Read Malay, North Moluccan Matius 17 Bible Online

Matius 17 - Malay, North Moluccan bible

Matius 17

¹ Pe lewat anam hari, Yesus bawa pa Petrus, Yakobus deng Yakobus pe sudara Yohanes, dorang sama-sama nae di gunung satu yang tinggi. Di situ tarada orang laeng.

²Kong dong tiga lia Yesus pe rupa so beruba jadi laeng. Dia pe muka basinar sama deng matahari, kong Dia pe juba jadi puti mangkilat.

³Kage-kage dorang dapa lia nabi Musa deng nabi Elia[29] ada bacarita deng Yesus.

⁴Pe lia itu, Petrus bilang pa Yesus, “Guru, torang sanang skali ada di sini! Kalu Guru mau, kita mo biking tenda kacil tiga di sini: satu untuk Guru, satu untuk nabi Musa deng satu lagi untuk nabi Elia.”

⁵ Waktu Petrus masi bicara, kage-kage awan yang tarang turung tutu pa dorang. Kong dorang dengar dari dalam awan itu ada suara yang bilang bagini, “Ini Kita pe Anak yang Kita sayang. Dia biking Kita pe hati sanang. Dengar suda pa Dia!”

⁶Pe dengar suara itu, Yesus pe murit tiga orang itu jadi tako skali sampe bapalaka di tana.

⁷Turus, Yesus ka sana kong kore pa dorang, deng bilang, “Badiri suda. Jang ngoni tako!”

⁸Waktu dorang angka kapala, dong so tara lia orang laeng lagi di situ, cuma tinggal Yesus sandiri saja.

⁹Turus waktu dorang sementara turung dari gunung itu, Yesus pasáng pa dong bagini, “Jang dulu ngoni kase carita pa sapa-sapa apa yang ngoni so lia tadi e! Nanti kalu Anak Manusia yang dari sorga so mati kong so hidup ulang, baru ngoni bole kase carita.”

¹⁰ Kong Yesus pe murit-murit tanya pa Dia, “Bikiapa kong guru-guru agama yang ahli lima kitab Musa bilang, nabi Elia musti datang lebe kamuka dari Mesias, Raja yang Tuhan Allah janji mo kase slamat pa manusia?”

¹¹Yesus bilang pa dorang bagini, “Memang, nabi Elia itu akan datang kamuka supaya kase siap samua-samua.

¹² Tapi dengar bae-bae yang Kita bilang ini, orang yang sama deng nabi Elia itu[30] so datang, kong orang-orang tara kanal pa dia. Mala, dorang biking siksa pa dia iko dong pe mau. Bagitu lagi dorang akan biking siksa pa Anak Manusia.”

¹³Pe dengar itu, baru Yesus pe murit-murit mangarti, orang yang sama deng nabi Elia itu, Yesus pe maksut, Yohanes Pembaptis.

¹⁴Waktu Yesus deng Dia pe murit tiga orang itu bale di tampa orang banya itu, ada orang satu badekat pa Yesus, turus berlutut pa Yesus pe muka.

¹⁵Orang itu bilang pa Yesus, “Bapa, tolong pa kita pe ana ka! Dia mati-mati ayam kong so menderita skali. Kalu dia amfal, dia jaga jatu di api atau di aer.

¹⁶Kita so bawa dia pa Bapa pe murit-murit, tapi dorang tara mampo kase sembu pa dia.”

¹⁷Pe dengar bagitu, Yesus bilang, “Bukang maeng ngoni orang-orang skarang ini yang tara percaya deng yang sesat! Barapa lama lagi Kita musti tinggal sama-sama deng ngoni? Deng sampe barapa lama lagi Kita musti basabar deng ngoni? Bawa suda ana itu kamari!”

¹⁸Waktu dorang bawa ana itu ka sana pa Yesus, Yesus parenta deng karas pa setang la kaluar dari ana itu. Kong waktu setang itu kaluar, ana itu langsung sembu.

¹⁹Abis itu, Yesus pe murit-murit pigi pa Dia waktu Dia sandiri, baru dong badekat pa Dia, turus tanya, “Guru, bikiapa kong torang tara bisa user setang itu?”

²⁰ Kong Yesus bilang pa dorang, “Itu karna ngoni tara percaya butul-butul pa Tuhan Allah. Dengar bae-bae yang Kita bilang pa ngoni, kalu ngoni pe percaya itu ada, biar cuma kacil sama deng biji yang paling kacil di dunia ini, ngoni bole bilang pa gunung ini, ‘Pinda ka sana!’ Pasti gunung ini tapinda ka sana. Jadi samua ngoni bole biking, asal ngoni percaya pa Tuhan. [

²¹Tapi ngoni me musti tau, setang macam bagitu, tara mampo ngoni user kalu ngoni tara berdoa deng bapuasa.]”

²²Waktu Yesus deng Dia pe murit-murit sementara bakumpul di Galilea, Yesus bilang pa dorang, “Nanti Anak Manusia yang dari sorga mo dapa serakan pa orang-orang,

²³kong mo dapa bunu, tapi mo hidup ulang di hari ketiga.” Waktu murit-murit dengar yang Yesus bilang itu, dong pe hati jadi sedi skali.

²⁴ Waktu Yesus deng Dia pe murit-murit sampe di kota Kapernaum, orang-orang yang jaga batagi pajak untuk Ruma Ibada Pusat datang pa Petrus kong batanya pa dia, “Bapa pe Guru jaga bayar Ruma Ibada Pusat pe pajak[31] ka tarada?”

²⁵Kong dia bilang pa dorang, “Iyo, Dia salalu bayar.” Waktu Simon Petrus maso di ruma, Yesus tanya pa dia kamuka, “Simon, kalu menurut ngana, sapa yang musti bayar pajak pa raja-raja yang berkuasa di dunia ini? Dorang pe ana-ana sandiri atau orang laeng?”

²⁶Kong Petrus jawab, “Tantu orang laeng.” Turus, Yesus bilang pa dia, “Butul itu. Jadi dorang pe ana-ana sandiri tara perlu babayar pajak.[32]

²⁷Bagitu lagi deng torang, tong ini Tuhan Allah pe ana-ana, jadi sebenarnya tong tara usa bayar pajak untuk Tuhan Allah pe Ruma Ibada. Tapi supaya dorang tara tersinggung, ngana pigi suda di talaga la mangael ikang. Ambe ikang yang pertama skali ngana dapa, kong buka dia pe mulu. Di situ ngana mo dapa doi[33] yang cukup untuk bayar torang dua pe pajak untuk Ruma Ibada Pusat. Ngana ambe suda doi itu kong bayar tong dua pe pajak.”