deng hati yang bersi, itu sama deng laki-laki yang nyanda perna tidor deng parampuang. Dorang itu yang ja iko pa Anak Domba ka mana jo Dia pigi. Dorang dapa tubus dari antara manusia sbagai persembahan yang paling pertama for Tuhan Allah deng Anak Domba.

⁵Kong dorang itu nyanda perna badusta, kong nyanda ada yang kase sala pa dorang.

⁶Abis itu, kita lia satu malaekat laeng da terbang di langit. Dia itu da bawa Kabar Bae yang kekal, kong dia mo kase tau tu Kabar Bae itu pa orang-orang yang tinggal di bumi, orang dari samua fam, suku bangsa, bahasa deng bangsa.

⁷Tu malaekat itu babicara deng suara kuat, “Ngoni musti tako pa Tuhan Allah, ngoni musti puji deng hormat pa Dia. Soalnya tu waktu for Dia mo adili samua orang so sampe. Semba jo pa Dia yang da beking langit, bumi, laut deng samua mata aer.”

⁸Abis itu, datang satu malaekat laeng, tu malaekat yang kadua. Kong tu malaekat kadua itu babilang, “So ancor, so ancor tu kota basar Babel itu! Tu orang-orang di kota Babel itu so pengaruhi samua suku bangsa di bumi supaya ja iko tu de pe keinginan yang cabul, itu sama jo deng dorang so kase minum anggor pa samua suku bangsa sampe mabo kong beking yang nyanda pantas mo beking.”

⁹Abis itu, datang lei tu malaekat laeng, malaekat yang katiga. Tu malaekat katiga itu babilang deng suara kuat, “Sapa jo yang semba pa tu binatang buas deng tu binatang itu pe patong, deng sapa jo yang trima tu cap dari tu binatang itu pa dia pe testa ato tangan,

¹⁰Tuhan Allah mo mara skali pa orang-orang itu. Dia mo hukum deng kejam pa dorang, itu sama deng dorang da minum tu anggor asang yang da saleng di glas tu nyanda da campur akang apa-apa. Kong dorang mo dapa siksa pake api deng belerang di muka pa tu malaekat-malaekat yang kudus deng di muka pa Anak Domba.

¹¹Asap dari tu api yang beking siksa pa dorang itu mo ada trus sampe slama-lamanya. Dorang itu yang ja semba tu binatang buas itu deng de pe patong, deng lei sapa-sapa yang da trima cap dari tu binatang itu pe nama, dorang samua itu mo dapa siksa trus siang deng malam.”

¹²Jadi itu samua pe maksut: tu Tuhan pe orang-orang musti tetap batahang percaya biar lei dapa siksa, dorang itu yang tetap ja iko tu Tuhan pe prenta deng percaya trus pa Yesus.

¹³Kong kita dengar suara dari sorga yang babilang, “Yohanes, tulis jo ini: mulai skarang, kalu tu orang-orang percaya pa Tuhan mati, dorang itu yang paling snang!” Kong Tuhan pe Roh babilang, “Butul, dorang mo snang! Dorang itu ja layani pa Tuhan biar rasa siksa skali kong skarang dorang bole istirahat dari samua tu dorang da beking itu, lantaran laporan tentang samua yang dorang da beking di bumi mo ada sama-sama deng dorang di sorga.”

¹⁴Abis itu kita lia ada satu awan puti, kong di atas awan itu da dudu satu orang. Dia yang sama deng Anak Manusia. Pa Dia pe kapala ada mahkota yang da beking dari mas, deng Dia da pegang satu sabit tajang.

¹⁵Trus ada malaekat laeng kaluar dari Tuhan Allah pe Ruang Mahasuci. Tu malaekat itu babilang deng suara kuat pa Dia yang da dudu di atas awan itu, “Kase ayun jo tu ngana pe sabit itu for mo bapotong, lantaran tu waktu for bapanen so sampe, tu hasil-hasil tanaman di bumi so siap mo panen.”

¹⁶Kong Dia yang da dudu di atas awan itu kase ayun tu De pe sabit ka atas bumi for bapanen, trus ambe tu hasil-hasil di bumi.

¹⁷Abis itu, di sorga ada satu malaekat laeng kaluar lei dari Tuhan Allah pe Ruang Mahasuci. Dia da pegang lei satu sabit yang tajang.

¹⁸Trus ada satu malaekat laeng lei datang dari tu tampa korban persembahan. Dia itu yang dapa kuasa for jaga tu api di situ. Kong dia babicara deng suara kuat pa tu malaekat yang da pegang sabit tajang itu, dia bilang, “Kase ayun jo tu ngana pe sabit yang tajang itu for panen tu bua-bua di pohong anggor yang ada di bumi, lantaran tu bua-bua anggor itu so masa.”

¹⁹Abis itu, tu malaekat kase ayun tu de pe sabit ka atas bumi, trus dia kumpul tu bua-bua anggor. Dia kase lempar tu bua-bua itu ka tampa ja peras akang anggor, tu tampa itu tu tampa murka dari Tuhan Allah bahukum akang orang.

²⁰Tu tampa peras anggor itu ada di luar kota. Kong tu bua-bua anggor itu ja peras deng cara ja injang-injang, bagitu lei deng tu orang-orang yang nyanda iko pa Tuhan, dorang itu mo dapa hukum deng brat skali sampe kaluar tu dong pe dara. Tu dara yang da bakaluar pe banya skali sama deng aer di kuala ja mengalir, kong tu dara yang bakaluar itu pe panjang tiga ratus kilometer, trus de pe dolong amper dua meter, itu sama deng mo ukur dari tana sampe pa kuda pe mulu.