Read Malay, Manado Wahyu 6 Bible Online

Wahyu 6 - Malay, Manado bible

Wahyu 6

¹Trus kita tu Yohanes lia pa Anak Domba. Dia da buka tu metrai yang pertama dari tu tuju metrai yang ada di gulungan kitab itu. Kong kita dengar mahluk yang pertama dari tu ampa mahluk itu babicara deng suara kuat sama deng guntur pe bunyi, dia bilang, “Mari jo!”

²Kong kita lia ada satu ekor kuda puti. Di atas tu kuda itu ada satu orang yang da dudu pegang pana, kong pa dia itu da kase akang mahkota, trus dia pigi sbagai pemenang for mo menang dari tu de pe musu-musu.

³Abis itu, tu Anak Domba itu buka metrai yang kadua, trus kita dengar mahluk yang kadua babilang, “Mari jo!”

⁴Kong maju satu ekor kuda yang laeng. Tu kuda itu pe warna mera sama deng api pe warna. Trus tu orang yang da nae di atas tu kuda itu da dapa satu peda basar. Dia dapa lei kuasa for ambe tu damai dari bumi, sampe tu orang-orang baku bunung.

⁵Kong tu Anak Domba itu buka metrai yang katiga. Waktu itu, kita dengar mahluk yang katiga babilang, “Mari jo!” Trus kita lia ada satu ekor kuda itang. Di atas tu kuda itu ada satu orang yang da dudu kong dia da pegang satu timbangan.

⁶Trus kita dengar sesuatu sama deng suara dari tenga-tenga pa tu ampa mahluk itu yang babilang, “Satu liter gandum yang bagus, de pe harga satu doi perak, kong tiga liter gandum yang nyanda bagus, de pe harga lei satu doi perak, trus jang beking rusak tu pohong zaitun yang ja se hasil minya deng pohong anggor yang ja se hasil bua anggor.”

⁷Kong tu Anak Domba buka metrai yang kaampa. Waktu itu, kita dengar mahluk yang kaampa babilang, “Mari jo!”

⁸Trus kita lia ada satu ekor kuda yang de pe warna puti pucat, kong ada satu orang yang da nae pa tu kuda itu. Tu orang itu pe nama ‘Maut’. Kong ada lei sesuatu tu ja bilang ‘krajaan maut’ da iko-iko di blakang pa tu orang itu. Dorang dapa kuasa for bunung sprampa manusia di bumi pake peda, pake kelaparan, pake panyaki yang bajangke deng lei pake binatang buas.

⁹Kong tu Anak Domba itu buka tu metrai yang kalima. Waktu itu, kita lia ada orang-orang pe jiwa di bawa tu tampa ja kase korban persembahan pa Tuhan. Itu no tu jiwa-jiwa dari orang-orang yang da dapa bunung lantaran ja kase tau tu Tuhan Allah pe firman, deng lei ja kase tau tu kesaksian tentang Yesus yang ada pa dorang pa orang-orang.

¹⁰Tu jiwa-jiwa itu babilang deng suara kuat, “Ya Tuhan yang Mahakuasa, yang kudus, deng yang butul! Brapa lama lei baru Tuhan mo hakimi kong kase hukuman pa orang-orang di bumi yang da babunung pa torang?”

¹¹Abis itu, tu samua jiwa itu masing-masing da trima juba puti, kong ada yang bilang pa dorang supaya istirahat lei sadiki sampe tu jumla orang yang mo mati dapa bunung so gnap. Soalnya masi ada lei dorang pe tamang-tamang playan deng dorang pe sudara-sudara yang percaya yang nanti mo mati dapa bunung sama deng dorang.

¹²Trus tu Anak Domba buka tu metrai yang kaanam. Waktu itu kita lia ada tana goyang pe kuat skali, tu matahari jadi itang sama deng tu baju warna itang, kong bulan jadi mera sama deng dara pe warna.

¹³Tu bintang-bintang di langit ciri ka bumi, sama deng tu bua ara yang masi manta ciri dari de pe pohong waktu angin ribut da batiop.

¹⁴Kong langit tagulung sama deng gulungan kitab yang da gulung, kong tu gunung-gunung deng pulau-pulau taangka dari pa de pe tampa.

¹⁵Waktu itu, samua orang brusaha basambunyi di goa-goa ato di antara batu-batu karang di gunung, mulai dari tu raja-raja di bumi, pejabat-pejabat, perwira-perwira, orang-orang kaya, orang-orang yang ada kuasa, samua budak deng lei tu orang-orang bebas.

¹⁶Dorang bilang pa gunung-gunung deng batu-batu itu, “Tutu jo pa torang deng se sambunyi akang pa torang dari pa Dia yang dudu di tahta itu deng lei dari tu hukuman brat yang Anak Domba mo kase.”

¹⁷Soalnya so sampe tu hari waktu Tuhan Allah deng Anak Domba mo hakimi samua orang, kong nyanda ada satu orang yang tahang mo mangada tu hukuman brat itu.