Read Malay, North Moluccan Matius 22 Bible Online

Matius 22 - Malay, North Moluccan bible

Matius 22

¹Kong Yesus bicara lagi pa dorang pake umpama. Dia bilang,

²“Tuhan Allah Berkuasa sebagai Raja pa Dia pe umat, sama deng umpama ini: ada raja satu yang biking dia pe ana pe pesta kawing.

³Bagitu samua so siap, dia suru dia pe orang-orang karja pigi pangge pa orang-orang yang dia so undang la datang suda di pesta kawing itu, tapi orang-orang itu tara mau datang.

⁴Karna itu, raja suru dia pe orang-orang karja yang laeng lagi kong bilang, ‘Ngoni pigi suda kong bilang pa orang-orang yang kita so undang itu, kita so potong sapi laki-laki deng sapi muda yang baisi kong so momasa. Samua so tasadia, jadi datang suda di pesta kawing ini.’

⁵Tapi orang-orang yang dapa undang itu tara peduli deng undangan itu. Ada yang pigi pa dong pe kobong, ada yang pigi urus dong pe usaha.

⁶Mala yang laeng tangka pa orang-orang karja itu kong siksa, turus bunu pa dorang.

⁷Pe dengar bagitu, raja nae dara. Turus, dia suru dia pe tentara-tentara ka sana la bunu pa orang-orang yang so bunu dia pe orang-orang karja itu, deng dia suru lagi bakar orang-orang itu pe kota.

⁸Abis itu, raja bilang pa orang-orang karja laeng bagini, ‘Pesta kawing so siap, tapi orang-orang yang kita undang itu tara pantas maso di kita pe pesta.

⁹Jadi skarang, ngoni pigi di jalang-jalang, kong ngoni undang sapa saja yang ngoni baku dapa di sana, la dong kamari maso di pesta kawing ini.’

¹⁰Pe dengar itu, orang-orang karja itu pigi. Sapa saja yang dorang baku dapa di jalang-jalang dong undang, biar dia itu orang yang bae atau orang yang jahat, dorang undang sampe tampa pesta itu ponong deng tamu-tamu.

¹¹Tapi waktu raja maso di tampa pesta la baku dapa deng tamu-tamu yang datang, dia lia ada satu orang yang tara pake baju pesta.

¹²Kong raja tanya pa tamu itu, ‘Ee, tamang, bagimana kong ngana kamari di sini tara pake baju pesta?’ Tapi orang itu cuma badiam saja.

¹³ Turus, raja itu bilang pa dia pe orang-orang karja bagini, ‘Ngoni ika orang itu pe kaki deng tangan kong buang pa dia kaluar di tampa yang paling galap. Di tampa itu, orang-orang mo manangis sampe dong pe gigi mo babunyi karna sengsara.’ ”

¹⁴Kong Yesus kase selesai Dia pe carita deng bilang bagini, “Banya orang yang Tuhan Allah pangge untuk jadi Dia pe umat, tapi cuma sadiki yang dapa pili.”

¹⁵Abis itu, orang-orang Yahudi dari aliran Farisi baku ator supaya pigi tanya-tanya pa Yesus untuk cari-cari Dia pe sala.

¹⁶Jadi dorang suru pa dong pe murit-murit deng babarapa orang yang jaga iko pa raja Herodes pigi ka sana supaya bilang bagini, “Guru, torang tau, Guru ini jujur. Guru jaga kase ajar pa orang-orang yang butul tentang bagimana hidup iko Tuhan Allah pe mau. Kong Guru tara tako pa sapa-sapa, karna Guru tara cari muka.

¹⁷Jadi skarang torang mo tanya pa Guru, kalu iko torang pe aturan agama, bole ka tarada torang bayar pajak pa raja basar Roma?”[43]

¹⁸Tapi Yesus tau dorang pe rencana jahat itu. Jadi Dia bilang pa dorang bagini, “Woe orang-orang munafik, bikiapa kong ngoni mo cari-cari Kita pe sala?

¹⁹Coba ngoni kase tunju pa Kita doi yang ngoni jaga pake babayar pajak!”[44] Kong dorang bawa pa Dia doi perak satu.

²⁰Turus Yesus tanya pa dorang bagini, “Sapa pe gambar deng sapa pe nama ini?”

²¹Dorang jawab, “Raja basar Roma pe gambar deng pe nama.” Kong Yesus bilang pa dorang, “Kalu bagitu, kase suda pa raja apa yang ngoni musti kase pa dia, deng kase suda pa Tuhan Allah apa yang ngoni musti kase pa Tuhan Allah!”

²²Pe dengar itu, dorang herang deng so tara dapa akal lagi mo cari Yesus pe sala, jadi dong pigi kase tinggal pa Dia.

