Read Malay, Manado Wahyu 9 Bible Online

Wahyu 9 - Malay, Manado bible

Wahyu 9

¹Abis itu malaekat yang kalima tiop de pe trompet, kong kita lia satu bintang ciri dari langit ka bumi. Trus ada yang kase pa tu bintang itu kunci for buka tu tampa maso ka jurang maut, tu tampa yang ja tahang akang setang-setang.

²Kong dia buka tu tampa maso ka jurang maut itu, trus dari tu jurang itu kaluar asap pe tabal sama deng tu asap yang da kaluar dari tungku yang pe basar skali. Kong tu matahari deng langit jadi glap tatutu deng tu asap itu.

³Kong dari tu asap itu kaluar belalang yang turung ka bumi. Tu belalang itu da dapa kemampuan for basengat pa orang-orang, kong de pe saki sama deng tu saki waktu kalajengking da sengat.

⁴Tu belalang itu da dapa prenta supaya dorang jang beking rusak tu rumpu-rumpu, tanaman-tanaman ato tu pohong-pohong di bumi, mar dorang cuma bole pi srang tu orang-orang yang nyanda ada cap di testa, tu cap yang dari Tuhan Allah.

⁵Tuhan Allah kase isin pa tu belalang for srang pa orang-orang itu sampe dorang jadi siksa skali slama lima bulan, mar belalang nimbole bunung tu orang-orang itu. Kong tu siksa yang orang-orang itu da rasa waktu belalang itu da sengat, de pe siksa sama deng kalajengking da sengat.

⁶Kong slama lima bulan itu, tu orang-orang mo brusaha supaya dorang bole mo mati, mar dorang nyanda mo mati-mati. Dorang suka skali mo mati mar tu maut cuma bajao dari pa dorang.

⁷Tu belalang itu pe model sama deng kuda yang da se siap for baprang. Pa dorang pe kapala ada sesuatu yang sama deng mahkota dari mas, kong dorang pe muka sama deng manusia pe muka.

⁸Trus dorang pe rambu sama deng parampuang pe rambu, kong dorang pe gigi sama deng singa pe gigi.

⁹Dorang pe dada da pele deng sesuatu tu sama deng tentara pe baju besi. Kong dorang pe sayap pe babunyi waktu terbang sama deng bunyi dari tentara pe kreta-kreta kuda pe banya yang samantara da baserbu di tampa prang.

¹⁰Trus dorang pe ekor sama deng kalajengking pe ekor yang ada de pe bisa. Kong pa dorang pe ekor itu ada kuasa for beking siksa orang-orang slama lima bulan.

¹¹Trus dorang pe raja yang bertugas jaga tu jurang maut. Tu raja itu pe nama dalam bahasa Ibrani ja bilang Abadon, tu dalam bahasa Yunani ja bilang Apolion tu de pe arti pangbarusak.

¹²Tu malapetaka pertama itu so lewat, mar masi ada dua malapetaka lei.

¹³Kong tu malaekat yang kaanam tiop tu de pe trompet, trus kita dengar suara yang kaluar dari ampa huk tu model tanduk yang ada di tampa korban persembahan. Tu tampa korban itu da beking dari mas kong ada di muka pa Tuhan Allah.

¹⁴Tu suara itu babilang pa tu malaekat kaanam yang da pegang tu trompet itu, “Pi kase lapas jo tu ampa malaekat yang da taika di dekat kuala basar Efrat itu!”

¹⁵Trus tu malaekat itu pi se lapas tu ampa malaekat, supaya tu ampa malaekat itu mo bunung sepertiga manusia. Dorang ampa itu memang so ditentukan for mo se lapas di jam, hari, bulan deng taong itu.

¹⁶Kong ada pe banya tentara-tentara berkuda, kita dengar dorang pe jumla ada dua ratus juta tentara.

¹⁷Kong pa kita pe penglihatan, kita lia tu tentara-tentara deng dong pe kuda-kuda. Tu tentara-tentara itu da pake baju besi for pele dong pe dada. Tu baju-baju itu ada tiga warna: ada tu warna mera sama deng api, ada tu biru tua sama deng batu permata deng ada tu kuning sama deng belerang. Kong tu kuda-kuda pe kapala pe model sama deng singa pe kapala, trus dari tu kuda-kuda pe mulu kaluar api, asap deng belerang.

¹⁸Tu api, asap deng belerang yang da kaluar dari tu kuda itu pe mulu, itu no tu tiga malapetaka. Kong tu tiga malapetaka itu da se mati sepertiga dari manusia di bumi.

¹⁹Soalnya tu kuda-kuda itu ada kuasa for mo siksa pa manusia, tu dong pe kuasa itu ada pa dong pe mulu deng ekor. Tu dorang pe ekor-ekor itu ada sesuatu sama deng ular pe kapala yang ada kuasa for siksa pa manusia.

²⁰Mar tu manusia yang nyanda mati deng tu malapetaka-malapetaka itu, dorang tetap nimau bertobat dari beking-beking tu jaha. Dorang nyanda brenti ja semba tu setang-setang deng patong opo-opo yang da beking dari mas, perak, tembaga, batu deng kayu, padahal tu samua opo-opo itu nimbole balia, badengar ato bajalang.

²¹Dorang lei nimau mo bertobat dari babunung orang, pake ilmu itang, ja baseks bebas deng bapancuri.