Read Malay, Manado Wahyu 3 Bible Online

Wahyu 3 - Malay, Manado bible

Wahyu 3

¹Kong tu Anak Manusia babilang lei, “Yohanes, ngana tulis lei for malaekat tu da jaga jemaat di Sardis. Ngana tulis jo bagini: Ini kata-kata dari Kita yang punya tuju Roh dari Tuhan Allah deng yang da pegang tu tuju bintang itu. Kita tau samua tu ngoni so beking. Ngoni dapa lia hidop for Kita padahal ngoni sebenarnya nyanda bagitu, itu sama deng ngoni dapa lia hidop mar sebenarnya so mati.

²Jadi ngoni sadar jo deng tu ngoni da beking, ngoni se kuat jo tu ngoni pe percaya yang so mo mati itu. Soalnya Kita tau tu ngoni ja beking itu nyanda butul di muka pa Kita pe Tuhan Allah.

³So itu ngoni inga-inga jo trus tu ajaran yang ngoni so dengar deng trima itu. Ngoni musti iko tu ajaran itu kong bertobat jo. Kalu ngoni nyanda bajaga-jaga sama deng itu, Kita mo datang pa ngoni. Kita mo datang kage-kage sama deng papancuri, ngoni nyanda perna tau tempo apa Kita mo datang for mo adili pa ngoni.

⁴Mar ada jo bebrapa orang di Sardis yang dorang pe hidop lurus, dorang itu sama deng orang yang jaga tu dong pe baju supaya nyanda kotor. Dorang itu nanti mo bajalang sama-sama deng Kita pake baju puti, lantaran dorang memang pantas for itu.

⁵Orang yang menang dari kuasa jaha, dia mo pake baju puti sama deng itu. Kita nyanda mo coret tu orang itu pe nama dari buku kehidupan, tu buku yang da tulis akang nama-nama dari orang-orang yang mo trima tu hidop kekal. Waktu Kita badiri di muka pa Kita pe Bapa deng Dia pe malaekat-malaekat, Kita mo bilang kalu Kita kanal pa tu orang itu.

⁶Sapa ada talinga, lebe bae dia badengar jo apa tu Tuhan pe Roh da kase tau pa jemaat-jemaat.”

⁷Trus tu Anak Manusia babilang lei, “Yohanes, ngana tulis lei for malaekat tu da jaga jemaat di Filadelfia. Ngana tulis jo bagini: Ini kata-kata dari Kita Yang Kudus, Yang Butul, deng lei yang da pegang kunci dari raja Daud.[2] Kita yang bole buka tu pintu, kong nyanda ada yang bole mo tutu tu pintu. Trus Kita lei yang bole mo tutu tu pintu, kong nyanda ada yang bole mo buka tu pintu.

⁸Kita tau apa tu ngoni ja beking. Kita tau kalu ngoni pe pengaru cuma sadiki. Mar biar lei bagitu, ngoni so iko tu Kita pe firman deng lei ngoni nyanda perna manyangkal kalu ngoni kanal pa Kita. Jadi tarukira jo bae-bae, Kita so buka pintu di muka pa ngoni, kong nyanda ada yang bole mo tutu tu pintu.

⁹Ngoni tarukira jo bae-bae, tu orang-orang yang ja iko pa setang pe bos, dorang itu mangaku kalu dorang Tuhan Allah pe orang yang Dia da pili, padahal sebenarnya nyanda, dorang itu cuma da badusta. Ngoni tarukira jo bae-bae, Kita mo suru dorang itu datang berlutut di muka ngoni pe kaki, kong dorang mo tau kalu Kita sayang pa ngoni.

¹⁰Ngoni tetap da batahang percaya pa Kita biar dapa siksa, kong deng bagitu ngoni da beking tu Kita pe prenta. So lantaran itu, nanti komang Kita mo jaga pa ngoni supaya ngoni nyanda rasa tu siksa yang hebat tu mo jadi di sluru dunia ini waktu Tuhan adili samua orang. Tuhan kase tu siksa itu for mo tes samua orang di dunia ini kalu sapa dari antara pa dorang yang memang butul-butul percaya pa Dia.