²³ Hari itu suda, ada babarapa orang agama Yahudi dari aliran Saduki[45] datang pa Yesus. Aliran ini pe ajaran, orang yang so mati tara akan hidup ulang. Jadi dorang tanya pa Yesus bagini,

²⁴ “Guru, dulu nabi Musa kase tau, laki-laki sapa saja yang so kawing kong mati tarada ana, dia pe sudara laki-laki musti kawing deng dia pe janda itu supaya sudara yang mati itu ada turunan.

²⁵Tapi perna jadi di antara torang bagini: ada tuju orang laki-laki basudara. Yang tua kawing kong mati, tapi tarada ana. Jadi dia pe ade yang kedua kawing deng dia pe kaka pe janda.

²⁶Tapi yang kedua itu lagi mati tarada ana. Bagitu me deng yang ketiga sampe yang ketuju, dorang me mati tarada ana.

²⁷Dia pe ahir kabawa, parampuang itu me mati.

²⁸Jadi, skarang torang mo tanya, nanti di hari kiamat waktu Tuhan kase hidup ulang pa samua orang, yang mana sebenarnya dari dorang tuju itu yang jadi parampuang itu pe laki? Barang, ade kaka tuju orang itu samua so kawing deng dia!”

²⁹Kong Yesus bilang pa dorang bagini, “Ngoni so sala skali, karna ngoni tara mangarti Kitab Suci, deng ngoni tara tau Tuhan Allah pe kuasa.

³⁰Karna nanti waktu Tuhan Allah kase hidup ulang orang yang so mati, dorang so tara kawing lagi, tapi dorang so hidup sama deng malaekat di sorga.

³¹Jadi tentang orang mati yang akan hidup ulang, pasti ngoni so baca di Kitab Suci, yang Tuhan Allah bilang bagini,

³² ‘Kita ini suda Tuhan Allah yang Abraham, Ishak deng Yakub jaga semba.’ Waktu Tuhan Allah bilang itu, Abraham, Ishak deng Yakub so mati tapi dorang so hidup ulang deng Tuhan Allah. Jadi Tuhan Allah itu bukang orang mati pe Tuhan, tapi orang hidup pe Tuhan.”

³³Waktu orang banya yang ada di situ dengar apa yang Yesus bilang, dorang herang, barang dorang suka skali deng Dia pe ajaran itu.

³⁴Waktu itu, orang-orang Yahudi dari aliran Farisi dengar Yesus pe jawaban yang biking sampe orang-orang Yahudi dari aliran Saduki tara bisa bilang apa-apa lagi. Jadi waktu itu suda, dorang bakumpul,

³⁵kong dong pe guru agama satu yang ahli lima kitab Musa tanya pa Yesus la mo cari-cari Dia pe sala lagi bagini,

³⁶“Guru, dari samua yang ada di lima kitab Musa itu, parenta mana yang paling penting?”

³⁷ Yesus bilang pa dia, “Parenta yang paling penting itu bagini, ‘Ngoni musti butul-butul sayang pa Tuhan Allah, ngoni pe Tuhan. Ngoni musti sayang pa Dia lebe dari samua yang ngoni sayang, deng ngoni lagi musti sayang pa Dia deng cara salalu inga pa Dia.’

³⁸Itu suda parenta yang paling penting, deng yang pertama.

³⁹ Kong parenta yang kedua yang sama deng itu bagini, ‘Ngoni musti sayang pa orang laeng sama deng ngoni sayang ngoni pe diri sandiri.’

⁴⁰Dua parenta ini suda yang jadi dasar dari samua aturan di lima kitab Musa deng di nabi-nabi laeng pe kitab.”

⁴¹Waktu orang-orang Yahudi dari aliran Farisi masi bakumpul di situ, Yesus batanya pa dorang,

⁴²“Coba ngoni bilang pa Kita, apa ngoni pe pendapat tentang Mesias, Raja yang Tuhan Allah janji, Dia itu sapa pe turunan?” Kong dorang jawab pa Yesus, “Dia itu raja Daud pe turunan.”

⁴³Kong Yesus bilang pa dorang, “Kalu bagitu, bikiapa kong dulu waktu Roh Kudus kuasai pa raja Daud, raja Daud pangge pa Mesias itu Tuhan? Waktu itu, raja Daud bilang bagini,

⁴⁴ ‘Tuhan Allah bilang pa kita pe Tuhan: dudu suda di tampa yang terhormat, pa Kita pe sabla kanan, sampe Kita kase kala Ngana pe musu-musu samua.’

⁴⁵Jadi, kalu raja Daud sandiri saja bilang Mesias itu dia pe Tuhan, bagimana lagi torang mo bilang Mesias itu cuma raja Daud pe turunan?”[46]

⁴⁶Dari samua orang itu, tara ada satu orang lagi yang bisa jawab apa-apa pa Yesus. Kong mulai dari waktu itu, tarada satu orang lagi yang barani batanya pa Yesus.