Read Malay, Manado Wahyu 21 Bible Online

Wahyu 21 - Malay, Manado bible

Wahyu 21

¹Kong kita tu Yohanes lia ada langit deng bumi yang baru lantaran tu langit deng bumi yang pertama so nyanda ada, deng laut lei so nyanda ada.

²Kita lia lei kota yang kudus, tu Yerusalem baru, turung dari sorga dari pa Tuhan Allah. Tu kota itu da rias sama deng tu pengantin parampuang da se barias for de pe pengantin laki-laki.

³Kong kita dengar suara pe kuat skali dari tu tahta itu da babilang, “Tarukira jo bae-bae, Tuhan Allah pe tampa tinggal[5] so ada di tenga-tenga pa manusia. Dia mo tinggal sama-sama deng manusia kong dorang mo jadi Dia pe orang-orang. Dia sandiri yang mo sama-sama trus deng dorang, Dia mo jadi dorang pe Tuhan Allah.

⁴Dia mo seka samua aer mata dari dong pe mata. So nyanda ada lei yang mo mati, nyanda ada lei yang mo rasa sedi ato mo manangis, kong so nyanda ada lei yang mo saki. Soalnya samua yang lama itu so nyanda ada lei.”

⁵Dia yang dudu di atas tahta itu babilang, “Tarukira jo bae-bae, Kita beking samua hal jadi baru!” Kong Dia bilang pa kita, “Tulis jo itu samua! Soalnya samua tu kata-kata itu bole mo percaya deng samua itu butul.”

⁶Dia bilang lei pa kita, “Itu samua so jadi. Kita ini tu Alfa deng Omega, tu de pe arti Kita Yang Pertama deng Yang Terakhir. Sapa jo yang aus, Kita mo kase minum aer deng cuma-cuma pa dia, tu aer yang kase hidop kekal.

⁷Sapa yang menang dari tu kuasa jaha, dia itu mo dapa samua berkat yang Kita da bilang ini. Kong Kita mo jadi dia pe Tuhan Allah, trus dia mo jadi Kita pe anak.

⁸Mar ada orang-orang yang mo dapa hukum: tu orang yang panako, orang yang nyanda percaya, orang yang ja beking tu hal-hal yang caparuni, orang yang ja babunung orang, orang yang baseks bebas, orang yang ja pake pokos-pokos, orang yang ja basemba opo-opo, deng samua orang yang pangbadusta, dorang samua itu mo dapa lempar ka lautan api belerang yang babamanyala. Ini no tu kematian yang kadua.”

⁹Abis itu, datang satu dari tuju malaekat yang da pegang tuju cawan tu de pe isi punung deng tuju malapetaka terakhir. Tu malaekat itu babilang pa kita, “Mari jo kamari! Kita mo se tunjung pa ngana tu Anak Domba pe pengantin parampuang.”[6]

¹⁰Trus Tuhan Allah pe Roh kuasai pa kita kong bawa ka gunung yang pe basar skali. Di sana tu malaekat kase tunjung tu Tuhan Allah pe kota kudus tu Yerusalem, kong tu kota itu samantara turung dari sorga dari pa Tuhan Allah.

¹¹Tuhan Allah pe luar biasa yang se sinar tu kota itu. Tu sinar dari tu kota itu sama deng tu permata paling berharga pe sinar, sama deng tu permata yaspis pe sinar, kong de pe bening sama deng kristal pe bening.

¹²Tu kota itu da kliling akang deng dinding beton. Kong de pe dinding beton pe basar deng tinggi. Dia pe pintu gerbang ada dua blas, kong di masing-masing pintu gerbang itu ada satu malaekat yang bajaga. Di tiap pintu itu ada tatulis satu suku pe nama, tu satu suku dari tu dua blas suku Israel.

¹³Dari tu dua blas pintu itu, ada tiga pintu di sabla timur, tiga pintu di sabla utara, tiga pintu di sabla slatan, deng tiga pintu lei di sabla barat.

¹⁴Tu dinding beton yang da bakliling tu kota itu da se badiri di atas dua blas batu fondasi yang basar. Kong di tiap batu itu, masing-masing da tatulis satu nama dari tu Anak Domba pe dua blas rasul tu Dia pe utusan.

¹⁵Tu malaekat yang da babicara pa kita, dia ada satu tongkat yang da beking dari mas tu ja pake for baukur. Dia pake tu tongkat itu for mo ukur tu kota, tu kota pe pintu-pintu gerbang deng tu dinding beton yang da bakliling tu kota itu.

¹⁶Tu kota itu pe model segi ampa, kong de pe ukuran panjang deng lebar sama. Tu malaekat ukur tu kota pake tu tongkat mas itu. Tu kota pe panjang 12.000 stadia ato kira-kira 2.400 kilometer, bagitu lei deng tu kota itu pe panjang, lebar deng tinggi, masing-masing 12.000 stadia ato kira-kira 2.400 kilometer.

¹⁷Abis itu, dia lei ukur tu kota itu pe dinding beton pe tabal. Tu dinding itu pe tabal kira-kira 144 hasta ato kira-kira 66 meter. Tu ukuran tu malaekat da pake itu sama deng tu ukuran yang manusia biasa ja pake.

¹⁸Tu dinding beton itu da beking dari batu permata yaspis. Kong tu kota itu da beking dari mas murni, kong bening sama deng kaca.

¹⁹Tu dinding batu dari tu kota itu pe fondasi da beking dari sgala macam batu permata. Tu fondasi pertama da beking dari batu yaspis, fondasi kadua dari batu nilam, fondasi katiga dari batu mirah, fondasi kaampa dari batu zamrud,

²⁰fondasi yang kalima da beking dari batu unam, fondasi kaanam dari batu sardis, fondasi katuju dari batu ratna cempaka, fondasi kadlapan dari batu beril, fondasi kasambilan dari batu krisolit, fondasi kaspulu dari batu krisopras, fondasi kaseblas dari batu lazuardi, trus tu fondasi kadua blas dari batu kecubung.

²¹Tu kota itu pe dua blas pintu gerbang da beking dari dua blas mutiara, tiap pintu da beking dari satu mutiara. Kong tu kota itu pe jalang-jalang da beking dari mas murni, yang bening sama deng kaca yang murni.

²²Kita nyanda lia ada Ruang Mahasuci di dalam kota itu. Soalnya tu Ruang Mahasuci itu no tu Tuhan Allah, tu Tuhan Yang Mahakuasa deng lei tu Anak Domba itu.

²³Tu kota itu nyanda perlu matahari deng bulan pe sinar for mo kase trang, lantaran Tuhan Allah pe luar biasa yang se sinar tu kota itu sampe tu kota itu jadi trang, kong tu kota pe lampu tu Anak Domba.

²⁴Samua suku bangsa di bumi mo bajalang di trang itu, deng raja-raja di bumi lei mo bawa dong pe kekayaan ka dalam kota itu.

²⁵Tu kota itu pe pintu-pintu gerbang nyanda perna mo tutu spanjang hari, lantaran di sana so nyanda mo ada lei malam.

²⁶Kong suku-suku bangsa mo bawa samua dong pe kekayaan deng dong pe hormat ka kota itu.

²⁷Mar tu hal-hal yang najis, ato tu orang yang ja beking hal-hal yang caparuni ato tu pangbatipu nyanda mo maso ka dalam kota itu. Tu orang yang bole maso ka situ, cuma tu orang yang dong pe nama da tulis di dalam buku kehidupan tu buku yang da tulis akang tu nama-nama yang mo dapa hidop kekal. Tu buku itu Anak Domba punya.