Read Malay, Manado Wahyu 20 Bible Online

Wahyu 20 - Malay, Manado bible

Wahyu 20

¹Kong kita lia satu malaekat turung dari sorga. Tu malaekat itu da pegang kunci jurang maut deng rante yang basar.

²Dia tangka tu naga, tu ular tua itu, tu ja bilang setang pe bos ato tu ja se sesat orang. Dia ika tu naga itu for sribu taong,

³trus dia kase lempar tu naga itu ka dalam jurang maut tu tampa ja tahang akang setang-setang. Abis itu dia kunci tu jurang maut itu kong segel pa de pe atas, supaya tu naga so nyanda lei mo se sesat pa suku-suku bangsa slama sribu taong. Kong serta so abis tu sribu taong, tu malaekat musti mo se lapas ulang pa tu naga mar de pe waktu cuma nyanda lama.

⁴Trus kita lia ada tahta-tahta. Kong ada orang-orang yang da dudu di atas tu tahta-tahta, dorang itu no tu da dapa kuasa for mo adili pa orang. Kita lia lei ada orang-orang pe jiwa, tu jiwa-jiwa dari orang-orang yang dulu da dapa potong akang kapala lantaran ja kase tau tu kesaksian tentang Yesus deng lei Tuhan Allah pe firman. Dorang itu no yang nyanda ja semba tu binatang buas deng tu binatang itu pe patong, dorang lei nyanda perna trima cap dari tu binatang pa dorang pe testa ato tangan. Tuhan se hidop ulang pa dorang, kong dorang baprenta sbagai raja sama-sama deng Kristus slama sribu taong.

⁵Dorang itu no tu pertama yang Tuhan Allah da se hidop ulang dari antara tu orang-orang yang so mati. Selain dari dorang itu, nyanda ada yang Tuhan se hidop ulang. Nanti kalu tu sribu taong so klar, baru Tuhan mo se hidop ulang tu orang-orang laeng yang so mati.

⁶Dorang tu pertama yang Tuhan da se hidop ulang, dorang itu yang paling snang deng dorang itu orang kudus. Dorang nyanda mo rasa tu kematian kadua. Mar dorang mo jadi imam-imam yang ja layani pa Tuhan Allah deng Kristus, kong dorang lei mo baprenta sbagai raja sama-sama deng Kristus slama sribu taong.

⁷Serta tu waktu sribu taong itu so klar, malaekat kase bebas tu setang pe bos itu dari de pe bui di jurang maut.

⁸Kong tu setang pe bos itu mo pi beking sesat tu suku-suku bangsa yang ada di sluru dunia, tu suku-suku bangsa itu ja bilang deng nama Gog deng Magog. Setang pe bos mo kumpul tu orang-orang yang dia da pengaruhi itu for pi baprang. Kong dorang pe jumla itu, de pe banya sama deng paser di laut.

⁹Dorang pigi ka sluru daratan di bumi kong kepung tu kota yang Tuhan sayang, tu tampa tinggal dari tu Tuhan pe orang-orang. Mar ada api dari langit turung kong bakar se angus pa dorang.

¹⁰Kong tu setang pe bos yang ja beking sesat pa orang-orang dapa lempar ka lautan api belerang. Tu binatang buas deng nabi palsu so ada lei di lautan api itu, kong dorang samua dapa siksa di situ siang deng malam sampe slama-lamanya.

¹¹Kong kita lia satu tahta puti yang basar deng Dia yang da dudu di atas tahta itu. Trus di muka pa Dia itu, tu langit deng bumi ilang sampe so nyanda dapa lei tu dong pe tampa.

¹²Kong kita lia orang-orang yang so mati, orang yang penting deng orang yang nyanda penting da badiri di muka tu tahta. Waktu itu tu buku-buku da tabuka, tu buku yang da tulis akang samua tu manusia perna da beking. Kong ada lei satu buku laeng yang da tabuka, tu buku kehidupan yang da tulis akang tu nama-nama dari orang yang mo trima tu hidop kekal. Trus tu orang-orang mati itu mo dapa adili iko apa tu dorang da beking yang da tatulis di buku-buku itu.

¹³Tu laut srahkan tu orang yang da mati di situ. Tu maut deng lei tu krajaan maut tu tampa orang mati srahkan lei tu orang-orang mati yang ada di tampa itu. Kong tu orang-orang mati itu masing-masing da dapa adili iko tu dorang da beking.

¹⁴Abis itu, tu maut deng tu krajaan maut da dapa lempar ka lautan api. Tu lautan itu no tampa hukuman tu kematian yang kadua.

¹⁵Tiap orang yang de pe nama nyanda ada tatulis di buku kehidupan itu, dia dapa lempar ka dalam lautan api itu.