Read Malay, North Moluccan Matius 23 Bible Online

Matius 23 - Malay, North Moluccan bible

Matius 23

¹Abis itu, Yesus bilang pa orang banya itu deng pa Dia pe murit-murit,

²“Guru-guru agama Yahudi yang ahli lima kitab Musa, deng orang-orang Yahudi dari aliran Farisi, dorang pe tugas sama deng nabi Musa dulu, untuk kase jelas aturan di lima kitab Musa.

³Karna itu, ngoni musti dengar kong iko suda samua yang dorang ajar pa ngoni. Tapi jang ngoni iko dorang pe kalakuang, karna biar dorang ajar pa ngoni tapi dong sandiri tara biking itu.

⁴Dorang biking aturan agama pe banya deng pe barát skali, baru suru orang banya iko itu. Padahal dorang sandiri tara biking aturan-aturan itu.

⁵ Samua yang dorang biking, dorang biking cuma supaya orang puji pa dorang. Macam deng dong pe pangika kapala deng tangan, yang dong tulis isi Kitab Suci kong dong biking kase lebar-lebar. Turus, dorang pe juba pe banang-banang me dong biking kase lebe panjang supaya orang tau kata, dong iko pa Tuhan deng bae.

⁶Kalu dorang maso di acara-acara pesta deng di ruma ibada, dong suka dudu di muka di tampa yang paling terhormat.

⁷Dorang me suka skali orang hormati pa dorang kalu dorang ada di tampa orang banya. Kong dorang mau orang pangge pa dorang ‘bapa guru’.

⁸Tapi ngoni, jang ngoni ingin orang hormati pa ngoni deng orang pangge pa ngoni ‘bapa guru’! Barang, ngoni pe Guru itu cuma satu, kong ngoni samua itu basudara.

⁹Deng jang ngoni pangge pa orang laeng ‘bapa’, karna ngoni pe Bapa itu cuma satu, Dia itu Bapa yang ada di sorga.

¹⁰Jang lagi ngoni kase biar orang pangge pa ngoni ‘pemimpin’, karna ngoni pe Pemimpin cuma satu, Dia itu Mesias, Raja yang Tuhan Allah janji mo kase slamat pa manusia.

¹¹ Sapa dari ngoni yang jadi orang penting, dia musti layani pa orang laeng sama deng orang karja layani orang.

¹² Barang, sapa saja yang baangka diri, Tuhan Allah mo biking dia jadi orang yang tara arti apa-apa. Tapi sapa yang anggap dia pe diri sama deng orang yang tara arti apa-apa, Tuhan Allah mo angka pa dia jadi orang yang penting.”

¹³Yesus bilang lagi, “Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang, ngoni sandiri tara kase ngoni pe diri jadi Tuhan Allah pe umat la Dia Berkuasa sebagai Raja pa ngoni pe hidup, deng ngoni sandiri me pele pa orang-orang yang berusaha mo jadi Dia pe umat. Itu sama deng ngoni so tutu pintu pa dorang. [

¹⁴Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang ngoni suka biking bodo pa janda-janda la ambe dong pe ruma. Baru ngoni kalu berdoa, suka kase panjang-panjang supaya orang tau ngoni itu orang bae, padahal tarada. Karna itu, ngoni pasti mo dapa hukuman yang paling barát].

¹⁵Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang, ngoni balayar di mana-mana, kaluar maso kampong cuma mo cari orang la iko ngoni pe ajaran. Tapi bagitu orang itu so jadi ngoni pe pengikut, ngoni biking dia jadi dua kali lebe jahat dari ngoni, ngoni so biking dia siap untuk maso neraka.

¹⁶Cilaka suda ngoni pemimpin-pemimpin! Ngoni itu sama deng orang buta yang tunda orang laeng! Barang, ngoni jaga ajar pa orang-orang bagini, ‘Sapa yang basumpa demi Ruma Ibada Pusat, orang itu tara taika deng dia pe sumpa. Tapi kalu dia basumpa demi barang mas yang ada di Ruma Ibada Pusat itu, dia taika deng dia pe sumpa itu.’

¹⁷Ngoni ini bodo deng buta! Mana yang lebe penting, mas ka Ruma Ibada Pusat? Pasti Ruma Ibada Pusat, to? Karna Ruma Ibada Pusat yang biking mas di dalam itu jadi suci.

¹⁸Ngoni me ada ajar lagi bagini, ‘Sapa yang basumpa demi tampa bakar binatang korban persembahan, dia tara taika deng dia pe sumpa itu. Tapi sapa yang basumpa demi binatang korban persembahan yang di tampa itu, baru dia taika deng dia pe sumpa itu.’

¹⁹Ngoni ini orang-orang buta! Mana yang lebe penting, binatang korban persembahan itu, atau dia pe tampa bakar persembahan itu? Pasti tampa bakar korban persembahan itu, to? Barang, tampa itu yang biking korban persembahan jadi suci.

²⁰Jadi, sapa yang basumpa demi tampa bakar korban persembahan, itu dia so basumpa bukang cuma demi tampa bakar korban persembahan itu saja, tapi samua yang ada di atas tampa itu.

²¹Turus, sapa yang basumpa demi Ruma Ibada Pusat, itu dia so basumpa bukang cuma demi Ruma Ibada Pusat itu saja, tapi dia so basumpa lagi pa Tuhan Allah yang tinggal di situ.

