Read Malay, North Moluccan Matius 20 Bible Online

Matius 20 - Malay, North Moluccan bible

Matius 20

¹Yesus bilang lagi, “Cara Tuhan Allah Berkuasa sebagai Raja, sama deng umpama ini. Ada tuang tana satu yang ada kobong anggur. Masi amper siang, dia so kaluar cari orang-orang la bakarja pa dia pe kobong anggur.

²Waktu dia dapa babarapa orang, dia baku ator deng dorang tentang dorang pe sewa karja untuk satu hari. Itu dia mo bayar pa satu orang, satu hari satu perak.[37] Abis itu, dia suru dorang bakarja pa dia pe kobong anggur.

³Kira-kira jam sembilan pagi, dia kaluar ulang kong pigi di pasar. Di sana, dia lia ada babarapa orang yang tara ada karja.

⁴Kong dia bilang pa dorang, ‘Ngoni karja di kita pe kobong anggur e. Nanti kita bayar pa ngoni deng gaji yang sesuai.’ Pe dengar itu, dorang pigi bakarja di kobong.

⁵Turus kira-kira jam dua blas siang deng jam tiga sore, dia kaluar lagi kong pigi cari lagi orang karja di pasar, sama deng yang dia biking tadi.

⁶Abis itu, kira-kira jam lima sore, dia kaluar lagi kong dia lia masi ada orang-orang laeng lagi di pasar yang tara bakarja. Kong dia tanya pa dorang, ‘Bikiapa kong satu hari ini ngoni cuma badiri di sini kong tara bakarja?’

⁷Dorang bilang pa dia, ‘Torang babagini saja, barang tarada orang yang kase torang karja’. Kong dia bilang pa dorang, ‘Kalu bagitu, ngoni pigi di kita pe kobong anggur kong bakarja di sana suda.’

⁸ Waktu so mo malam, tuang kobong itu bilang pa dia pe mandor, ‘Pangge kamari samua orang karja itu kong bayar dong pe gaji. Ngana bayar pa dorang mulai dari yang maso paling ka balakang sampe yang maso paling kamuka.’

⁹Di situ, orang-orang karja yang karja paling ka balakang ambe dorang pe gaji kamuka, masing-masing dorang tarima satu perak.

¹⁰Jadi waktu orang-orang yang bakarja dari pagi datang ambe dong pe gaji, dong kira dorang masing-masing mo dapa lebe banya dari orang yang bakarja dari balakang. Tapi dorang me cuma tarima masing-masing satu perak.

¹¹Waktu dorang tarima doi itu, dorang bafeto pa tuang kobong itu.

¹²Dorang bilang, ‘Tuang, tara bisa bagini! Orang yang datang dari balakang, karja cuma satu jam. Masa dorang pe gaji sama deng torang! Padahal torang ini bakarja satu hari fol, kong suar-suar sampe malele.’

¹³Tapi tuang kobong itu bilang pa satu orang dari dorang, ‘Sudara, jang ngana mara e! Ini bukang berarti kita tara adil pa ngana. Karna dari pertama torang dua so baku ator to, kita mo bayar pa ngana deng satu perak untuk karja satu hari.

¹⁴Jadi lebe bae ngana tarima gaji itu deng sanang hati suda kong pulang. Kita suka kase gaji yang sama pa ngana, sama deng kita kase pa orang yang maso ka balakang.

¹⁵Kita pe hak pake kita pe doi iko kita pe mau sandiri, to? Atau ngana tara sanang karna kita bae pa orang-orang itu?’ ”

¹⁶ Yesus bilang lagi, “Jadi dari umpama itu torang jadi tau, orang yang jadi orang penting di dunia ini, nanti jadi orang yang tara penting, kong orang yang tara penting di dunia ini, nanti jadi orang penting.”

