Read Malay, Manado Wahyu 5 Bible Online

Wahyu 5 - Malay, Manado bible

Wahyu 5

¹Kong kita lia pa Dia yang dudu di tahta itu pe tangan kanan ada satu gulungan kitab. Di bagean dalam deng luar dari tu gulungan kitab itu ada tulisan, kong tu gulungan kitab itu da segel deng tuju metrai.

²Kong kita lia lei satu malaekat yang kuat batanya deng suara kuat, “Sapa yang pantas mo buka tu tuju metrai, trus buka tu gulungan kitab itu?”

³Mar nyanda ada satu orang yang pantas for buka tu gulungan kitab ato mo lia apa yang ada di dalam tu gulungan kitab itu, bae itu yang ada di sorga, di bumi ato di bawa bumi tu tampa for orang mati.

⁴So itu kita sedi skali kong manangis, lantaran nyanda ada satu orang yang pantas mo buka tu gulungan kitab itu ato mo lia tu kitab itu pe dalam.

⁵Trus ada satu dari tu dua pulu ampa tua-tua yang babilang pa kita, “Ngana nyanda usa manangis. Tarukira jo bae-bae, ada tu raja Daud pe keturunan tu ja bilang Singa dari suku Yehuda, Dia itu so menang dari tu kuasa jaha. So itu Dia yang bole mo buka tu tuju metrai itu deng lei tu gulungan kitab itu.”

⁶Abis itu, kita lia satu Anak Domba da badiri di tenga-tenga tu tahta itu kong tu ampa mahluk deng samua tua-tua da bakliling akang pa Dia. Tu Anak Domba itu dapa lia sama deng so perna dapa bunung. Pa Dia itu ada tuju tanduk deng tuju mata. Tu tuju mata itu, itu no tu tuju Roh dari Tuhan Allah yang so dapa utus ka sluru bumi.

⁷Kong tu Anak Domba pi ambe tu kitab itu dari tangan kanan pa Dia yang dudu di atas tahta itu.

⁸Waktu tu Anak Domba ambe tu gulungan kitab itu, tu ampa mahluk deng tu dua pulu ampa tua-tua berlutut di muka pa Dia. Dorang itu masing-masing da pegang satu kecapi deng cawan dari mas. Tu cawan itu pe isi punung deng kemenyan, itu no tu sombayang dari Tuhan pe orang-orang.

⁹Kong dorang manyanyi satu lagu baru, dorang bilang, “Tu Anak Domba ini yang pantas trima tu gulungan kitab itu, deng buka tu de pe metrai-metrai. Soalnya Anak Domba ini so perna dapa bunung, Dia pe dara da pake for tubus tu orang-orang, kong deng bagitu dorang itu jadi Tuhan Allah pe kepunyaan. Dorang itu dari tiap fam, suku bangsa, bahasa deng dari tiap bangsa.

¹⁰Anak Domba ini so beking dorang jadi satu krajaan, jadi imam-imam yang ja beking tu karja yang Tuhan Allah da suru, kong dorang mo baprenta sbagai raja di dunia.”

¹¹Abis itu kita dengar suara dari malaekat yang pe banya skali, kita lia dorang itu ada ribuan sampe jutaan. Dorang ada di sekliling tu tahta, tu ampa mahluk deng tu tua-tua itu.

¹²Dorang da manyanyi deng suara kuat, “Ni Anak Domba yang so perna dapa bunung, Dia yang pantas for trima tu kuasa, tu kekayaan, tu hikmat, tu kekuatan, tu hormat, tu pujian, deng Dia lei luar biasa.”

¹³Abis itu, kita dengar samua mahluk yang ada di sorga, di bumi, di bawa bumi tu tampa for orang mati, deng lei di dalam laut da babilang, “Torang puji deng hormat pa Dia yang dudu di atas tahta deng pa tu Anak Domba. Dia deng tu Anak Domba itu luar biasa deng pegang kuasa sampe slama-lamanya.”

¹⁴Kong tu ampa mahluk itu sama-sama babilang, “Amin!” Trus tu tua-tua berlutut kong basemba.