Read Malay, Manado Wahyu 19 Bible Online

Wahyu 19 - Malay, Manado bible

Wahyu 19

¹Abis itu, kita dengar rupa ada suara yang pe kuat dari orang banya skali yang da bakumpul di sorga, dorang babilang, “Haleluya, puji jo pa Tuhan! Dia itu torang pe Tuhan Allah, Dia yang kase slamat, Dia itu Tuhan yang luar biasa, deng Dia yang berkuasa!

²Soalnya Dia ja baadili orang deng cara yang butul deng adil. Dia so kase hukuman pa tu Babel yang top lantaran de pe orang-orang pe kalakuan yang besae. Tu kota itu bole mo se sama deng tu parampuang nakal, yang da beking rusak ni dunia deng de pe kalakuan cabul. Kong Tuhan lei balas tu parampuang itu, lantaran dia yang da bunung tu orang-orang yang ja beking tu Tuhan da suru.”

³Kong for kadua kali dorang babilang, “Haleluya, puji jo pa Tuhan! Asap dari api yang da bakar tu kota itu nae trus sampe slama-lamanya!”

⁴Kong tu dua pulu ampa tua-tua deng ampa mahluk itu berlutut kong semba pa Tuhan Allah yang dudu di atas tahta, dorang babilang, “Haleluya, puji jo pa Tuhan Allah! Amin.”

⁵Kong kita dengar suara dari tu tahta itu babilang, “Puji jo tu torang pe Tuhan Allah, hei ngoni samua orang yang ja beking tu Dia da suru, ngoni yang tako pa Dia, ngoni tu orang yang nyanda penting deng tu orang yang penting.”

⁶Abis itu, kita dengar rupa ada suara yang pe kuat dari orang banya skali yang da bakumpul. Suara itu pe kuat sama deng bunyi aer terjun yang basar deng lei sama deng guntur pe bunyi pe kuat. Tu suara itu babilang, “Haleluya, puji jo pa Tuhan Allah! Soalnya Tuhan, tu torang pe Allah Yang Mahakuasa, so Dia yang berkuasa.”

⁷“Mari jo torang samua bersukacita deng snang skali, kong puji deng hormat pa Dia. Soalnya so sampe tu waktu for tu Anak Domba mo kaweng, kong tu Anak Domba pe pengantin parampuang lei so siap.

⁸Tuhan Allah kase isin pa tu pengantin parampuang itu mo pake kaeng lenan yang bagus deng yang puti bamangkilat.” (Tu kaeng alus yang bagus, itu no tu perbuatan-perbuatan yang butul dari tu Tuhan pe orang-orang.)

⁹Kong tu malaekat babilang pa kita, “Tulis jo bagini, ‘Tu orang-orang yang dapa undang pa Anak Domba pe pesta kaweng, dorang itu yang paling snang.’ ” Trus tu malaekat babilang lei pa kita, “Tu kita da bilang ini tu Tuhan Allah pe kata-kata, tu Dia pe kata-kata itu butul.”

¹⁰Kong kita berlutut di muka pa malaekat itu pe kaki for semba pa dia, mar dia bilang pa kita, “Ngana jang semba pa kita! Semba jo pa Tuhan Allah! Soalnya kita ini sama deng ngana, torang dua cuma ja beking tu Tuhan da suru, trus torang lei sama deng tu sudara-sudara yang laeng yang ja beking tu Tuhan da suru. Torang samua ini yang ja kase tau kesaksian tentang Yesus. Soalnya sapa jo yang kase tau tu kesaksian itu, dia itu butul-butul ja kase tau Tuhan Allah pe pesan.”

¹¹Abis itu kita lia sorga tabuka, di situ ada satu kuda puti, trus di atas tu kuda itu ada yang da dudu, Dia pe nama ‘Yang Setia’ deng ‘Yang Butul’. Dia itu adil waktu bahakimi deng baprang.

¹²Dia pe mata babamanyala sama deng api, deng di atas pa De pe kapala ada banya mahkota. Pa Dia ada tatulis satu nama, kong tu nama itu nyanda ada yang tau, cuma Dia sandiri yang tau.

¹³Dia da pake juba tu da se colo di dara, kong Dia pe nama ja bilang ‘Firman Allah’.

¹⁴Samua tentara di sorga iko pa Dia. Dorang da nae kuda puti deng da pake baju puti yang da beking dari kaeng alus yang bagus tu ja bilang lenan.

¹⁵Dari pa Dia pe mulu kaluar satu peda tajang, kong deng Dia pe peda itu, Dia mo se kala tu suku-suku bangsa. Dia mo baprenta pa dorang pake kekuatan yang basar sama deng da pake tongkat besi. Dia mo se tunjung tu Tuhan Allah Yang Mahakuasa pe murka yang hebat pa Tuhan Allah pe musu-musu, itu sama deng orang injang-injang tu bua anggor for mo peras tu anggor.

¹⁶Pa Dia pe juba deng pa Dia pe pala-pala ada tatulis satu nama, ‘Raja dari samua raja, deng Tuhan dari samua tuhan.’

¹⁷Kong kita lia satu malaekat badiri di atas matahari. Tu malaekat itu babilang deng suara kuat pa samua burung yang terbang tinggi di langit, “Mari jo kamari kong bakumpul for iko tu Tuhan Allah pe pesta makang yang basar!

¹⁸Deng bagitu ngoni bole makang samua orang pe daging, tu daging dari: raja-raja, kapala-kapala perwira, tentara-tentara, orang-orang yang ja nae kuda deng dorang pe kuda-kuda. Ngoni bole makang daging dari samua orang: dari orang yang jadi budak deng orang bebas, dari orang yang nyanda penting deng orang yang penting.”

¹⁹Kong kita lia tu binatang buas, tu raja-raja di dunia sama-sama deng dong pe tentara so bakumpul. Dorang mo baprang malawang Dia yang da dudu di atas tu kuda puti itu deng Dia pe tentara-tentara.

²⁰Kong Dia deng Dia pe tentara-tentara tangka tu binatang buas itu sama-sama deng tu nabi palsu. Tu nabi palsu itu yang so perna da beking tanda-tanda ajaib pake tu binatang pe kuasa. Deng dia beking tu tanda-tanda ajaib itu, dia beking sesat tu orang-orang yang so trima tu binatang pe tanda deng lei pa orang-orang yang so semba tu binatang pe patong. Kong skarang, tu binatang deng tu nabi palsu itu dapa buang hidop-hidop ka dalam lautan api belerang yang basar tu da babamanyala.

²¹Kong Dia yang da dudu di atas tu kuda puti itu bunung lei tu binatang pe tentara laeng pake peda yang da kaluar dari pa Dia pe mulu. Abis itu, samua burung datang trus makang dorang pe daging sampe kanyang.