¹⁷Satu kali bagini, Yesus deng Dia pe murit-murit pigi ka atas di kota Yerusalem. Di tenga jalang, Dia pangge Dia pe murit-murit bapisa ka sana sadiki, baru Dia bilang bagini,

¹⁸“Dengar e! Skarang torang mo pigi ka atas di kota Yerusalem. Di sana, orang mo serakan Anak Manusia yang dari sorga pa imam-imam kapala deng guru-guru agama yang ahli lima kitab Musa. Kong dorang mo kase hukuman mati pa Dia.

¹⁹Dorang mo serakan Dia pa orang-orang yang bukang Yahudi, kong orang-orang itu ejek-ejek, pukul pake tali yang ada barang tajam di dia pe ujung, deng dorang kase salib pa Dia. Tapi di hari yang ketiga, Dia akan hidup ulang.”

²⁰Abis itu, Zebedeus pe bini deng dia pe ana Yakobus deng Yohanes datang pa Yesus. Ibu itu berlutut pa Yesus mo minta satu barang.

²¹Yesus tanya pa dia, “Ibu mo minta apa?” Dia bilang pa Yesus, “Guru, kalu Guru so jadi Raja kong so Berkuasa, Guru suru kita pe ana dua ini dudu pa Guru pe sabla. Satu di sabla kanan deng satu lagi di sabla kiri.”

²²Pe dengar itu, Yesus bilang pa dorang bagini, “Ngoni tara mangarti deng apa yang ngoni minta. Kita ini nanti mo dapa banya sengsara. Apa ngoni bisa pikul penderitaan sama deng Kita?” Kong dorang jawab, “Torang bisa!”

²³Turus Yesus bilang pa dorang, “Memang ngoni nanti menderita sama deng Kita. Tapi tentang sapa yang mo dudu di Kita pe sabla kanan deng sabla kiri, itu bukang Kita pe hak mo tentukan. Tampa itu Kita pe Bapa so sadia untuk orang-orang yang Dia so tentukan.”

²⁴Waktu spulu murit yang laeng dengar apa yang dong dua minta itu, dorang hati saki pa dua sudara itu.

²⁵ Turus Yesus pangge pa dorang samua, kong Dia bilang bagini, “Ngoni tau, pemimpin-pemimpin dari bangsa-bangsa yang tara kanal pa Tuhan, dorang itu jaga pimpin pa dong pe rakyat deng karas. Bagitu lagi deng dorang pe orang-orang basar, dorang jaga siksa pa orang-orang yang dong pimpin.

²⁶Tapi ngoni tara bole bagitu! Sapa dari ngoni samua yang suka mo jadi hebat pa Tuhan pe muka, dia musti jadi sama deng orang biasa-biasa saja yang layani pa ngoni.

²⁷Deng sapa dari ngoni yang suka mo jadi orang paling hebat pa Tuhan pe muka, dia musti biking dia pe diri sama deng orang karja untuk layani pa ngoni.

²⁸Itu sama deng Anak Manusia yang dari sorga datang di dunia ini bukang untuk dapa layani, tapi untuk layani deng kase diri mati la tebus orang banya pe dosa.”

²⁹Waktu Yesus deng Dia pe murit-murit bajalang kaluar dari kota Yerikho, ada banya orang yang iko sama-sama deng dorang.

³⁰Kong ada dua orang buta yang dudu di pinggir jalang. Waktu dorang dengar Yesus ada iko di situ, dorang bataria, “Bapa, raja Daud pe turunan, kasiang pa torang ka!”

³¹Pe dengar dorang bataria bagitu, orang banya togor pa dong dua supaya dong dua badiam. Tapi dorang dua bataria lebe kuat lagi, “Bapa, raja Daud pe turunan, kasiang pa torang ka!”

³²Kong Yesus berenti, turus pangge pa dorang dua. Dia tanya pa dorang, “Ngoni mau Kita biking apa pa ngoni?”

³³Dorang jawab, “Bapa, torang minta supaya torang bisa dapa lia.”

³⁴Pe dengar itu, Yesus rasa kasiang pa dorang. Dia pegang dorang pe mata kong dorang langsung bisa dapa lia. Abis itu, dorang iko pa Yesus.