¹¹Kita so nyanda lama lei mo datang! Ngoni pegang jo trus tu ngoni pe iman supaya nyanda ada orang yang bole mo rampas tu ngoni pe hadia mahkota, tu tanda ngoni so menang.

¹²Sapa yang menang dari tu kuasa jaha, dia itu Kita mo beking jadi tiang yang ada pa Tuhan Allah pe Ruang Mahasuci, itu sama deng dia mo tinggal slama-lamanya di situ pa Tuhan Allah pe Ruang Mahasuci. Kita mo tulis tu Kita pe Tuhan Allah pe nama pa tu orang itu pe diri. Kong Kita lei mo tulis pa dia tu nama kota dari Kita pe Tuhan Allah, tu Yerusalem baru. Tu kota itu Tuhan Allah mo se turung dari sorga. Trus Kita mo tulis lei pa dia tu Kita pe nama baru.

¹³Sapa ada talinga, lebe bae dia badengar jo apa tu Tuhan Allah pe Roh da kase tau pa jemaat-jemaat.”

¹⁴Kong Anak Manusia babilang lei, “Yohanes, ngana tulis akang lei for malaekat tu da jaga jemaat di Laodikia. Ngana tulis jo bagini: Ini kata-kata dari Kita, yang ja bilang Amin tu de pe arti Yang Butul. Kita ini Saksi yang setia deng yang butul. Kita ini tu sumber dari samua tu Tuhan Allah da beking.

¹⁵Kita tau apa tu ngoni ja beking. Ngoni nyanda butul-butul da iko pa Kita, ngoni itu sama jo deng aer lao-lao, ngoni bukang panas ato bukang lei dingin, lebe bae tare ngoni panas ato dingin.

¹⁶Mar lantaran ngoni ini nyanda panas deng lei nyanda dingin mar sama deng aer lao-lao, so itu Kita mo se munta pa ngoni, itu de pe arti Kita mo tolak pa ngoni.

¹⁷Soalnya ngoni bilang bagini, ‘Torang ini orang kaya deng so berhasil, torang nyanda kurang apa-apa,’ padahal ngoni nintau kalu ngoni itu sebenarnya orang yang susa deng pe dapa sayang skali, ngoni itu orang miskin, ngoni buta deng lei talanjang.

¹⁸So itu, Kita se nasehat pa ngoni supaya ngoni bli jo dari pa Kita mas yang so beking murni, deng bagitu ngoni bole butul-butul jadi kaya. Ngoni lei musti bli baju puti supaya ngoni nyanda malo lantaran orang ja lia ngoni batalanjang, kong ngoni lei musti bli obat mata for mo kase obat tu ngoni pe mata supaya ngoni bole balia.

¹⁹Kalu tu orang-orang yang Kita sayang beking sala, dorang itu Kita mo togor deng kase hukuman supaya dorang bertobat jo kong sunggu-sunggu iko pa Tuhan.

²⁰Tarukira jo bae-bae, Kita so badiri di muka pintu kong da batoki tu pintu. Kalu ada orang dengar Kita pe suara kong dia buka akang tu pintu, Kita mo maso deng makang sama-sama deng dia, kong dia lei makang sama-sama deng Kita.

²¹Orang yang menang dari tu kuasa jaha, Kita mo kase dudu dia sama-sama deng Kita pa Kita pe tahta, itu so sama deng Kita so menang dari tu kuasa jaha kong Kita dudu sama-sama deng Kita pe Bapa pa Dia pe tahta.

²²Sapa ada talinga, lebe bae dia badengar jo apa tu Tuhan Allah pe Roh da kase tau pa jemaat-jemaat.”