Read Malay, Manado Wahyu 7 Bible Online

Wahyu 7 - Malay, Manado bible

Wahyu 7

¹Abis itu, kita tu Yohanes lia ada ampa malaekat badiri di ampa penjuru bumi. Dorang da tahang angin di ampa penjuru bumi supaya tu angin nyanda batiop di darat, laut, ato di pohong-pohong.

²Tu ampa malaekat itu so dapa kuasa for mo se rusak tu darat deng laut. Kong kita lia lei ada malaekat laeng muncul dari sabla timur, tu tampa matahari ja kaluar akang. Tu malaekat itu da bawa cap dari Tuhan Allah yang hidop. Trus tu malaekat itu babilang deng suara kuat pa tu ampa malaekat,

³dia bilang bagini, “Ngoni jang dulu beking rusak tu darat ato laut ato pohong-pohong! Soalnya Tuhan so suru pa torang se cap tu testa dari tu orang-orang tu ja beking tu torang pe Tuhan Allah da suru, supaya dorang nyanda dapa cilaka. Nanti kalu torang so klar cap pa dorang, baru ngoni bole beking itu.”

⁴Abis itu kita dengar kalu tu orang-orang yang dapa cap di testa, de pe jumla ada sratus ampa pulu ampa ribu orang. Dorang itu dari samua dua blas suku Israel. Ini no dorang:

⁵Dari suku Yehuda, Ruben deng Gad, masing-masing suku itu ada dua blas ribu orang yang da dapa cap.

⁶Dari suku Asyer, Naftali deng Manasye, masing-masing suku itu ada dua blas ribu orang lei yang da dapa cap.

⁷Dari suku Simeon, Lewi deng Isakhar, masing-masing suku itu ada dua blas ribu orang yang da dapa cap.

⁸Dari suku Zebulon, Yusuf, deng Benyamin, masing-masing suku itu lei ada dua blas ribu orang yang da dapa cap.

⁹Abis itu, kita lia ada klompo orang pe banya skali sampe nyanda dapa rekeng de pe jumla. Dorang itu dari samua fam, suku bangsa, bahasa deng bangsa. Dorang samua badiri di muka tahta deng di muka pa Anak Domba itu. Dorang da pake juba puti deng masing-masing da pegang daong palem.

¹⁰Kong deng suara kuat dorang bilang, “Tu da se slamat pa torang, itu Tuhan Allah yang dudu di atas tahta, deng lei tu Anak Domba.”

¹¹Waktu itu samua malaekat badiri bakliling di tahta itu deng tu tua-tua deng tu ampa mahluk. Dorang berlutut sampe dorang pe muka kana di tana di muka tu tahta itu, kong semba pa Tuhan Allah.

¹²Kong dorang babilang, “Amin! Mari jo torang puji pa Tuhan Allah. Dia itu luar biasa deng bijaksana. Torang lei bilang makase deng kase hormat pa Dia. Dia itu berkuasa, deng Dia tu torang pe Tuhan Allah itu kuat sampe slama-lamanya! Amin.”

¹³Kong satu dari tu tua-tua itu batanya pa kita, “Tu orang-orang yang da pake juba puti itu, dorang itu sapa? Kong dari mana dorang?”

¹⁴Kita manyao, “Bapak, bapak yang tau tu dorang itu.” Kong dia bilang pa kita, “Dorang itu no tu orang-orang yang so lewat tu siksa yang hebat skali. Dorang pake tu Anak Domba pe dara for se hapus dong pe dosa-dosa, itu sama deng dorang so cuci tu dong pe juba jadi puti.

¹⁵So itu, dorang ada di muka pa Tuhan Allah pe tahta kong layani pa Dia siang deng malam pa Dia pe Ruang Mahasuci. Kong Dia yang dudu di atas tahta itu mo ada di tenga-tenga pa dorang for jaga pa dorang, itu sama deng Dia da se badiri akang tenda di atas pa dorang.

¹⁶Dorang so nyanda mo mendrita lantaran lapar deng rasa aus lei. Kong tu panas matahari ato tu udara yang panas nyanda mo beking siksa pa dorang.

¹⁷Soalnya tu Anak Domba yang ada di tenga-tenga tahta itu mo jadi dorang pe Gembala for jaga pa dorang. Dia mo bawa pa dorang pi minum di mata aer yang kase tu hidop, kong Tuhan Allah mo hapus samua dorang pe aer mata.”