²² Bagitu lagi sapa yang basumpa demi sorga, itu dia so basumpa demi Tuhan Allah pe kursi raja deng lagi demi Tuhan Allah yang dudu di kursi itu.[47]

²³ Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang, ngoni jaga kase perpuluhan, sampe dari ngoni pe rampa-rampa[48] yang paling kacil macam deng selasi, adas manis, deng jintan me ngoni buka dia pe perpuluhan. Tapi aturan yang paling penting yang ada di lima kitab Musa ngoni tara peduli, macam deng biking yang adil pa orang, kase tunju rasa kasiang pa orang, deng jadi orang yang setia. Sebenarnya, ngoni musti biking aturan-aturan yang penting itu, deng ngoni lagi jang berenti kase perpuluhan.

²⁴Ngoni itu pemimpin-pemimpin yang sama deng orang buta yang tunda orang laeng! Ngoni jaga biking parenta yang kacil, tapi Tuhan Allah pe parenta yang penting itu ngoni tara biking. Itu sama deng ngoni tapis agas dari ngoni pe minuman, padahal unta basar satu di dalam ngoni pe minuman ngoni talang.

²⁵Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni itu munafik samua. Barang, dari luar dapa lia ngoni biking aturan agama, padahal di ngoni pe hati ngoni ingin rampas orang laeng pe barang deng tara mampo kuasai ngoni pe diri sandiri. Itu sama deng orang yang jaga kase bersi galas deng piring cuma di bagian luar, padahal bagian dalam kotor skali.

²⁶Ee ngoni orang-orang Yahudi dari aliran Farisi, ngoni sama deng orang-orang buta! Kase bersi dulu ngoni pe pikiran dari pikiran yang jahat, supaya apa yang ngoni biking deng bilang lagi itu jadi bagus, itu sama deng kase bersi galas deng piring pe bagian dalam supaya bagian luar lagi mo bersi.

²⁷ Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Ngoni itu sama deng kubur-kubur yang ada cet puti. Di luar dapa lia bagus, padahal di dalam ponong deng orang mati pe tulang deng samua yang busu.

²⁸Itu sama deng ngoni, dari luar dapa lia ngoni sama deng orang yang jaga biking yang butul pa Tuhan Allah pe muka, padahal dari dalam ngoni pe hati, ngoni paling munafik deng jahat.

²⁹Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Ngoni jaga biking nabi-nabi pe kubur bagus-bagus. Deng ngoni lagi jaga hias tugu-tugu peringatan, tugu yang biking untuk inga pa orang-orang yang jaga biking yang butul pa Tuhan Allah pe muka.

³⁰Kong ngoni bilang bagini, ‘Kalu torang riki hidup sama-sama deng torang pe orang tua dulu-dulu, pasti torang tara iko bunu pa nabi-nabi itu.’

³¹Tapi deng ngoni bilang bagitu, ngoni so mangaku sandiri, ngoni itu turunan dari orang-orang yang bunu pa nabi-nabi itu.

³²Jadi lebe bae, ngoni biking barang yang jahat saja turus, iko ngoni pe orang tua dulu-dulu pe kalakuang yang sala itu!

³³ Woe ngoni orang-orang jahat. Ngoni sama deng ular bisa. Ngoni itu turunan orang jahat, sama deng ular bisa pe turunan. Tuhan Allah akan kase maso pa ngoni di neraka, kong ngoni tara akan mo lolos.

³⁴Karna itu, dengar bae-bae. Kita mo utus pa nabi-nabi, orang-orang pande, deng guru-guru agama Yahudi yang ahli lima kitab Musa. Ada babarapa dari dorang yang ngoni mo bunu, kong yang laeng ngoni mo kase salib. Ada laeng lagi pa ngoni pe ruma-ruma ibada yang ngoni mo pukul deng tali yang ada barang tajam di dia pe ujung. Kong ada lagi yang ngoni mo dusu-dusu mo siksa pa dorang dari satu kota pigi di kota yang laeng.

³⁵ Karna itu, Tuhan Allah mo hukum pa ngoni karna samua orang yang ngoni pe orang tua dulu-dulu so bunu di dunia, mulai dari Habel sampe pa Berekhya pe ana, nabi Zakharia, yang dapa bunu di Ruma Ibada Pusat antara tampa bakar korban persembahan deng Ruang Paling Suci. Dorang itu orang yang jaga biking yang butul pa Tuhan Allah pe muka.

³⁶Dengar bae-bae yang Kita bilang ini. Ngoni yang ada skarang ini, ngoni akan dapa hukum karna samua hal-hal jahat itu.”

³⁷Abis itu, Yesus bilang, “Kasiang ngoni orang-orang Yerusalem! Ngoni yang bunu pa nabi-nabi yang jaga kase turus Tuhan Allah pe pasáng deng ngoni me lempar deng batu sampe mati pa orang-orang yang Tuhan Allah utus pa ngoni. So ulang-ulang kali Kita ingin kumpul pa ngoni supaya dekat deng Kita, sama deng ayam mai yang tutu dia pe ana-ana deng dia pe sayap. Tapi ngoni tara mau.

³⁸Karna itu, coba perhatikan, Tuhan Allah so tara akan ada lagi di Ruma Ibada Pusat ini kong Ruma ini mo jadi sunyi skali.

³⁹ Dengar bae-bae e, mulai skarang ngoni so tara akan lia lagi pa Kita. Tapi nanti waktu Kita datang ulang, ngoni akan lia lagi pa Kita kong bilang bagini, ‘Puji pa Dia yang Tuhan Allah so utus datang kamari.’ ”